70 жэлэй саана 1948 оной декабриин 15-ай № 248 дугаарта “Залуу уран зохёолшодой зүблөөн” гэһэн гаршагтай мэдээсэл тандаа дурадханабди.
«Бурят-Монголой залуу уран зохёолшодой республиканска хоёрдохи зүблөөн һаяхан Улаан- Үдэ городто болобо.
“Бурят-Монголой литературын гол үенүүд, тэрэнэй зорилгонууд” гэһэн элидхэл нүхэр Ц. Галсанов хэбэ.
Революциин урда тээ бурят- монгол арад зон уран һайханай литературагүй байхаһаа гадна, үзэг бэшэгшье мэдэхэгүй байһыень нүхэр Галсанов тэмдэглэнэ. Революциин урдахи үенүүдтэ бурят-монгол ажалшад айхабтар хүндэ хүшэр дарлалта доро, үлэсхэлэнтэ ядуу байдалда байһан тухайгаа уйдхар гашуудалаар дүүрэн дуунуудые дууладаг, үльгэр онтохонуудые зохёожо, аман үгөөрөө дамжуулан хэлсэдэг, эрхэ сү-лөөтэ ажабайдалые туйлаха тухай дура хүсэлөө харуулдаг байгаа.
Октябрьска революциин ашаар, Ленин-Сталинай партиин хүтэлбэреэр, агууехэ ород арадай туһаламжаар манай бурят-монгол арад зол жаргалаар түгэлдэр шэнэ ажабайдалтай болоо, удхаараа социалистическэ, формоороо национальна культурые хүгжөөгөө. Октябрьска социалистическэ революциин илаһан сагһаа эхилжэ, бурят- монголой литература бии болоо. Омог баяраар дүүрэн дуунууд, рассказууд, шүлэгүүд бии боложо эхилһэн байна. Коммунистическэ партиин хүмүүжүүлһэн, арадай дундаһаа урган гараһан хүнүүд энээниие бэшэдэг байгаа.
Советскэ социалистическэ Бурят-Монголой литература- да эхи һуури табиһан, уран бэрхэ зохёолшо Хоца Намсараевай зохёолнууд тухай, манай национальна литературын хүгжэлтэдэ Хоца Намсараевай үүргэ тухай нүхэр Галсанов дэлгэрэнгыгээр хэлэбэ. Саашадаа элидхэлшэ хадаа бурят-монгол литературын хүгжэлтын замые харуулба.
Элидхэлшэ хадаа советскэ хүнүүдэй моральна үндэр шэнжэ шанарые элишэлэн харуул- ха, ажалайнь гайхамшагта габьяануудые тодорхойлон зураглаха, литература ба искусствын асуудалаар ВКП(б)-гэй ЦК-гай түүхэтэ тогтоолнуудые бэелүүлхын тулада саашадаа эсэшэ сусашагүйгөөр тэмсэхэ шухала гэжэ хэлэбэ.
ВКП(б)-гэй Обкомой секретарь нүхэр Казаков зүблөөн дээрэ үгэ хэлэжэ, өөһэдынгөө ниитэ эрдэмые эрид дээшэлүүлхыень, идейно-политическэ бэлэдхэлээ шангадхахыень, марксизм-ленинизмые гүнзэгыгөөр шудалхыень залуу уран зохёолшодые уряалба».