Дуу, хатарай «Байгал» театрай гол дуушан Цыпилма Аюшеева буряад соёл урлагаймнай ёһотой шэмэг болонхой. Ехэ-ехэ тоглолтонууд тэрэнэй хабаадалгагүйгөөр үнгэрдэггүй гэхэдэ болоно. Олоной “одон” болоһон мэдээжэ дуушантай хөөрэлдөө уншагшадтаа дурадхахамнай.
- Хурамхаанда үндыгөөт гэжэ мэдэнэбди. Тиихэдээ дууладаг байгаа гүт? Багшатнай хэн бэ?
- Хурамхаанай интернат-һургуулида долоотойһоо һураһамби. Тэрэ сагаа һанахадам, сэдьхэлдэм ехэ дулаан болодог. 5-дахи ангиһаа хүүгэдэй оркестртэ ябажа, мандалин дээрэ наадажа һурааб. Гадна хоорто дуулажа эхилээб. Манай багша Анна Ешеевна Сапхандаева мүнөөшье хүрэтэр нюдэндэмни харагдаһан мэтэ байдаг. Багшымнай дирижировэлжэ байһаниинь багахан намайе ехэтэ хүлгөөгөө бшуу. 10-дахиин ябахадам, манай аймаг руу хотоһоо комисси ерээ. Дуунай мүрысөөндэ үхибүүдые шэлэжэ ябаһан байгаа. Гансал намай илгажа абаһан юм.
- Мүрысөөндэ ямар дуу дуулаабта?
- Тиихэдэ Совет үеын эстрадада дуратай байгааб. София Ротару, Роза Рымбаева гэгшэд клуб соохи ори гансахан сэнхир экранһаамнай таһалгаряагүйгөөр дуулалдадаг бэлэй. Гэбэшье тэрэ мүрысөөндэ буряад дуугаа гүйсэдхөө һэм.
Тоо бодолгоор тон һайн сэгнэлтэ абажа, багшанарай дээдэ һургуулиин тоо бодолгын таһагта орохоёо бэлдэжэ байһамби. Шалгалтаяа тушаагаад лэ, баяр ёһололой найрташье байнгүйгөөр дуунай мүрысөөндэ хабаадахаяа Улаан-Үдэ самолёдоор ниидэжэ ерээб. Жюриин түрүүлэгшэ Вячеслав Баяндаевич Елбаев мүрысөөнэй һүүлээр намда дүтэлөөд, хүгжэмэй училищиин дуунай таһагта оро гэжэ дурадхаа бэлэй.
Би тиихэдэ ехэ бодолгото болоо һэм. Нэгэ талаһаа дээдэ һургуулида орохо арга байгаа, харин нүгөө талаһаа буряад дуунай түрүү багшанарта заалгаха талаан тудаа. Марга-маргаһаар хүгжэмэй училищида һураха һаналаа бэелүүлбэб. Нагаса эгэшэм энэ бодолыемни ехэтэ буруушаагаа бэлэй.
- Хүгжэмэй училищида ядалдаагүй юм бэзэт?
- Хүгжэмэй училищида Ксения Игнатьевна Пальнуевагай шаби боложо орооб. Нэгэдэхи курсые мэдэрэншьегүй шахуу һуража гарааб. Түрүүшын жэлэй дүнгүүдээр хахад зонииемнай гэртэнь ябуулаа. Харин би шалгалтаяа бараг тушаажа шадааб. Манай тэнхимые даагша РСФСР-эй арадай зүжэгшэн Надежда Казаковна Петрова дуулахыемни шагнаад, эрхим ябанаш гээд, «3+» табиһан юм. Энэ табиһан сэгнэлтэнь бүхэли зундаа ухаанһаам гарахаяа болёо. Ямар һонин сэгнэлтэ гээшэб гэжэ ходо бодожо ябааб. Али тэрэ тоо бодолгын һургуулида орохо байгаа юм гүб гэһэн һэжэг түрөө.
Намартаа һургуулияа бусабаб. Тиихэдээ юу хэхэ, яаха хэрэгтэйгээ бага сага ойлгодог болонхой ерэбэб. Тиихэдэ зосоомни үшөө эрид шиидхэбэри үгыл һэн. Үбэлэй эхин болотор үнөөхил маргаһан хэбээрээ һэм. Тэрэ үеэр Монголой дуушад Улаан-Үдэ наада табихаяа ерээ. Тэдэнэй тоодо Монголой арадай зүжэгшэн, ехэ дуушан Уртнасан Хорлачин “Чио Чио Сан” спектакльда үйлэ дуу гүйсэдхөө. Тэрэ наада хараад, зосоомни наран гараһан мэтэ болошоо. Ямар ирагуу һайханаар дуулаа гээшэб. Монголшуудай табиһан бүхы тоглолто ябажа харааб. Тэрэнэй һүүлээр зосоомни һэргэжэ, энэл мэргэжэлээр һуража, ами наһанайнгаа харгыгаар дуушанай замаар алхалхаб гэжэ лаб мэдэрээб. Хоёрдохи ангияа “5” гэһэн сэгнэлтэтэйгээр эрхим бэрхээр дүүргэбэб.
