​​Буряадай элитэ уран зохёолшо Цыденжаб Жимбиевэй 90 жэлэй ойн баярта зорюулһан дурасхаалай үдэшэ үнгэргэгдэбэ

Буряадай элитэ уран зохёолшо, Буряад Уласай Гүрэнэй шангай лауреат, Россиин, Буряадай, Хальмагай соёлой габьяата хүдэлмэрилэгшэ, ниитэ ажал ябуулагша Цыденжаб Арсаланович Жимбиевэй 90 жэлэй ойн баярта зорюулһан хэмжээ ябуулга Үндэһэтэнэй номой санда үнгэргэгдэһэн байна.

Ивалга нютагай арадай аман зохёолой “Гуламта” ансамбль уран зохёолшын шүлэгүүдээр найруулагдаһан дуунуудые дуулажа, дурасхаалай энэ үдэшэ шэмэглээ. Һургуулиин һурагшад, мэдээжэ дуушад Цыденжаб Арсалановичай шүлэгүүдые сээжээр хэлээ, дуунуудыень дуулаа. Уран зохёолшын мүнхэ дурасхаалай үдэшые Үндэһэтэнэй номой сангай соёл гэгээрэлэй түсэлнүүдэй болон олониитын холбооной таһагай ахамад библиограф Рыгзыма Батомункуева үүсхэлэн үнгэргөө.

Цыденжаб Жимбиев 1928 ондо Шэтэ можын Хёлго аймагай Хүһөөтэ нютагта түрэһэн намтартай. 1948 ондо М. Горькиин нэрэмжэтэ литературна дээдэ һургуулида буряад арадай эгээл түрүүшын түлөөлэгшэ оюутан болоһон байна. 1950 ондо ород хэлэн дээрэ Ц. Жимбиевэй “Богатая нива” гэһэн шүлэгүүдэйнь эгээл түрүүшын согсолбори нара хараһан, буряад хэлэнһээ А. Гевелинг оршуулаа. 1951 ондо Цыденжаб Жимбиев СССР-эй Уран зохёолшодой холбооной гэшүүн болоо. Оройдоол 23 наһатай буряад хүбүүхэн тэрэ үедэ бүхы Зүблэлтэ гүрэнэй олон яһата арадууд соо буряад уран зохёол тухай мэдүүлжэ, бэлигээ харуулжа ябаал даа.

Тэрэнэй бэшэһэн бүтээлнүүд, хамта дээрээ 50 гаран номууд Улаан-Үдэдэ, Шэтэдэ, Москвада, Элһэтэдэ, Кызылдэ болон дүтэ ойрын хари гүрэнүүдээр хэблэгдэһэн. Бэлигтэй уран зохёолшо шүлэг, уртамал зохёол, публицистикэ гээд хэдэн шэглэлээр тэгшэ ажалаа ябуулаа.

Буряад Уласай Үндэһэтэнэй номой сангай мэдээсэлэй албанһаа гэрэл зураг абтаба

Дэлгэрэнгыгээр “Буряад үнэн” сониной ноябриин 28-ай дугаарта уншаха аргатайт