906
Буряад уласта «Эхэнэрнүүдые ажалаар хангалгада туһа хүргэлгэ» гэһэн федеральна программа бэелүүлэгдэжэ, гурба наһа хүрөөгүй үхибүүдтэй эжынэртэ шэнэ мэргэжэлтэй болохо, мэргэжэлээ дээшэлүүлхэ талаар туһа хүргэхэ юм. Тус түсэлэй хэмжээндэ жэл хахадтайһаа гурба наһатай болотор үхибүүдэй ябаха «бага сэсэрлигүүдые» байгуулха программа бэелүүлэгдэхэ. Тиимэһээ 2019 ондо федеральна болон уласай хэмжээндэ хуули-эрхын дасануудые бэлдэхэ хэрэгтэй. Гурба наһа хүрэтэр үхибүүдые хараха, хүмүүжүүлхэ бүлэгүүдые байгуулхын түлөө тэдхэмжэдэ можо нютагууд 2020 ондо хүртэхэ юм.
- 2020 онһоо хойшо холо оршодог нютагуудта болбосоролой бага сэсэрлигүүдые нээлгэдэ мүнгэ һомолхобди. Сэсэрлигтэ хэрэгтэй тоног хэрэгсэлнүүдые худалдан абаха талаар грантнууд һомологдохо. Тиихэдэ хүүгэдые хүмүүжүүлхэ, хараха хүдэлмэрилэгшэдые һургаха хэрэгтэ мүнгэн һомологдохо, - гэжэ Ородой Холбоото Уласай ажалай болон ниигэмэй хамгаалгын сайд Максим Топилин зүблөөндэ хэлэбэ.
Буряад Уласай болбосоролой болон эрдэм ухаанай яаман нарай хүүгэдтэеэ амаралтада байһан эхэнэрнүүдэй дунда бага сэсэрлигүүдые байгуулха гэһэн дурадхалаар асуулта үнгэргэһэн байна. Эжынэрэй 90 хубинь энээниие дэмжэбэ. Жэл хахадтайһаа гурба наһа хүрэтэр үхибүүдые хараха, хүмүүжүүлхэ бүлэгүүдые байгуулжа, грантда хүртэхэ арга тухай асуудалда эжынэрэй 95 хубинь дэмжэбэ. Буряад Уласай болбосоролой болон эрдэм ухаанай яаман энэ түсэл улас дотор бэелүүлхэ талаар ажал ябуулха юм.
2020-2024 онуудта Ородой Холбоото Улас дотор түсэлэй хэмжээндэ хүүгэдые хараха, хүмүүжүүлхэ 9 мянган тухай бүлэгүүдые байгуулхаар түсэблэгдэнэ.
