Буряадай Толгойлогшо декабриин 8-да Москва хотодо үнгэрһэн Бүхэроссиин “Ниитэ нэгэн Росси” намай XVII съездын үедэ тус намай Дээдэ зүблэлэй бүридэлдэ оруулагдаа. Урид Алексей Цыденов Генеральна зүблэлдэнь ородог байһан гэжэ һануулая.
Съезд “Крокус Экспо” гэһэн уласхоорондын үзэсхэлэнэй түбтэ эмхидхэгдээ. Можо нютаг бүхэнэй түлөөлэгшэд ерэхэ жэлдэ намай хүдэлмэриин шухала зорилгонуудые болон түрүү шэглэлнүүдые тодорхойлоо. Гадна Дээдэ ба Генеральна зүблэлнүүдэй гэшүүд һэлгэгдээ, доторой дүрим хубилгагдаа.
Съездын хоёрдохи үдэртэ пленарна зүблөөн дээрэ Ородой Холбоото Уласай Засагай газарай Түрүүлэгшэ, “Ниитэ нэгэн Росси” намай Түрүүлэгшэ Дмитрий Медведев һаяын хугасаагай зорилгонууд тухай элидхэл хээ.
Ородой Холбоото Уласай Юрэнхылэгшэ Владимир Путинай онсолһоор, һунгагшадайнгаа этигэл найдалыень дахяад эзэлхэ хэрэгтэй. Хүн зонтой сэхэ харилсаха хэрэгтэй, гоёор хөөрэнгүй, хооһоор найдуулангүй, ажал хэрэгтээ тон харюусалгатайгаар хандаха шухала гэжэ 2018 оной Юрэнхылэгшын һунгалта харуулаа.
- Намай түлөөлэгшэдэй нэрэ хүндэ хадаа ехэ шухала. Тэрэниие мүнгөөр абахагүйш, гансал үнэн сэхэ ажалаар, хүн зондо анхаралтай хандасаар, бэрхэшээлнүүдыень шиидхэхэ оролдолгоор, үнэн сэхые хамгаалан сахиха хүсэлөөр олдодог юм. Мүнөө намай шэнэлэгдэжэ байһаниинь һайшаалтай. Шэнэ бэрхэ хүнүүд ерэнэ. Тиигэжэ “Ниитэ нэгэн Росси” нам хүсэтэй болохо, олониитын этигэл найдал бэхижэхэ байха, - гэжэ гүрэнэймнай толгойлогшо хэлээ.
Доторой дүримэй ёһоор, намай Дээдэ зүблэл 63 хүнһөө бүридэһэн мүртөө холын хараата түсэбүүдые тодорхойлдог, намай нэрэ хүндэ дээшэлүүлгэ дээрэ хүдэлдэг юм. Гүрэн түрын бодолгын ба олониитын элитэ ажал ябуулагшад зүблэлдэ ородог.
Генеральна зүблэлэй бүрин эрхэнүүдые нэрлэбэл, олониитын-гүрэн түрын бодолгын шухала асуудалнуудаар шиидхэбэринүүдые абадаг, намай гүйсэдхэхы хорооной толгойлогшые томилдог ба тушаалһаань сүлөөлдэг, засаг зургаантай болон нютагай өөһэдын хүтэлбэритэй харилсаа холбоо хангадаг. Бүридэлынь – 150 хүн.
Толгойлогшо Алексей Цыденов, “Ниитэ нэгэн Росси” намай Буряадай таһагай секретарь Баир Жамбалов, можо нютагай гүйсэдхэхы хорооной хүтэлбэрилэгшэ Владимир Ведерников гэгшэд съезд дээрэ Буряад Уласые түлөөлөө.
Энэ съезддэ “Ниитэ нэгэн Росси” намай 85 можо нютагай таһагуудай 3500 гаран түлөөлэгшэд болон айлшад хабаадаа. Съездын хэмжээндэ намай түсэлнүүдэй үзэсхэлэн дэлгэгдээ, олон тоото асуудалнуудаар һанамжануудаараа андалдалгын талмайнууд хүдэлөө. Мүн тиихэдэ “Лидеры России” урилдаанай болон “Политстартап” программын илагшадта намай үнэмшэлгэнүүд барюулагдаһан байна.
Kremlin.ru сайтһаа гэрэл зураг абтаба