Буряад Уласта барилгада болон үндэһэтэнэй түсэлнүүдые бэелүүлгэдэ 8 миллиард түхэриг һомологдохо гэжэ хараалагданхай. Федеральна бюджетһээ - 6,6 миллиард түхэриг, уласай бюджетһээ 1,4 миллиард түхэриг һомологдохо юм. һомологдоһон мүнгөөр һургуулинууд, хүүгэдэй сэсэрлигүүд, дулаагаар, уһаар хангалгын объектнүүд баригдаха. Тиихэдэ Улаан-Үдэдэ сэбэрлэлгын түхеэрэлгэнүүдэй, хабдарта үбшэнэй диспансерэй барилга үргэлжэлүүлэгдэхэ.
2018 ондо 3,4 миллиард түхэриг һомологдожо, Буряад Уласта олониитын 32 объект баригдаһан байна. Тэрэнэй 2 миллиардһаа дээшэ түхэриг федеральна бюджетһээ һомологдоо. Нэгэ миллиардһаа дээшэ түхэриг «Гэр байра болон хотын оршон», «Экология» гэһэн үндэһэтэнэй түсэлнүүдые бэелүүлгэдэ гаргашалагдаа.