1120
Буряад Уласта хэдэн томо барилганууд Владимир Жапович Халбазыковай ударидалга доро бодхоогдоһон байна. Энэ хадаа Шэнэ Бэрээн һууринда баригдаһан психиатрическа больница, Гусиноозёрскын больницын хирургиин танхим, Санага һууринай дунда һургуули болон бусад. “Ородой Холбоото Уласай хүндэтэ барилгашан” гэһэн үндэр нэрэ зэргэтэй мэргэжэлтэнэй хэһэн ажал тоолошогүй олон.
Владимир Жапович Түнхэн аймагай Галба һууринда 1938 оной декабриин 1-дэ түрэһэн. Абынгаа наһа барахада, багаһаа хойшо хара ажалда хамсыгаа шаман орожо, эжыдээ туһалжа эхилээ. Энээнһээ боложо, дунда һургуулияа аяар 19 наһа хүрэхөө ябаад түгэсөө бэлэй. Тиигэһээр байтараа, сэрэгэй албанда татагдаа. Тэндэһээ бусаад, Улаан-Үдын Машзаводто хүдэлөө.
1962 ондо Зүүн Сибириин гүрэнэй технологическа институт байгуулагдахада, барилгын факультедтэ ороһон. Оюутан ябахадаа, хирпиисээр хана бодхоогшоор хүдэлжэ эхилээ.
1967 ондо дээдэ һургуулиин дипломтой мэргэжэлтэн Кабанска аймагай Селенгинск һуурин эльгээгдэһэн байна. Тэрэ үедэ целлюлоз-картон үйлэдбэрилгын комбинат баригдажа эхилээ. “Бүхы Союзай барилга” гэжэ алдаршаһан энэ барилгада хаа-хаанаһаа ерэһэн 500 гаран хүн хүдэлдэг һэн. Владимир Халбазыков тус барилгада мастер, прораб, монтажна таһагай хүтэлбэрилэгшөөр амжалтатайгаар хүдэлөө.
Тиигэжэ 1972 ондо томо комбинадай түрүүшын шатын ашаглалгада тушаагдахадань, Улаан-Үдэдэ трикотажна фабрика барилгада эльгээгдээ. Владимир Жаповичай ударидалга доро бодхоогдоһон фабрикын байшан Советскэ Союзай Промышленна барилгын яаманай шанар шэнжэ һайнай тэмдэгтэ хүртөө. Мүн Владимир Халбазыков Буряадай АССР-эй габьяата барилгашанай нэрэ зэргэтэй болоһон юм.
Удаань бэлигтэй барилгашанай хүтэлбэри доро Загарайн шубуунай фабрика, Шалуутын комбикормово завод бодхоогдоо.
Манай 174-дэхи ПМК Загарайда байдаг һэн. Үдэр бүри 80 километр харгы гаталжа, хүдэлмэрилэгшэд ажалдаа ошодог байгаа. Нэн түрүүн комбикормово завод барилгада ажалшадые урагша хойшонь шэрэдэг автобусууд, хүндэ ашаанай автомашинанууд дуталдажа эхилээ. Энээнһээ боложо, барилгада хабаадаһан хүн зон гомдолоо мэдүүлээ. Мүн салиншье бага байгаа. Буряадай Засагай газартай хэдэн дахин хөөрэлдэхэдэмнай, арсалдаата асуудалнууд шиидхэгдээ. Улаан-Үдэ хотоһоо хэдэн автобус дамжуулагдаа, салиншье ехэ болоо, - гэжэ Владимир Жапович ажал тухайгаа хөөрэнэ.
1981 ондо барилгануудай ашаглалда тушаагдахадань, Владимир Халбазыков “Арадуудай хоорондохи найрамдалай” орденоор шагнагдаа.
1990-2000 онуудта Буряадай Хүдөө ажахын яаманда, Буряадай Засагай газарай захиргаанай капитальна барилгын управленидэ хүдэлһэн намтартай.
2002 ондо “Вилад” гэһэн өөрын барилгын эмхи байгуулжа, олон тоото барилгын, заһабарилгын ажалнуудые улас дотороо бүтээһэн намтартай.
Владимир Жапович хаанашье хүдэлөө һаа, түрэл тоонто нютагаа мартаагүй. Галба һууринда һургуули болон хүүгэдэй сэсэрлигүүд бодхоогдоо. Тиигэжэ томо спортын комплекс баригдаа. Түнхэн һууринда һургуули ашаглалда тушаагдаа. Галба нютагай бүхы үйлсэнүүд асфальтаар хушагдаа. Нютагай ажаһуугшад урдаа хараха хүбүүндээ элүүр энхые хүсэнэ.
Виталий ИВАХИНОВ, Ородой Холбоото Уласай габьяата тренер
