​​Бүхэдэлхэйн универсиада Красноярскда болохонь

Оюутадай дунда дэлхэй дээрэхи эгээл томо мүрысөөн Красноярск хотодо үнгэргэгдэхэнь. Сибирьтэ шанга гэгшын тулалдаанууд 2019 оной март һарын эхиндэ болохоор хараалагдана.

Бүхэдэлхэйн хэмжээнэй гол үйлэ хэрэгүүдэй нэгэн хадаа наадануудай гал дамжуулга болоно. Һаяын үдэрнүүдтэ универсиадын гал Эрхүү хото ерэһэн байна.

Эрхүү хотын гудамжануудаар универсиадын гал 25 хүн барижа гүйлдөөд, бэе бэедээ дамжуулба. Бүхы дээрээ 3600 метр зай тэрэ гал гаталаа. Энэ хэмжээ ябуулга харахаяа 6 мянга гаран хүн суглараа. Энэнь гайхалгүй.

Һүүлшын шатада универсиадын ехэ гал Эрхүү хотын “Труд” стадионой талмай дээрэ носоогдоһон байна. Энэ хэрэгые универсиадын хоёр дахин чемпион Дмитрий Буряк болон Эрхүү хотын губернатор Сергей Левченко гэгшэд носоогоо.

Универсиадын нааданай гал дамжуулга сентябриин 20-до эхиеэ абаһан юм. Оюутадай дунда наадануудай эхи табиһан Италиин Турин хотодо энэ гал анха түрүүн носоогдоо һэн. Тэрэ Казахстанай Алматы болон Хитадай Харбин хотонуудай үйлсөөр дамжуулагдаа. Ород гүрэнэй дэбисхэр дээрэ 30 хото город хүрэхэ, тэрэ тоодо Москва, Архангельск, Санкт-Петербург, Калининград, Симферополь, Ростов-на-Дону, Ставрополь, Грозный, Казань, Екатеринбург, Владивосток, Иркутск, Барнаул, Новосибирск, Томск, Абакан, Кызыл болон бусад. Мүн Красноярска хизаарай бүхы дэбисхэр дээгүүр дамжуулагдахаар хараалагдана. Декабриин 18-да универсиадын гал Тыва Уласай ниислэл Кызыл хүрөө.

Түүхэһээ

Бүхы дэлхэй дээрэ оюутадай наада эмхидхэхэ тухай Италида шиидхэбэри абтаа. Тиигэжэ 1959 ондо түрүүшын наадан болоһон байна. Тэндэ 45 гүрэнэй 985 тамиршан хабаадажа, спортын долоон зүйлөөр мүрысөө. Үбэлэй спортын зүйлнүүдээр универсиада 196О ондо Франциин Шамони хотодо болоһон түүхэтэй. Табан зүйлөөр 16 гүрэнэй түлөөлэгшэд мүрысөө бэлэй. Спортын түүхэ ираад харабал, Универсиадын мүрысөөнүүдые манай гүрэн оройдоол хоёр дахин үнгэргэһэн байна. Зунай нааданууд 1973 ондо Москва хотодо болоо. 2О13 ондо Казань хотодо үндэр хэмжээндэ шанга тулалдаанууд үндэр хэмжээндэ болоо һэн.

Ээлжээтэ Универсиада Красноярск хотодо мартын 2-12-ой үдэрнүүдтэ болохоор хараалагдана. Спортын найман зүйлөөр шанга тулалдаанууд болохо юм. Горнолыжный спорт, биатлон, лыжные гонки, хоккей, шорт-трек, сноуборд, фигурное катание, керлинг гэһэн зүйлнүүд наадануудай программада оруулагданхай. Мүн тиихэдэ нэмэлтэ үшөө хоёр зүйлөөр тамиршад мүрысэхэ.

Энэ фристайл болон спортивное ориентирование болоно. Тиихэдэ бүмбэгэтэ хоккейеэр нааданууд үнгэргэгдэхэ.

Универсиадын талмай дээрэ 3 мянга гаран тамиршад гарахаар хараалагдана. Наадануудые харахаар 1О мянга гаран айлшад Красноярск бууха гэжэ эмхидхэгшэд мэдүүлнэ.