​​Үхибүүдтэ хэрэгтэй урлалай хэшээлнүүд

Арадтаа хэрэгтэй һабяа түйсэнүүд

Урда сагһаа хойшо буряад хүбүүд уран наринаараа суурхадаг. Тиихэдэ уран дархашуулнай бөөнэрһөө бүри дээгүүр тоолог­додог байһан. Уг унгигүй хүн дархан болохо эрхэгүй бэлэй. Дарханай ажал дээрэһээ заяагдадаг бшуу. Тиимэһээ мүнөө сагта угайнгаа заншал сахиһан уран дархашуулнай бүришье ехээр хүндэлэгдэнэ.

Энээниие Буряадаймнай Бол­босоролой болон эрдэм ухаанай яаманай мэргэжэлтэд һайнаар ойлгожо, урагшань ябуулхаяа оролдоһониинь һайшаалтай. Ти­игэжэ ноябриин 6-һаа 9 болотор ажалай хэшээлнүүдэй, уран зу­ралгын багшанарай һуралсал Бу­ряадай гүрэнэй ехэ һургуулиин дэргэдэхи багшанарай мэргэ­жэл дээшэлүүлдэг һургуулида үнгэрбэ.

Эдэ һуралсалнуудта ма­най сурбалжалагша оролсожо һонирхоо. Тиигэжэ үйһөөр хэгдэ­хэ уран зүйлнүүд болон агаара­ар үлеэжэ хэдэг нааданхайнууд һонирхолыень гансата татаа.

Уласхоорондын урилдаанай лауреат Хориин Тохорюугтын һургуулиин багша Согто Даше­ев мастер-класс харуулхадаа, үйһөөр мүнөө сагта хэрэгтэй амһартануудые яажа бүтээхэб гэжэ харуулаа. Тиихэдээ нэгэ хэ­шээлдээ хооробуудые болон эл­дэб үнгын амһартануудые яажа үйһөөр гүрэжэ бүтээхэб гэжэ за­агаа. Баһал иимэ хэшээлнүүдтэ Сэлэнгын багша Ирина Галдано­ва нааданхайнуудые яажа долоон янзын гүрэлгөөр бүтээхэб гэжэ ойлгуулаа.

Баргажанай Эдиршүүлэй түбэй багша Екатерина Иванова “Аэродизайн” – үлеэгдэһэн шаарнууда­ар элдэбын зүйлнүүдые урлалга ехэ һониноор үнгэргэжэ, олониие гайхуулаа.

Баргажанай дунда һургуулиин багша Андрей Дондупов буряад арадай наадануудые дэлгэрүүлдэг гэжэ нютагтаа мэдээжэ юм. Тэрэ һургуулидаа һээр шаалга, та­шуур таталга, тэбгэ сохилго бо­лон шагай нааданиие хүгжөөжэ, эдэ наадануудаар саг үргэлжэ мүрысөөнүүдые үнгэргэжэ бай­даг. Андрей Ракшаевич анха түрүүн Бандида хамба лама Дамба Аюшеевые залажа, Янжама Бур­ханай дүрэ харуулһан габьяатай, буянтай, бурхантай хүн гээшэ. Энэ семинарта бэрхэ багша модон һэрбээ урданайхяар бүтээхые ха­руулжа, заажа үгөө.

Морин эрдэниеэ магтаһан монгол урашуул

Һуралсалай үедэ элдэбын зүйлнүүдээр бүтээгдэһэн урлал­нууд үзэмжэдэ дэлгээгдэжэ, оло­ной һонирхол татаа. Иигэжэ хэдэн хоногто ажалай хэшээлнүүдые үнгэргэдэг багшанар һуралсал гарахаһаа гадуур, бэе бэеын­гээ ажалнуудтай танилсажа, сэгнэшэгүй дүй дүршэлнүүдээрээ хубаалдажа, ехэ баяртайнууд һургуулинуудтаа бусаба.

Нэгэ үедэ ажалай хэшээлнүүд хүндэгүй боложо байһанаа, һүүлэй үедэ үри үхибүүдые ажа­лаар хүмүүжүүлхэ шухала гэжэ гүрэн түрэмнай одоол ойлгохо бо­лоол даа. Тиихэдэ ажалай багша­нар миил ажалда дүршүүлхэ бэшэ, харин уран наринаар ажабайдал­да хэрэгтэй бүтээлнүүдые урла­жа байхыень һургажа байһаниинь ехэ дэмбэрэлтэй.

Иимэ олондо хэрэгтэй хэшээлнүүдые ганса ниислэл хотодо бэшэ, аймагуудаар саг үргэлжэ үнгэргэжэ байбал, бүри ехэ үрэ дүнтэй байха һэн гэжэ холо ойроһоо ерэһэн багшанар Буряад Уласай Болбосоролой яаманда, Буряадай гүрэнэй ехэ һургуулиин багшанарай дээдэ һургуулиин (ПИ БГУ) шэнжэлэгшэ багшана­рай нэгэдэлдэ хандана.