Үнгэрһэн долоон хоногто Ород гүрэнэй Юрэнхылэгшэ Владимир Путин олондо мэдээсэл тараадаг хэрэгсэлнүүдэй түлөөлэгшэдтэй уулзажа, һонирхоһон асуудалнуудтань дэлгэрэнгы харюу- нуудые үгэбэ. Иимэ уулзалга 2001 онһоо эмхидхэгдэнэ. Мүнөө тэрэ 14-дэхиеэ болоһон байна. Аяар 1702 хүн Владимир Путинтай уулзахаа ерээ. Тэдээн соо Буряа- дай дүрбэн сурбалжалагшын хабаадалсаһаниинь һайшаалтай.
Шаттл-автобус шамдуулба уулзалга
Владимир Путинтай ехэ пресс-конференцидэ ошохын тула нэн түрүүн Интернедээр мэдүүлгэ эльгээхэ хэрэгтэй байгаа. Бишье баһа дансануудые суглуулжа, анкетын асуудалнуудта хүсэд харюу үгөөб. Хэдэн үдэр болоод лэ, Москваһаа зүбшөөл ерээ.
Тус хэмжээ ябуулга декабриин 20-до Ородой ниислэлэй шэнэ үеын уласхоорондын ажал хэрэгэй түбтэ үнгэргэгдөө. Мүн тэрэнэй урда тээ пресс- конференцидэ орохо дансанууд, илангаяа бейдж тараагдаа. Москвагай түбтэ оршодог Ильинка гудамжада байдаг Ородой Юрэнхылэгшын Захиргаанда ошожо, бейдж абаһан байнаб.
Владимир Путинтай уулзалгын үдэр эртэ үглөөгүүр бодоод, хэмжээ ябуулгын газарта ошохоо шамдабаб. “Выставочный” гэһэн метрогой буудалда хүрэхэдэтнай, таанадые шаттл-автобусууд хүлеэн абаха” гэжэ урилга соо бэшээтэй байгаа һэн. Харин ошоод лэ харахадамни, юрын лэ бага хэмжээнэй микроавтобусууд байшоо. Газаа тээнь томоор “Россия” гэжэ бэшээтэй автобусоор табаншье минута болонгүй, уласхоорондын ажал хэрэгэй түб хүрэһэн байнабди.
Түлхилсөөн соогуур
Уулзалгын газарта полициин олон хүдэлмэрилэгшэд зогсоно. Зосоонь орохын тула хоёр шалгалта гарааб. Энэ хэрэг ехэ саг эдихэ гэжэ һанааб. Тиигээгүй. Томо түбэй нэгэдэхи дабхарта бүхы хабаадагшадта халуун сай дурадхагдаа. Эртүүр гэрһээ гараһан сурбалжалагшад дулаасаад, баяртайнууд пресс-конференцидэ ороо.
Хоёрдохи дабхарта хоёр мянга гаран хүнүүдэй нэгэ доро суглархада, маанадай “сурхарбаан” шэнги ехэ түлхилсөөн болошоно. Эгээл тэндэ сурбалжалагшадай хүдэлхэ 50 гаран компьютер табигдаа. Дары түргөөр мэдээсэл эльгээхэ дуратайшуул олон байгаа. Компьютерай саана һууха хүнүүд үшөөшье олон байха һааб даа, харин мүнөөнэй оньһон аргын хүгжэлтэ холо ябашоол. Тиимэһээ зурагуудые, тобшохон зураглалнуудые гарайнгаа утаһаар абаһаар лэ эльгээгшэд бүри олоор харагдаа.
Тэрэ түлхилсөөн соо хэдэн сурбалжалагшадтай уулзажа шадааб. Кызыл хотоһоо ерэһэн Азиана Чадамба үндэһэн хубсаһа үмдэжэ ерэһэн байна. Угаа һонин плакат асаржа, сугларагшадые һонирхуулаа.
- Юрэнхылэгшэ манай Тыва Улас ерэжэ, амардаг заншалтай. Нэгэ дахин тэрэ загаһашалжа, томо сурхай загаһа бариһан байна. Энээниие һануулһан плакат хаража, намда асуудал табихыем дурадхаха бэзэ гэжэ найданам, - гэжэ Азиана Чадамба хөөрэнэ.
Удаань Хальмаг Уласай гурбан сурбалжалагшатай уулзашооб. Валентина болон Баатр гэгшэд үхэр малай үйлэдбэри хүгжөөхэ талаар оройдоол нэгэ асуудал табиха һанаатай ерээд ябаһанаа мэдүүлээ.
