Сониноймнай энэ жэлэй һүүлшын дугаарай айлшан – мэдээжэ олзын хэрэг эрхилэгшэ, зошод буудал, ресторан, элүүржүүлгэ, мүн аяншалгын һалбариин хэдэн ехэ эмхинүүдэй, тэрэ тоодо “Самурай” ресторан ба “Орда” этнокомплексын эмхидхэн байгуулагша болон хүтэлбэрилэгшэ, хоёр хүүгэдэй энэрхы һайхан эжы, найдамтай наһанай нүхэр Инна Вячеславовна Чимитова. Гарахаяа байһан Шэнэ жэлэй хүндэлэлдэ хэһэн хөөрэлдөөгөө та олонойнгоо һонорто дурадханабди.
- Инна Вячеславовна, жэлэй эсэстэ хүн бүхэмнай эды-тэды дүнгүүдээ согсолжо, ерэхэ жэлэйнгээ түсэбүүдые хараалдаг заншалтай. Танда ямархан жэл тудаа гээшэб? 2019 ондо ямар ажал хараалнабта?
- Энэ үнгэржэ байһан жэл үйлэ хэрэгүүдээр ехэ баян байгаа. Бидэ хоёр түсэл урагшатай бэелүүлээбди: Москва хотын түбтэ гоё ресторан нээгдээ, мүн Улаан-Үдынгөө аэропорт соо хоол бариха гурбан кафетэй болообди. Гадна Буряадай ниислэл хотодо япон эдеэ хоолой бии болоһоор 13 жэл тэмдэглэгдээ. Юуб гэхэдэ, бидэл эхи табиһан байнабди. Тиимэһээ “Самурай” ресторан энэ үйлэ хэрэгые үргэн дэлисэтэйгээр тэмдэглээ. Намар зорюута Москваһаа нэрэтэй солотой тогоошодые, япон ба Азиин арадуудай эдеэ хоолой эрхим мэргэжэлтэдые урижа, шэнэ эдеэн табагуудые зохёогообди. Түсэбүүд тухай хэлэхэдэ, ажал хэрэгүүдээ хүгжөөхэ, үргэдхэхэ зорилго бии. Ресторануудаа, спа-салонуудаа бүри гоё, зохид, хүн зоной дура буляама болгохо хүсэлтэйбди.
"Самурай" ресторан соо ехэ зохид
- Амжалтынгаа нюусаар хубаалдыт даа. Түбһэн хүн олзын хэрэг эрхилжэ шадахагүй гэжэ мэдээжэ. Наймаашанай абьяас заабол хэрэгтэй гү, али һайн мэдэсэ, эсэшэ сусашагүйгөөр хүдэлхэ зүрхэн байгаал һаа, хүрэхэ гү?
- Минии һанахада, эхэ эсэгэһээ абажа гараһан зан мэтэ, шадабари абьяас баһал шуһаар дамжан ерэдэг. Би ямар нэгэн ондоо ажал, бусад мэргэжэл тухай һанаашалдагшьегүйб. Энэ хэжэ байһан хэрэгтээ үнэн зүрхэнһөө дуратайб. Гадна хүнһөө дулдыдангүй, бэеэ даагаад ябаха эрмэлзэл, ямаршье хэрэгтэ бүхыгөөрөө оролдодог зан – эдэ бүгэдэ эжы абаһаамнил һабагшатай. Тиимэһээ түрэлхидтөө ходо сэдьхэлэй баярые хүргэжэ ябадагби. Мүн тиихэдэ эрхим гээшэдэ хизаар, орой гэжэ үгы ха юм: бүри һайн, бүри гоё тээшээ тэгүүлжэл байха хэрэгтэй. Үшөө нэгэ шухала эрилтэ – “алтаншье” толгойтой һаа, ори гансаарханаа ехые бирахагүйш, амжалта амсахагүйш. Адли һаналтай, нэгэ хүсэлтэй нүхэдэйнгөө дэмжэлгэгүйгөөр, наһанайнгаа нүхэрэй бата тулгагүйгөөр, түрэл гаралайнгаа туһагүйгөөр ехэ дабаануудые дабахань бэрхэтэй. Энэ талаар би аза талаантай хүн гээшэб.
