​​Жэн абьяасаар жэгнээл «Золушка»

Урихан дулаахан оршон байдалда энэ һайндэр үнгэрөө. Улаан-Үдын эрхим сэсэрлигүүдэй нэгэн – 110- дахи “ЗОЛУШКА” байгуулагдаһаар 30 жэлэйнгээ ойе тэмдэглэбэ. Хүтэлбэрилэгшэнь - Ород Уласай юрэнхы эрдэм болбосоролой хүндэтэ хүдэлмэрилэгшэ, Буряад Уласай эрдэм болбосоролой габьяата хүдэлмэрилэгшэ А.А.ЧИСТЯКОВА эгээ эхин дээрэнь, сэсэрлигэй һая ба­ригдажа, захалаад байхада ерэһэн юм.

- Эб эетэй байдалда хүдэлмэрилэгшэдэйнгөө һанаа сэдьхэл дэмжэн хүдэлхые оролдонобди. Ахалагша хүмүүжүүлэгшэ А.Н. Малкова, хүмүүжүүлэгшэд С.Н. Дми­тручина, Л.А. Алферова, Н.Н. Малкова, Е.Г. Клепикова, С.Л. Байбородина, Н.Г. Ива­нова, Е.С. Овчинникова, Ц.В. Цыденова, тогоошод И.И. Казлаус, В.Л. Покровская, О.В. Усова, медсестра Л.Р. Ро­винская – эдэ зоной нэгэн һаналтайгаар хүдэлөөгүй һаа, юумэн бүтэхэ байгаа гү? Хүгжэмэй хүтэлбэрилэгшэ Т.Н. Хепнер, буряад хэлэ­нэй талаар хүмүүжүүлэгшэ Б.Ж. Цыбикова – эдэнэрнай хэнээршье һэлгэшэгүй зон лэ, - гээд, Анна Алексеев­на Чистяковагай хэлэхэдэ, үнэхөөрөөшье, коллективээ дэмжэжэ, тэдэндээл тулгал­жа шададаг хүн гээд ойлго­моор.

Гушан жэлэй саана сэсэр­лигые барин бодхоолсоһон, Арадай Хуралай һунгамал ябаһан С.П. Бужинаев, Улаан-Үдэ хотын захир­гаанай һургуулиин наһа гүйсөөдүйшүүлэй таһагые даагша Э.А. Будаева, энэ таһагай ахамад мэргэжэл­тэн О.Н. Демина, Октябрь­ска районой захиргаанай хүтэлбэрилэгшын орлогшо И.И. Трунова, бусад олон амаршалгын үгэеэ хэлэхэ­дээ, хүмүүжүүлгэеэ жэшээтэ ёһоор ябуулдаг, байра бай­далаа болбосон түхэлтэй, гуримтай байлгадаг сэсэр­лигэй коллективые амар­шалба, Шэнэ жэлэй урда тээхи һайндэрэй һайхан гал­ханай бадархадань, ошо нэ­мээлсэбэ.

“Золушка” сэсэрлиг өөрын гимнтэй юм байна. Зохидхон даа аялгатай, шэ­хэндэ урин. Уралигай 6-дахи һургуулитай дүтөөр харил­сан хүдэлдэг тула хүүгэдэй харуулһан тоглолто наадан һайнаар мүлигдэһэн, онсо удхатайхан. “Гургалдай”, “Стиляги”, “Һолонго” найру­улганууд дуу, хатарнуудһаа бүридэһэн жэгтэй үзэгдэлнүүд болоо. Ира Шуме­ева, Алена Шумеева, Олеся Гришко, Ян Козлов, бусад­шье эдир бэлигтэн шадаба­рияа харуулаа даа.