Хүгжэмэй училищида дээдэ һургуулида адляар 4 жэл һуража гарааб. Дуун гээшэ минии һанахада, ехэл эрдэм болоно. Дуушаниие бэлдэхын тулада өөрөө ехэ бэлиг талаантай байха хэрэгтэй. Энэ эрдэмдэ һургаһан багшанартаа баяраа мэдүүлнэб.
- Мэргэжэлэйтнай һайн ба муу таланууд ямар бэ?
- Шагнагшадтаа дуунай бүхы һайниие дамжуулхаяа бидэ бүхыгөөрөө оролдонобди. Шархатаһан зүрхэ эдэгээхэ, гашуудалда ороһониие абарха хүсэтэйгөө дуушан мэдэрнэ.
Манай ажабайдал ехэ хүндэ гэхэдэ, алдуу болохогүй. Дуунай ба хатарай ажалые һэбхи бэлэн гэжэ заримашуул һанадаг. Тэрэ хадаа тон буруу. Ехэ зоригтой зон манай мэргэжэл шэлэдэг. Зүбөөр хэлэбэл, энэмнай хадаа ганса ажал бэшэ - сэдьхэлэй байдал, амин голой сохисо мүн.
Дандар Жапович – бидэндээ ёһотой жэшээ болоно. Юунэйшье болобол, энэ хүмнай манаа дахуулаад, зориһон хэрэгтээ хүргэдэг юм. Шахардуу байдалда “Угайм Сүлдэ” гэһэн ехэ бүтээл табиһамнай, “Байгал” театраа бүтэн бүлеэн үлээхэ, саашань хүгжөөхэ хэрэгтэ ехэ түлхисэ үгөө. Мүнөө манай театр өөрын байшантайл болоһой.
- Зохёохы ажалдатнай туршалганууд олон байгаа гү?
- Ажабайдалай элдэб хубилалтануудта дуратай байдагби. Нэгэтэ англи хэлээр дуулаха хэрэг гараа һэн. Арадуудай нэгэдэлэй үдэртэ грузин хэлэн дээрэшье дуулаха болоо һэм. Эдэ туршалгануудые эрхимээр дабажа гарааб.
- Дуратай кино, номууд, амтан эдеэн бии аабза?
- Һүүлэй үедэ телевизор харахаяа болинхойб. Тиибэшье ажабайдал тухай кино хараха дуратайб. Амтан эдеэ буйлуулха баһал дуратайб. Сергей Эрдынеевич нүхэрни чешскэ торт барииш даа гэжэ ходо захидаг. Тэрэнээ элдэб жэмэсээр гоёохо дуратайб.
- Ямар юумэ наһандаа хээгүйбта?
- Авто-унаа жолоодохо гээд айдагби. Мүнөөнэй эхэнэрнүүд яһала шадамараар жолоо барина, харин би ябагаар ябаһан зандааб.
- Сүлөө сагаа яагаад үнгэргэдэг?
- Би зорюута амархаяа ошодоггүйб. Магад, энэ буруу байжа болоо. Анхандаа Хурамхаан нютагаа ошоходомни, эжымни урданай дуунуудые намдаа дууладаг байгаа. Мүнөө эжынгээ дуулаһан дуунуудые би өөрөө тайзан дээрэһээ дууладагби.
- Та жаргалтай гүт?
- Жаргалтайб! Наһанайм нүхэр Сергей Эрдынеевич минии найдамтай түшэг тулгуури юм. Нүхэрни ехэ нимгэн дотортой хүн. Бидэ хоюулаа бүхы юумэндэ уран һайханиие оложо харадагбди. Би дуушамби, хоёр хүбүүдэй эжышьеб, хүгшэн эжышьеб, барилгашье хэдэгби. Гэр дотороо арюун сэбэр байлгахаяа оролдодогби. Нарин нягта зондо ехэ дуратайб. Үхибүүдтээшье нарин байгты гэжэ хэлэдэгби. Гадна ажалдаа дуратайгаар ябагты, миин хооһоор үдэрөө бү үнгэргэгты гэжэ заадагби. Хүн гээшэ ажалайнгаа ашаар хүнгэн солбон, хүхюун задарюун ябана ха юм.
Эржена ЛАМУЕВА