1069
Буряад Уласай барилгын болон гэр байрын ажахы шэнэдхэлгын талаар яаман нютагай засагай байгууламжануудай юрэнхы түсэбүүдэй хуулиин хүсэ алдаһан тухай тоолохо гэһэн асуудалаар зүблөөндэ хабаадаба. Буряад Уласай Засагай газарай Түрүүлэгшын аюулгүй байдал сахиха талаар орлогшо Пётр Мордовскойн хүтэлбэри доро суглаан үнгэргэгдэбэ.
- 2021 онһоо Буряад Уласай зарим хүдөө нютагуудта барилга ябуулхада, хуулиин хүсэгүй гэжэ тоологдохо, - гэжэ Буряад Уласай барилгын болон гэр байрын ажахы шэнэдхэлгын сайдай орлогшо Сергей Рыбальченко хэлэбэ.
Эндэ ойн жасын дэбисхэр дээгүүр хүдөө нютагуудай хилэ гараһан газарнууд тухай хэлэгдэнэ. 2021 оной январиин 1-һээ хойшо Буряад Уласай 633 хүдөө нютаг бүхэн юрэнхы түсэбтэй байха ёһотой. Энэ дансагүйгөөр барилга ябуулха эрхэгүй болохо юм. 2021 онһоо хойшо барилга гү, али һэльбэн шэнэдхэлгэ хэхэ обьектнүүдэй ЕГРН бүридэлдэ мэдээсэлгүй байгаа һаань, зүбшөөл үгтэхэгүй.
2017 ондо Ородой Холбоото Уласай Үндэһэн хуулиин шиидхэбэриин ёһоор, ойн амнисти тухай хуули абтаа. Тэрэнэй ёһоор, хубиин гү, али ойн жасын газар гү гэһэн асуудалаар арсалдаан шиидхэгдэхэ байгаа. Ехэнхи хүдөө нютагуудта энэ хуулиин ашаар, юрэнхы түсэбүүдые байгуулжа, Росреестрэй бүридэлдэ абтаһан байна. Тиигэбэшье 25 хүдөө нютагта болон Северобайкальск хотодо абтаһан юрэнхы түсэбүүд болюулагдаһан байна. Северобайкальск хотын засаг даргын хэлэһэнэй ёһоор, сэбэрлэлгын түхеэрэлгэнүүдые һэльбэн шэнэдхэхэ газар ойн жасын мэдэлдэ байһанһаа боложо, асуудал шиидхэгдэнэгүй. Иимэ асуудал Буряад Уласай бусад зарим аймагуудта гарана.
Энэ талааар асуудал шиидхээгүй һаа, 2021 ондо барилга хуулита бэшэ болохо гэжэ Буряад Уласай барилгын болон гэр байрын ажахы шэнэдхэлгын сайдай орлогшо Сергей Рыбальченко тэмдэглэбэ. Эдэ асуудалнуудые түргэн шиидхэхэ тухай Петр Мордовской даалгаба.