Э.А. Будаева, И.И. Тру­нова гэгшэд хүүгэдтнай хүгтэйхэн, зохёохы шада­баритай гэжэ тэмдэглэбэ. Горсоведэй һунгамал, 32- дохи һургуулиин захирал Т.Г. Митрофанова мүнгэн туһаламжа үзүүлээ юм. БГУ-гай эхин эрдэм һуралсалай кафедрын доцент С.А. Пав­лова эрдэмтын харааһаа өөрынгөө тобшолол үгэжэ, һайшаалай үгэнүүдые хэлээ.

«Золушкын» бааза дээрэ Улаан-Үдын хүүгэдэй сэсэрлигүүдэй хүмүүжүүлэгшэдэй семинар жэлдээ хэдэ дахин үнгэргэгдэдэг.

- 26 хүмүүжүүлэгшэдэймнай 21-иинь тусгаар аттестаци гараһан, 6-иинь дээдэ аттестационно бэлэд­хэлтэй. Октябрьска райо­ной, Улаан-Үдэ хотын, Ород Уласай зохёохы конкурсну­удта хүүгэднайшье, хүмүүжүүлэгшэднайшье шалгаржа байдаг. Шэнэ халаан тухай­гаашье бодомжолнобди. Сэсэрлигтэмнай ябадаг байһан Александра Чистякова энэ жэлдэ БГУ-гай һургуулиин наһа гүйсөөдүйшүүлэй таһагай 1-дэхи курсын оюутан болоо, - гэжэ А.Н. Малкова хөөрөө һэн.

Хоёр жэл урид “Золуш­ка” сэсэрлиг үргэдхэгдэһэн гэхэ гү, али 148-дахи квар­талда харьяата эмхи нээгдэһэн юм. Дүршэл ехэтэй А.А. Чистякова энэ “ашаае” хүндэшөөгөөгүй, хүндэтэйгөөр даан абажа, ажалаа урагшатай ябуулна. Нарһан тужа соо нээгдэһэн энэ сэ­сэрлигтэ 131 үхибүүн яба­даг юм. Үнгэрһэн зундаа угаа зохидхон талмайхану­уд, һэрюухэндэ наадаха хушалтануудтай байранууд түхеэрэгдээ.

- Хүүгэдэй сэсэрлигүүдые олон болгохо, һуурииень олошоруулха гэһэн хүдэлөөн мүнөө эршэмтэй. Уласай тол­гойлогшо өөрөө энэ асуудал шанга хиналта дороо абан­хай ха юм. Эгээл энэ шиид­хэбэритэйнь зохилдуулан, анханай техническэ хэрэ­глэмжэдэ байһан нэгэ байра­яа сүлөөлжэ, һэльбэн шэнэл­хэмнай. Иигэжэ 25 хүүгэдэй ябаха 1 бүлэг – өөрын ясли нээхэ һанаатайбди ерэхэ зундаа, - гэжэ Анна Алексе­евна урмашалтай тэмдэглэ­бэ.

Һайндэртэ ерэһэн вете­ранууд угаа баяртайнууд. ”Олон юумэн хубилаа. Шэнэ мебель, шэмэглэл бии бо­лоо – гоёл байна даа. Бидэ­нээ нэгэтэшье мартадаггүй, һайндэр бүхэндөө уридаг, “Сэнхир галхан” эмхидхэдэг. Бэрхэнүүд! Сэсэрлигэймнай галхан хэзээдэшье бадаржа, Шэнэ гараһан жэлнүүдые угтажал байхань болтогой! - гэжэ Е.Ф. Тигунова, А.С. Шо­лохова, Л.Г. Кожевникова, В.Г. Маслянникова гэгшэд нэ­гэн дуугаар халуун мэндэеэ мэдүүлжэ байгаа һэн.

Шэнэ жэлэй шэмэгтэй “Золушка” -

Зоной һайшаалтай золтой сэсэрлиг,

Жэн абьяасаар жэгнэһэн “Золушка”

Зоригтой хүсэтэй оршон байг лэ -

гээд, үнэн зүрхэнһөө Шэнэ жэлээр амаршалаял даа сэн­тэйхэн энэ сэсэрлигые.