Түрэл хэлэндээ эльгэтэй түрүү хүнүүдээ үргэе

Иимэ дурадхал “Буряадай түрүү хүнүүд” гэһэн заншалта XXII урилдаанаймнай илагшадые хүндэлэлгын баяр ёһололой үедэ Буряадай Толгойлогшын ба Засагай газарай Захиргаанай Хүтэлбэрилэгшын орлогшо Виктор Аюшеев оруулаа. Үнэхөөрөөшье, иимэ номинаци үнинэй соносхогдохо ёһотой аад, мартагдаад байгаа. Түрэл һайхан буряад хэлэеэ дэмжэдэг, сахин хүгжөөдэг, дэлгэрүүлдэг, идхадаг, хэрэгтэй һаань, аршалдагшье зон манай дунда олон ха юм даа. Тэдэнэйнгээ соло дуудаха саг одоол тулажа ерэнхэй.

- Манай дунда омогорхол түрүүлмэ, жэшээ боломо хүнүүд олон. Даша Намдаков – дэлхэйдэ мэдээжэ уран барималша. Этигэл Хамбадамнай хаана холоһоо хүнүүд мүргэхэеэ ерэнэ. Зүгөөр түрэл хэлэеэ мартажа байһамнай ехэ муу. Тиимэһээ “Буряадай түрүү хүнүүд” гэһэн урилдаандаа түрэл хэлэндээ хабаатай шэнэ номинаци хэбэлтнай, минии һанахада, ехэ һайн байха һэн, - гэжэ Виктор Васильевич баяр ёһололой эхин дээрэ “Буряад үнэн” Хэблэлэй байшанай шэнэ захирал Баир Шираповта хандаа.

“Буряад үнэн” Хэблэлэй байшанай захирал Баир Ширапов 22 жэлэй саана иимэ һайхан үйлэ хэрэг эхилһэн Ардан Лопсонович Ангархаевта баярые хүргөөд, эдэ жэлнүүдтэ сониндомнай хүдэлһэн, мүнөө хүдэлжэ байһан зондо үреэлэй һайхан үгэнүүдые зорюулаад, шагналгын баяр ёһолол нээгээ.

Түрүүшын туршалга – Интернет-һанал хуряалга

Интернет-һанал хуряалгада онсо илгаржа гараһан хүн - Эрхүү можын Усть-Ордын дасанай шэрээтэ Зоригто лама Батуев. “Зориг ехэтэй Зоригто лама” гэжэ Серафима Балданова, авторынь, тон зүб нэрлээ. Юуб гэбэл, Усть-Ордын дасан һэргээхэ, хүгжөөхэ хэрэгтэ горитой хубитаяа оруулхаһаа гадна буряад хэлэеэ сахин хамгаалдаг юм. Эгээл тиимэһээ Зоригто лама Эрхүү можын Олониитын палатын гэшүүн болонхой.

Буряадай түрүү хүнүүдтэ – алдар соло!

Илагшадай тоодо ороһон 31 хүнэй бэелүүлһэн ажал хэрэгүүдыень хаража үзэхэдэ, үнэхөөрөөшье, бултанда, илангаяа залуушуулда жэшээ боломоор эрхимэй эрхим хүнүүд. Жэшээнь, Эсэгэ ороноо хамгаалгын Агууехэ дайнай ветеран, аяар 94 наһатай Ислам Файзутдинович Фатыков “Сагаан үбгэн” номинацида лауреадай нэрэ зэргэдэ хүртөө. Энэ хүмнай үбэлэй ута харгыһаа зүрхэсэнгүй, Хэжэнгын Могсохон нютагһаа хүрэжэ ерээ. Одоол хэнһээшье дээрэ.

Улаан-Үдэ хотын 32-дохи һургуулиин захирал, Улаан-Үдэ хотын Зүблэлэй һунгамал Татьяна Геннадьевна Митрофанова “Гуа сэсэн хатан” номинацида лауреат боложо тодороо. “Һургуулиин эрхим захирал” гэһэн бүхэроссиин урилдаанда “Директор-наставник” номинацида шалгарһан, хүтэлбэрилжэ байһан һургуулияа гүрэнэйнгөө эрхим һургуулинуудай тоодо оруулжа шадаһан хүн гээшэ. Зүгөөр шухалань гэхэдэ, буряад хэлыемнай дэмжэдэг юм.

Мухар-Шэбэр аймагай Баясхалан лама Бальжинимаев “Буян хэшэг” номинацида шалгараа. Габьяань гэхэдэ, Баян-Харын үбэртэ арбаад жэлэй саана үмсын ажахы байгуулаад, өөрын хүсөөр дасан бодхоохо гэһэн хүсэлөө байгша ондо бэелүүлжэ шадаа. Олохон жэлэй туршада зоной түлөө оролдожо, һанаһандаа хүрэхэ, һарбайһанаа абаха шадалтай энэ хүниие тэмдэглэнгүй байхын аргагүй.

Тиихэдэ дээдын гарай эмшэн-хирург, Хори аймагай хүндэтэ эрхэтэн Гатаб Сангажапович Самбатовые тэмдэглэнгүй алад гарахын аргагүй. 40-өөд жэлэй туршада гурбан үе зониие үбшэнһөө абаржа байна ха юм.

Ярууна аймагай “Үльдэргэ” ажахын ахамад адуушан Солбон Эрдынеевич Цыденжапов “Баатар мэргэн” номинацида шалгараа. Ажалайнгаа намтар нютагайнгаа ажахыда хэжэ байһан Солбон ахатанай ашаар амжалтанууд туйлагдана. Илангаяа мянгаад адуутай ажахы Үльдэргэдэл байна бшуу.

Тиихэдэ урилдаанаймнай эгээл залуу хабаадагша, Ага тойрогой түлөөлэгшэ, 11-дэхи ангиин һурагша Бэлигма Цырендоржиевае онсолон тэмдэглэе. Бэлигма – ёһотой “Наран Гоохон”. Һургуулияа алтан медаляар дүүргэхэеэ байһан басаган энэ жэл хатараар Россиин чемпион боложо, ерэхэ жэлдэ Бразилида үнгэрхэ дэлхэйн чемпионадта хабаадаха эрхэдэ хүртэнхэй. Амжалта хүсэнэбди.