​​«Амар сайн» театрай шэнэ зүжэг

2019 он - Россида Театрай жэл гээд соносхогдон­хой. Гүрэнэй үндэhэтэнэй дуу, хатарай «Амар сайн» театр шэнэ зүжэг-наада бэлдэжэ, олониитэ харагшадтаа декабриин 12-то дурадхаба.

Соёл ба уралигай талаар Оро­дой Холбоото Уласай Засагай га­зарай шангай лауреат, Ородой Холбоото Уласай соёлой габья­ата хүдэлмэрилэгшэ, ВСАКИ-ин хүндэтэ профессор Дулмажаб Жамсоевагай ударидалга доро энэ ехэ хэмжээнэй ажал ябуулаг­даа.

«Театры малых городов» фе­деральна түсэлэй ёhоор, «Нии­тэ нэгэ Росси» намай дэмжэл­тээр «Ага минии - алтан үлгы» гэhэн ниитэ гаршагтай зүжэг-нааданда «Амар сайн» театрай бүхы зүжэгшэд бултааран ха­баадажа, олондо hонирхолтой ба гүнзэгы удха шанартай, үндэhэн буряад хэлэн дээрэ зо­хёон найруулhан зүжэг Агын буряадуудай түүхэдэ үндэhэлэн табигдаа.

«Олон үйлэнүүдhээ бүридэhэн зүжэг табихын түлөө ар­хивай нилээд олон түүхэтэ дансанууд шэнжэлэгдээ, «Ал­тан жаса» бүлгэмэйхидөөр, Агынгаа дасанай санаартанаар болон нютагайнгаа мэдээжэ хүгжэм найруулагшадтай ба ирагуу найрагшадтай уулзал­га, хөөрэлдөөнүүд нэгэтэ бэшэ эмхидхэгдэhэн байна», - гээд, тус түсэл зохёогшо Дулмажаб Дашицыреновна тэмдэглэнэ.

Буряад арадайнгаа түүхэ hайн мэдэхын тула, иланга­яа ургажа ябаа залуу үетэндэ хөөрэн харуулхын тула энэ ехэ аша үрэтэй, гүнзэгы удха шанар­тай зүжэг-нааданда нилээд олон зон хабаатай. Үйлэ бүхэниие хэhэг хэhэгээрнь үе бүхэндэнь тааруулан харуулхын тула хэды олон шэнэ хубсаhан оёгдооб, хэдэн олон хэрэгсэл, тусхай түхеэрэлтэнүүд зохёогдооб!

Буряад арадай хэр угhаа сахи­жа ябаhан ёhо заншал, урданай дуунууд, түүхын хуудаhануудhаа баримтата хэhэгүүд тайзан дээрэhээ ууган хэлэн дээрээ ябуулагдажа, режиссёрой мэр­гэжэлтэ уран аргануудые хэрэ­глэлгын ашаар, тусхай хараса шадабариин хүсөөр, мүнөө үеын онол аргаар юрын харагшадта дамжуулагдаа гээд тэмдэглэл­тэй.

Гансашье «Амар сайн» те­атрай ажалай гол үүргэдэ тус зүжэг-наадан онсо удха шанар оруулха бэшэ, харин түүхээр баян бүхы аглаг hайхан Ага ню­тагаймнай hүр hүлдые дээшэнь үргэжэ, hалираан hабандаанай түргэн гүйдэлтэй үе сагай hэлгээн соо харагша хүн бүхэнэй зүрхэ сэдьхэлые хүмэрюулмэ хэhэгүүдынь бүхөөр хадуугдан үлэбэ.

Агын Буряадай тойрогой за­саг дарга Бато Доржиев театрай артистнарые шэнэ зүжэгөөрнь амаршалжа, «Театры малых городов» түсэлэй урагшатай­гаар бэелүүлэгдэhэнэй түлөө Хүндэлэлэй грамотануудые ба Баярай бэшэгүүдые барюулhан байна.

Олон жэлэй туршада соёл уралигай оршон байдалда ам­жалта түгэс ажаллажа ябаhан Дулмажаб Дашицыреновна энэ бүтээлээрээ түрэл hайхан то­онто нютагаа магтан түүрээжэ, Агынгаа нютаг зоной урман­да зорюулжа табиhаниинь гайхалгүй.

Оюна БАЗАРОВА

Ага тойрог