- Инна Вячеславовна, түрүүшынгээ мүнгэ хэзээ олоо һэмта? Таахада, һургуулиин үе байгаа ёһотой.
- Зүб даа. 6-дахи ангиин һүүлээр хэдэн үдэрэй туршада нарһан ба хасуури модохонуудые һуулгажа, тэрэ үедөө яһалхан мүнгэтэй болоо һэм. Хара хүлһөө гаргажа, олоһон мүнгэн сэнтэйл байгаа.
- Та – олзын хэдэн хэрэг эрхилхынгээ хажуугаар хоёр бэрхэ хүүгэдэй эжыт. Яагаад хамагаа үрдинэбта?
- Минии эжы Людмила Намсараевна үхибүүдыемни харалсадаг. Тиимэһээ бидэ хүүгэдтээ һанаагаа зобонгүй, ажалдаа хам орохо аргатайбди. Тэрэгүй һаа, бэрхэтэйл байха һэн. Энэ жэл басагамнай дунда һургуулияа алтан медальтайгаар дүүргэжэ, Гонконгын ехэ һургуулиин олзын хэрэг эрхилэлгын факультедэй оюутан болоо. Багаһаа хитад хэлэ шудалһан, гоёор дууладаг, тамаралгаар бэеэ һоридог. Хүбүүмнай мүнөө Москвада Пушкинай лицейдэ 2-дохи ангида һурана. Зураха, урлаха дуратай, ехэ һонюуша, зүжэгэй кружогто, самбо барилдаанда, гимнастикада ябадаг. Бидэ хүүгэдтээ заабол “5” сэгнэлтэ дээрэ һураха эрилтэ табидаггүйбди. Гэбэшье тэдэмнай өөһэдөө эрдэм мэдэсэдэ эрмэлзэдэг, һайн сэдьхэлтэй, үнэн зүбые баримталдаг. Наһаараа бэе бэеһээ холошье һаа, сэдьхэлээрээ бэе бэедээ тон дүтэ, мээхэй. Үхибүүдэймнай үшөө нэгэ һайн талань гэхэдэ, хоюулан байгаалида ехэ гамтайгаар хандадаг.
"Орда" этногалерей
- Мүнөө ниигэмэй харюусалгатай олзын хэрэг эрхилэлгэ тухай ходо хэлсэдэг. Энэ талаар ямар түсэлнүүдтэйбта? Заримыень жэшээ болгон нэрлыт даа.
- Үнэхөөрөөшье, ганса хара аминдаа олзо олохын тула хэрэг эрхилжэ болохогүй. Ажалшни хүн зондо туһатай байха ёһотой. Бишье энэ дүрим сахихаяа оролдоноб. “Орда” гэһэн этнокомплекс байгуулжа эхилхэһээ хойшо буряад- монгол уралигай галерей нээдэг һаа гэжэ ходо һанадаг һэмди. Тиин одоолшье хүсэлөө бэелүүлжэ, сэдьхэлээ ханаабди. Арадайнгаа уралиг хүгжөөхэ, мүнөө үеын уран зураашадай зохёохы бэлигээ мүлихэ, бүтээлнүүдээ дэлгэхэ талмай байгуулха һэдэлгэһээ гадуур уран зураг, театр, хүгжэм, уран зохёол нэгэдүүлэн, хүн зондоо бүхы гоё һайханииень харуулжа, түрэл хэлэн, соёл, ёһо заншалаарнь һонирхуулха зорилго табяабди. Тиигэжэ галерейдэмнай нилээд олон түсэлнүүд бэелүүлэгдээ. Жэшээнь, мэдээжэ найруулагша Олег Юмовай найруулан табиһан “Шоно Баатар” гэһэн шэнэ маягай зүжэг, тиихэдэ хүгжэм, шүлэг, уран зураг холбон нэгэдүүлһэн “Үлзытын Дондог” гэжэ зүжэг олондо һайшаагдаа. “Апокалипсис на Байкале” гэһэн буруушаалгын