733
Буряад Уласта «ЭкоАльянс» бүлгэм бог шорой усадхаха, суглуулха гэжэ 2018 оной февраль һарада мүрысөөнэй дүнгүүдээр эли болоо һэн гэжэ һануулнабди. Теэд һаяхана Москва хотодо үнгэргэгдэһэн «Ниитэ нэгэн Росси» намай XVIII съезд дээрэ Буряад Уласай Толгойлогшо Алексей Цыденов энэ бүлгэм хэлсээ болюулха тухай бэшэг эльгээгээ гэжэ мэдээсэһэн байна.
2019 оной январь һараһаа бог шорой усадхаха, суглуулха талаар «ЭкоАльянс» бүлгэм ажалаа эхилхэ ёһотой. Энэ талаар тохёолдоһон байдал тухай Буряад Уласай байгаалиин нөөсэнүүдэй сайд Вадим Кантор хэлэбэ.
- «ЭкоАльянс» бүлгэм хэлсээ болюулха түсэбгүй. Бог шоройн асуудал яажа шиидхэхэб гэһэн хэдэн дурадхал тус бүлгэм оруулаад байна. Эдэ дурадхалнуудыень хэлсэнэбди. Уласай хүтэлбэрилэгшын хэлэһээр, январиин 1-һээ уласнай бог шоройдо дарагдаха ёһогүй. Тон зохихо шиидхэбэринүүд энэ асуудалаар абтаха. Дурадхалнуудынь хаража үзөөд, хэлсээ болюулха тухай шиидхэбэри абтажа магадгүй, - гэжэ Вадим Кантор тодорхойлбо.
Байгаалиин нөөсэнүүдэй сайдай хэлэһээр, Буряад Уласай Засагай газарта бог шоройн асуудалай талаар онсо байдал соносхогдожо болохо. Тиигэбэшье гүрэнэймнай можо нютагуудта иимэ байдал баһал тохёолдонхой.
- Мүрысөө, худалдаа соносхонгүй, бог шорой усадхаха, суглуулха бүлгэмтэй жэлэй туршада хэлсээ баталха тухай хуулиин түсэлдэ хубилалтануудые оруулха талаар ажал ябуулагдана. Энэ хуулиин түсэлөөр Гүрэнэй Дүүмэдэ шиидхэбэри абтаха, - гэжэ сайд тобшолбо.
Хэлсээ болюулха тухай бэшэг эльгээхэдээ, «ЭкоАльянс» бүлгэм хотын засаг зургаантай хэлээ ойлгосолдоогүй байжа болоо гэжэ Вадим Кантор багсаамжална.
Бог шорой суглуулха, шэрэхэ талаар «ЭкоАльянс» бүлгэмэй мүрысөө үнгэргэхэдэ, энэ һалбарида хүдэлдэг уласай түлөөлэгшэд хабаадаагүй. Тиимэһээ аукциондо оройдоол хоёр эмхи хабаадажа, хотын хоёр хороодо бог шорой суглуулха, шэрэхэ болоһон байна. Буряадай ниислэл хотын гурбадахи хороодо асуудал шиидхэгдээгүй.
- Тиихэдэ ехэнхи аймагуудта бог шорой шэрэгшэдэй талаар асуудал шиидхэгдээгүй. Тиимэһээ «ЭкоАльянс» бүлгэм хэлсээ болюулха тухай мэдүүлгэ оруулһан байна. Энэ талаар тохёолдоһон байдалаар Буряадай Толгойлогшодо долоон хоног бүридэ дуулганабди, зүблөөнүүд үнгэргэгдэнэ, - гэжэ Вадим Кантор нэмэбэ.
Тэрэшэлэн «ЭкоАльянс» бүлгэм хотын засаг зургаантай үшөө нэгэ асуудал шиидхээгүй байна.
- «ЭкоАльянс» бүлгэмдэ хотын засаг зургаан бог шорой илгадаг станцинуудые дамжуулха талаар асуудал гараһан байна. Эдэ станцинуудые «ЭкоАльянс» бүлгэм уридшалан абажа, түсэблэһэнэй ёһоор, ажалаа ябуулха зорилготой байгаа. Асуудал шиидхэхэ талаар тус бүлгэмэй хүтэлбэрилэгшэд нэгэнтэ бэшэ Засагай газарта хандаа, мэдүүлгэнүүдые оруулаа. Энэ мэдүүлгээр хотын захиргаанда ажалаа эршэдүүлхэ талаар даалгаһан байнабди. Мүнөөшье болотор энэ асуудал шиидхэгдээгүй, - гэжэ байгаалиин нөөсэнүүдэй сайд тэмдэглэбэ.
Бог шорой шэрэдэг уласай эмхинүүдтэй тохёолдоһон байдал тухай «ЭкоАльянс» бүлгэмэй юрэнхы захирал Игорь Алексеев иигэжэ хэлэбэ:
- Бог шорой усадхаха, суглуулха мүрысөөндэ хабаадахадаа, уласай зарим дэбисхэрһээ бог шорой шэрэгшэдые аукционой ашаар элирүүлхэбди гэжэ ойлгожо байгаабди. Улаан-Үдэ хотын гурбан хороодо бог шорой шэрэгшэдые элирүүлхэ мүрысөөндэ хотын засаг зургаан эндэ хабаадаагүй.
Тиимэһээ мүрысөөндэ хоёр лэ эмхи хабаадаа, нэгэниинь – федеральна, нүгөөдэнь – Эрхүүгэй юм.
- Улаан-Үдын хоёр хороодо бог шорой шэрэхэ эмхинүүд элирээ, гурбадахи хороодо хэншье хабаадаагүй, - гэжэ Игорь Алексеев тэмдэглэбэ.
Гэбэшье январиин 1-һээ ажалаа эхилхэ түсэбтэйбди гэжэ «ЭкоАльянс» бүлгэмэй юрэнхы захирал дуулгаба.
Анна Огороднигой гэрэл зураг
