1160
Декабриин 15-һаа хойшо Ородой Холбоото Уласай ажаһуугша бүхэн Алас Дурна зүгэй хүгжэлтын Үндэһэтэнэй программада дурадхал оруулжа эхилһэн байна. Энэ талаар ажал хэр ябуулагдажа байнаб гэжэ Буряад Уласай эдэй засагай сайд Александр Бардалеев мүнөөдэр, декабриин 21-дэ, сурбалжалагшадтай уулзалгада хэлэбэ.
«Зүүн зүгэй эдэй эдэй засагай 4-дэхи хуралдаанда Ородой Холбоото Уласай Юрэнхылэгшэ Владимир Путин 2025 он хүрэтэр, мүн саашадаа 2035 он болотор Алас Дурна зүгэй хүгжэлтын Үндэһэтэнэй программа байгуулха тухай хэлэһэн байна. Энэ программада 17 шэглэл элирүүлэгдэнхэй. Эндэ ниигэмэй, эдэй засагай, элүүрые хамгаалгын, соёлой болон бусад һалбаринууд ороно. Программа байгуулха талаар уласай хэмжээндэ ажалай 3 бүлэг байгуулагдана. Эдэ хадаа, демографи, ниигэмэй һалбари һайжаруулха болон хуулиин һалбарида үрдилдэн тэмсэлгэ, эдэй засаг хүгжөөлгэ эршэдүүлхэ талаар ажал ябуулха», - гэжэ Александр Бардалеев хэлэбэ.
Ородой Холбоото Уласай ажаһуугшад дв2025.рф. гэһэн сайтда орожо, һанамжа, дурадхалнуудаа оруулха аргатай. Мүнөө дээрээ Буряад Уласһаа 28 дурадхал ороод байна.
«Ажаһуугшадай эдэбхитэй хабаадалгаар бидэ гурбадахи һуурида ябанабди. Ажабайдалай алишье һалбари хүгжөөхэ талаар хүнүүд дурадхалаа оруулха аргатай. Тиихэдэ налог татабари, Байгал далай аршалан хамгаалха талаар һонирхолтой дурадхалнууд ороод байна. Манай уласта шухала асуудал болохо һургуули болон хүүгэдэй сэсэрлигүүдые бариха талаар дурадхалнууд ороно», - гэжэ Буряад Уласай эдэй засагай сайд хэлэбэ.
Ажаһуугшадай хабаадалгаһаа мүнгэ һомололго дулдыдыхашье үгы һаа, тэдэнэй һанамжа хараалан, мүнгэ һомололгын талаар хэмжээ ябуулгануудта оруулхабди гэжэ Александр Бардалеев тэмдэглэбэ.
«Уридшалан хэгдэһэн тоололгонуудаар ниигэмэй һалбарида 160 миллиард түхэриг һомологдохо гэжэ хараалнабди. Буряад Уласай ямар аймагта, ямар һууринда ямар ажал хэгдэхэб гэжэ нютагай засагай байгууламжануудай болон ажаһуугшадай дурадхалнуудаар хаража, шэнжэлжэ, шүүлмжэлжэ ажал ябуулхабди», - гэжэ сайд тобшолбо.
2018 оной декабриин 25-да оруулагдаһан дурадхалнуудаар дв2025.рф. гэһэн сайтда һанал хуряалга эмхидхэгдэхэ.Дурадхалнуудаа оруулха гэбэл, сайтда бүридхэлдэ абтажа, хаана ажаһуудаг, гар утаһанайнгаа дугаар, мэргэжэл, түрэһэн үдэр тухайгаа мэдээ орхихо шухала. Удаань тусхай һалбари шэлэжэ, һайшаагдаһан дурадхалай түлөө ажаһуугша бүхэн дуугаа үгэхэ аргатай.
Бүхы дурадхалнууд шэнжэлжэ, шүүмжэлэгдэхэ. Удаань январь һарада мэргэжэлтэ шүүбэришэд – Буряад Уласай яамануудай болон Алас Дурнын хүгжэлтын талаар яаманай түлөөлэгшэд - хуули эрхын, эдэй засагай талаһаа ажал ябуулха. Февралиин 15 болотор ажаһуугшад дурадхалнуудаа оруулха аргатай.
