799
Буряад Уласай Арадай Хуралда һунгалта сентябриин 9-дэ болоо һэн гээд һануулая. Түнхэн болон Аха аймагуудһаа аяар гурбан һунгамал томилогдоо гээшэ. Ажаһуугшадые хүлеэн абалгын таһалга аймагай захиргаанай байшанда нээгдэбэ.
Арадай һунгамалнууд һаяхана түрүүшынхиеэ арад зонтой харилсаһан байна. Инна Ивахинова, Николай Дашеев болон Александр Бардунаев гэгшэдтэ нютагаархид олон асуудалнуудтай хандаа.
- Олонхи бэрхэшээлнүүдыень һунгалтын үедэ хадуужа абаһан байнаб. Эдэ бүгэдыень шиидхэхыемнай һунгагшад дурадхаа. Харин мүнөө тэдэн урдахи хандалгаяа һануулаа, - гэжэ Инна Ивахинова мэдүүлнэ.
- Олон бэрхэшээлнүүдые энэ дороо шиидхэхэ гээшэ хүндэшэг юм. Хэды тиигэбэшье аймагай ноёдтой тэдэниие танилсуулжа, шадаал һаа бүри дээшэнь дуулгажа, ажалаа ябуулха һанаан байна, - гэжэ Александр Бардунаев хэлэнэ.
Николай Дашеев уулзалгада ерэһэн бүхы 14 хүнтэй хөөрэлдэһэнэй удаа хүн зон ганса өөрынгөө хубиин асуудал табина бэшэ гэжэ мэдүүлнэ.
- Бүхы ерэһэн зон һууринайнгаа шэг шарай, ажабайдал яагаад һайжаруулхаб гэһэн асуудалнуудые табина. Энэ ехэ һайн тэмдэг гээшэ, - гэжэ Николай Дашеев хэлэнэ.
Ажаһуугшадые хүлеэн абалгын таһалга һунгамалнуудай үгышье байхада хүдэлхэ юм. Арад зон өөрынгөө хандалгануудые эндэ үлөөхэ аргатай. Тэдэнь заал һаа һунгамалнуудта дамжуулагдаха юм.
Авторай гэрэл зураг
Автор: Борис БАЛДАНОВ