Хальмаг сурбалжалагшад
- Хальмаг үүлтэртэ үхэр малда анхарал ехээр хандуулха тухай хэлэхэ һанаатайбди. Энэ мал һайнаар тэжээгээ һаа, хари гүрэнэй мяхан маанадта огто хэрэггүй байгаа бшуу, - гэжэ “Хальмг үнн” сониной сурбалжалагша Баатр Амтеев хэлэнэ.
Мүн бүхы Хальмагта “Россельхозбанкын” ганса нэмэлтэ таһаг хүдэлдэг байна. Мүнгэнэй асуудал шиидхэхын тула тэдэ аяар Ростов-на-Дону хото ошохо баатай болоно.
Свердловско можын Первоуральск хотоһоо ерэһэн Елена хоккейн малгай (шлем) үмдөөд, хүнүүдые гайхуулаа.
- Манай хотодо бүмбэгэтэ хоккей хүгжэнги. Ород хоккей гэжэ алдаршаһан энэ нааданда манай гүрэн дотор анхарал хандуулагданагүй. Бүхы нютаг нугануудаймнай бренд болохо аргатай, - гэжэ Елена мэдүүлнэ.
Саһан хүүхэнэй хубсаһатай ород эхэнэр, ногоон хубсаһатай Пакистанай сурбалжалагша, бубен баринхай Ханты-Мансиин сурбалжалагшад нюдэндэмни торосолдоо.
Пресс-конференциин үнгэрхэ зал руу орохо үедөө бүри ехэ түлхилсөөн болоо. Ямаршье дэлгүүр, базаар дээрэ иимэ байдалтай ушараагүй байнаб.
Гол анхарал - үндэһэн түсэлнүүдтэ
Владимир Путин хэдэн минутаар хойнотожо ерээ. Орохотоёо сасуу тэрэ 2018 оной дүнгүүд тухай тоосоо хэһэн байна. Арба һарын дүнгүүдээр Ород гүрэнэй ВВП 1,7 процентээр дээшэлээ гэжэ Юрэнхылэгшэ мэдүүлээ. Толгойлогшын хэлэһээр, промышленна үйлэдбэри түсэблэгдэһэнһөө бүри түргөөр ургаба гээшэ.
Хэдэн тоонуудые хэлэһэнэйнгээ удаа Владимир Путин сурбалжалагшадта асуудалнуудые табихыень дурадхаба. Тиихэдэнь булта зогсон байжа, “намда асуудал табихыемни үгыт” гэхэ мэтын бэшэгтэй плакадуудаа дээшэнь үргэн һэжэрхэ, тэрээн дээрээ бэшээтэй юумэеэ хашхарха үзэгдэл эхилшоо. Бишье баһа нэгэ бага шанга хоолой гаргалсаа бэзэб даа.
Заал һаа Буряад Уластамнай хабаатай харюунуудые хүндэтэ уншагшадтаа дуулгаха гэһэн зорилго урдаа табиһан байнаб. Абаһаар түрүүшын асуудал манай байдалтай зохилдошоо. ИТАР-ТАСС-ай сурбалжалагша гүрэнэй үндэһэн түсэлнүүдые бэелүүлгэ тухай һуражархёо.
- Гүрэнэй үндэһэн түсэлнүүдые манай Засагай газар олон жэлдэ бэлдэһэн байна. Бүтүү мүнгэ тарааха гэжэ оролдоогүй. Энэ хэрэгтэ 20,8 триллион түхэриг дамжуулагдахаар хараалагдана. Энээнһээ гадна 6,5 триллион түхэриг инфраструктурын хүгжэлтэдэ үгтэхэ, - гэжэ Владимир Путин мэдүүлээ.
Гол түсэлнүүд элүүрые хамгаалгада, эрдэм һуралсалда, ниигэмэй хамгаалгада бэелүүлэгдэхээр хараалагданхай. Манайшье Буряад Уласта түсэлнүүд үргэн дэлисэтэйгээр нэбтэрүүлэгдэхэ бэзэ гээд найдагдана. Юуб гэхэдэ, түсэлнүүдэй аргаар һургуулинуудай гурбадахи халаан болюулагдаха юм. Тиихэдэ шэнэ һургуулинууд, хүүгэдэй сэсэрлигүүд, фельдшерскэ-акушерскэ пунктнууд бодхоогдохо.
Бог шорой, хаядаһа хуряалга
“Южный Урал” гэһэн телекомпаниин сурбалжалагша Яна Сконечнаягай бог шорой тухай асуудал бүхы Ород гүрэнэй можо, хизаарнуудта хабаатай байба. Владимир Путин харюусахадаа, үнэхөөрөө бог шорой тухай асуудал совет үеын һүүлээр үшөө табигдаагүй байгаа гэжэ зүбшөөбэ.
