НТВ субагта үнгэргэгдэдэг «Ты супер!» гэһэн түсэлэй түрүүшын мүрысөөндэ Буряад Уласай Кристина Эрдыниева, 2-дохи хаһада Василина Понамарева хабаадаһан байна гэжэ һануулнабди.
Байгша ондо үхибүүдые үргэһэн гэр бүлэнүүдтэ туһа хүргэдэг албанай мэргэжэлтэд «Ты супер!» гэһэн түсэлдэ Дмитрий Каргин хабаадаха гэжэ мэдүүлгэ оруулаа. Дима хүбүүн хадаа 9 үхибүүдэй нэгэн болоно. Талаантай хүбүүн үнгэрһэн жэлдэ «Наранай туяа – Лучики солнца» гэһэн дуунай мүрысөөндэ аймагтаа түрүүлжэ, уласай урилдаанда аймагаа түлөөлһэн юм.
Тиихэдэ Буряад уласта үргэжэ абтаһан үхибүүд Бүхэроссиин «Мои крылья» гэһэн бэлиг талаантай эдиршүүл болон залуушуулай мүрысөөндэ хабаададаг юм. Энэ хадаа «Солнечный город» гэһэн хүүгэдэй буян үйлэдэлгын жасын шэнэ түсэл болоно. Энэ урилдаанай хоёрдохи шатада «Ты супер» гэһэн мүрысөөндэ түгэсхэлэй шатада хабаадаһан Василина Понамарева болон «Сагаалганай мүшэхэн» гэһэн уласай фестивалиин I шатын дипломант, аймагай «Эрхим һурагша – 2018» мүрысөөнэй II шатын дипломант Николай Орешков хоёр оробод. Хоёрдохи шатын мүрысөөнэй дүнгүүдээр, мэргэжэлтэ шүүбэришэд эрхим 100 ажал элирүүлжэ, эдэ ажалнуудые бүтээһэн үхибүүд түгэсхэлэй шатада уригдаха юм. Үхибүүд 1 сая түхэригэй грантда хүртэхын түлөө мүрысэхэ. Николай Орешковой ажалнуудтай Вконтакте сүлжээндэ «Мои крылья»: борись за свой первый миллион» гэһэн бүлгэмдэ танилсаха аргатайт.