​​Буряад хэлэнэй “Эрхим багша” элирбэ

“Эрхим багша” гэһэн уласхоорондын урилдаанай гол шан хоёрдохи удаагаа Буряадай түлөөлэгшэдэ үгтэбэ.

 Хоёр жэлэй саана анха түрүүшынхиеэ уласхоорондын хэмжээндэ зарлагдаһан энэ урилдаанай гол шан Ивалгын дунда һургуулиин багша Наталья Ширапова абаа бэлэй. Тиихэдэ баһал 30-аад багшанар Эрхүү можоһоо, Үбэр Байгалай хизаарһаа, Монгол Уласһаа болоод Хитадһаа байгаа.

Харин энэ удаа шанга гэгшын шалгалтануудые дабажа, Улаан-Үдын 32-дугаар һургуулиин багша Гэрэлма Ванзатова түрүүлбэ. Хэшээлнүүдтээ шэнэ оньһонуудые элбэгээр хэрэглэдэг хотын багшын дүршэл ехэтэйе жюриин гэшүүд анхаржа, ажал хэрэгыень иимэ үндэрөөр сэгнэбэ бшуу. Энэ урилдаанһаа бүри дэлгэрэнгы мэдээ “Буряад үнэн” сониной ээлжээтэ дугаарта толилхобди.