- Бог шорой усадхан, тэрээниие хэншье суглуулаагүй бшуу. Хүн зон бог шоройгоо талада, ой модон соо, уһа голдо хаяна. Нэн түрүүн бидэ энээниие сэбэрлэхэ түсэбтэйбди. Ушар гэхэдэ, бог хаядаһа суглуулгын талмайнууд дуталдана. Шатааха заводууд гүрэндэмнай тон үсөөн, үгышье гэхэдэ, алдуу болохогүй, - гэжэ Юрэнхылэгшэ хэлэһэн байна.
Владимир Путинай хэлэһээр, бидэ Япон гүрэнһөө жэшээ абаха ёһотойбди. Юуб гэхэдэ, тэндэхи бог шорой шатааха заводууд байгаалида хоро үзүүлнэгүй.
2018 оной эхиндэ Япон гүрэнэй олзын хэрэг эрхилэгшэд Буряадай Толгойлогшо Алексей Цыденовтэй шэнэ завод бариха тухай хөөрэлдөө эмхидхэһэн байна. Энэ зугаа юундэб даа тогтошонхой. Владимир Путинай үгэ гараһанай удаа ажал бүтэжэ эхилхэ гэжэ найдая.
2019 онһоо хойшо бүхы гүрэндэ региональна оператор хүдэлдэг болохонь. Буряад Уласта энэ хэрэг эрхилхын түлөө конкурс болоходонь, Эрхүү хотын “ЭкоАльянс” гэһэн үйлэдбэри шүүгээ һэн гээд һануулая. Мүнөө болоходо, бидэ бог шоройетнай танай хойноһоо абахагүйбди гэжэ аашалжа байна. Тэдэнэй арсаһан шалтагаан ойлгосотой. Буряадтамнай бог шорой үйлэдбэрилхэ заводууд үгы бшуу. “ЭкоАльянс” бэлэн дээрэ ерээд, хүдэлхэ һанаатай байгаа. Хэдэн жэл болоод, тэдэ завод барихамнай гэжэ түсэблөө. Харин Владимир Путин ямар завод бариха ёһотойб гэжэ ойлгуулжа үгэһэн байна. Энэ үгын һүүлээр Буряад Уласай Засагай газар “ЭкоАльянстай” нэгэ жэлээр харилсаагаа болюулха гэжэ шиидэһэн байна. Гол шалтагааниинь - бог шорой шатааха завод барилга болоо ааб даа. Зүбөөр хэлээ һаа, Буряадай Засагай газар “ЭкоАльянс” ямар завод барихань бэ гэжэ бүхы талаһаань мэдэхэ һанаатай. Владимир Путинай энээн тухай хэлээгүй һаа, манай байгаалида муу нүлөө үзүүлхэ үйлэдбэри бии болошохо байгаа һэн гээд һанагдана.
Гэр бүлынь байдалаар һонирхоо
Манай Буряадта хабаатай үшөө хэдэн асуудалнууд табигдаа. Рэп дуулагшадай, хубитаяа оруулаад, гэр байрагүй үлэшэһэн зоной байдал, цифровой телевидени тухай болон бусад асуудалнууд хэлсэгдээ.
Уласхоорондын байдал тухай хэдэн асуудалнуудта Владимир Путин харюу үгэһэн байна. Японой, Хитадай, США-гай, Афганистанай, Армениин болон бусад гүрэнүүдэй түлөөлэгшэд асуудалнуудаа табижа шадаа.
Хэды тиигэбэшье Владимир Путинай гэр бүлын байдалда олондо мэдээсэл тараагшадай анхарал хандуулагдана.
- Владимир Владимирович, бэетнай һайн гү? Хэзээ гэрлэхэеэ байнат, - гэжэ гэнтэ нэгэ сурбалжалагша ама гараба.
- Бэе махабадни һайн, хүлеэжэ эсэшэхэт... Үнэн сэхэ, ёһоо алдадаггүй хүн хадаа заал һаа һамга абаха болоно хаб даа, - гэжэ Юрэнхылэгшэ хэлээ.
Аяар 3 саг 50 гаран минута хөөрэлдөөн болоһон байна. Хэдэн үдэр үнгэрһэнэй удаа Юрэнхылэгшын пресс-секретарь Дмитрий Песковой хэлэһээр, 2019 ондо энэ хэмжээ ябуулга бага зэргэ ондоо болохоор хараалагдана.