​​Шэмэг хубсаһаараа Шэнэхээн буряад шалгараа

Декабриин 16-да Москва хотын Засагай газарай ехэ танхим соо Евра­зиин үндэһэн хубсаһанай «Этно-Эрато» урилдаанай лауреадууд болон дипло­мантнуудай түгэсхэлэй то­глолто үнгэргэгдөө. “Хойто Зүгэй, Сибириин болон Алас Дурна зүгэй арадуудай эр­хим хубсаһан” гэһэн номина­цида Шэнэхээн нютаг зоной бүлгэмэй дурадхаһан буряад хубсаһан шалгараа.

18-дахияа үнгэргэгдэһэн энэ мэдээжэ урилдаанда Россиин 50 гаран можо нютагай болон хари гүрэнүүдэй модельернүүд хаба­адаа. Хэмжээ ябуулгые Москва­гай үндэһэ яһатануудай байшан, “ЕврАзиин эхэнэрнүүдэй ху­ралдаан” бүлгэм Москва хотын Үндэһэтэнэй бодолгын ба можо­нууд хоорондын холбоонуудай департаментын дэмжэлгээр эм­хидхээ юм. Мүн Евразиин араду­удай ассамблей түрүүшынхиеэ энэ урилдааниие дэмжээ.

Хэмжээ ябуулгын онсо ил­гаа гэхэдэ, эндэ мэргэжэлтэ модельернүүд хабаадажа, най­ман шэглэлээр бэлиг шадабари­яа харуулдаг юм.

- Манай урилдаанда гүрэнэймнай тон холын булангуудһаа, хари газарнуудһаашье хүнүүд ерэдэг. Арадуудаймнай хубсаһанай гоё һайханиинь гүрэнэймнай гоё һайханиие харуулна, - гэжэ Москва хотын Үндэһэтэнэй бодолгын ба мо­жонууд хоорондын холбоону­удай департаментын хүтэлбэрилэгшэ Виталий Сучков тэмдэглээ.

Буряад орониие Шэнэхээнһээ гарбалтай уран гартан түлөөлөө. Хэдэн арбаад жэлдэ ажаһуужа байһан Буряад Уласай туг доро хабаадахада, ехэ харюусалгатай гэжэ тэдэ онсолно һэн.

“Этно-Эрато” фестивали­ин шүүгшэдтэ имагтал буря­ад дэгэл оёхо урданай заншал һайшаагдаа. Тиигэжэ “Үбэлэй хубсаһан” номинацида нютагаархиднай I шатын дипломдо хүртөө, “Зунай хубсаһан” номи­нацида 2-дохи һуури эзэлээ.

Урилдаанһаа гадуур эмхидхэгдэһэн арадай дуунай мүрысөөндэ мэдээжэ буряад дуушан Согтын Дашимын эсэгэ Согтын Дабаа шалгараа.