үзэсхэлэн Буряад ороной бүхы ажаһуугшадта Байгал далайгаа гамнадаг болохынь тула эмхидхэгдээ. Үнгэржэ байһан жэлэй февраль һарада “Орда” ресторан Москвада Федерациин Зүблэлдэ Буряадай үдэрнүүдэй хэмжээндэ арадайнгаа эдеэ хоолтой танилсуулжа, үндэр сэгнэлтэдэ хүртөө һэн. Түнхэнһөө гарбалтай манай ахамад тогоошон Евгений Халтанов одоол бэлиг шадабарияа харуулаа даа. Декабриин эхеэр Алас Дурна зүгэй федеральна тойрогой үдэрнүүдэй хэмжээндэ ниислэл хотынгоо Тверской талмай дээрэ буряад эдеэ хоолоо дурадхаабди. Манай ажал ябуулга аяншалга хүгжөөлгын һалбарида нилээд хабаатай гээшэ ааб даа. Тиимэһээ Буряад ороноо, Улаан-Үдэ хотоёо, арадайнгаа соёл, ёһо заншал холо ойроор мэдээжэ болгохоёо оролдонобди. Аяншалгын яамантай нягта харилсаа холбоотойгоор ажалаа ябуулдагбди.
- Инна Вячеславовна, иигээд лэ шэди дүүрэн Шэнэ жэлнай гарахаяа байна. Илангаяа бага наһанай һайндэр мартагдашагүйгөөр хадуугдадаг. Та эгээл жаргалтай Шэнэ жэлээ хэзээ угтаабта?
- Минии зүрхэ сэдьхэлдэ бүхөөр хадуугдаһан Шэнэ жэл юундэб даа Соведүүдэй талмайтай холбоотой. Үндэр гэгшын хасууриин дэргэдэ, тэнгэриһээ абаахай саһанай аргаахан унажа байхада, һайндэрэй баяр дүүрэн оршон байдалда нүхэд басагадаараа хүхилдэжэ, Шэнэ жэл угтаһанаа дулааханаар ходо һанагшаб.
Сагаалганда яагаад бообо хэхэб гэжэ фургалгын хэшээлэй үедэ
- «Ирония судьбы или с легким паром» гэжэ фильм соо Шэнэ жэлэй урдахана банида ошодог заншал зураглагдана. Харин танай гэр бүлэдэ ямар бэ даа онсо заншал бии гү?
- Тиимэл һаа онсо заншал гэжэ үгыл даа. Манай гүрэнэй ехэнхи ажаһуугшадтай ад- ли зүблэлтэ үеын фильмнүүдые, тэрэ тоодо танай дурдаһан кино хараха дуратайбди.
- Шэнэ жэлэй шэрээ дээрэхи тон дуратай эдеэн табагтнай ямар бэ?
- Заабол энэ гү, али тэрэ байха ёһотой гэлтэгүй, дуратай эдеэ хоолоо бэлдэдэгбди. Жэл бүхэндэ шэнэ табаг зохёохо заншал бии. Шэнэ жэлдэ заатагүй “Оливье” салат байха ёһотой гэдэгшье һаань, танигдаагүй шэнэ амта туршахада, һонин бэшэ аал?
- Инна Вячеславовна, манай уншагшадта Шэнэ жэлдэ юу хүсэхэ байнабта?
- “Буряад үнэн” сониной уншагшад, хододоо сагаан сэдьхэл сэдьхэжэ, һайн юумэндэ этигэл найдалаа алдангүй, бэе бэедээ хүлеэсэтэйгөөр, хүлисэнгы- гөөр хандажа ябахатнай болтогой! Бултандатнай элүүр энхые, аза жаргал, үндэр амжалтануудые, амгалан байдал хүсэнэб!
Инна Чимитовагай хубиин жасаһаа абтаһан гэрэл зурагууд