2016 онһоо бэелүүлэгдэжэ эхилһэн «Гүрэнэй үндэһэтэнэй бодолго бэелүүлгэ» гэһэн программын хэмжээндэ мүнгэн тэдхэмжэ үзүүлэгдэнэ. 2018 оной октябрь һарада Ханты-Мансиин автономно тойрогто үнгэргэгдэһэн Юрэнхылэгшын дэргэдэхи үндэһэтэнэй хоорондын харилсаанай талаар зүблөөндэ Владимир Путин энэ программын шухала һалбаринуудые гуримшуулха гэһэн даабари үгэһэн байна.
- Манай можо нютагуудай соёлой, түүхын талаар онсо шэнжэнүүдые хараадаа абан, ниигэмэй-эдэй засагай талаар түсэбүүдые табиха ёһотойбди. Хотонуудай, һууринуудай, можо нютагуудай хүгжэлтын асуудалнуудые хэлсэхэ талаар хэмжээ ябуулгануудта үндэһэтэнэй-соёлой нэгэдэлнүүд эдэбхитэй хабаадаха болоно, - гэжэ Владимир Путин тэмдэглэһэн байна.
2018 ондо үзүүлэгдэһэн тэдхэмжын ашаар Хойто-Байгалай аймагта «Бакалдын» гэһэн эвенк арадуудай һайндэр эмхидхэгдээ. Тиихэдэ Хойто-Байгалай аймагай Холодное, Уоян, Кичера, Байкальское һууринуудта, Захаамин аймагай Мэлэ нютагта, Муяын аймагай Усть-Муя һууринда хүүгэдэй сэсэрлигүүд тоног хэрэгсэлнүүдээр хангагдаа. Аха аймагай холо оршодог аймагуудта ажаһуудаг һурагшад болон багшанарые болбосоролой хэмжээ ябуулгануудта шэрэхэ «УАЗ-220695» түхэлэй машина абтаһан байна. Тэрэшэлэн Захаамин аймагай Мэлэ нютагай соёлой байшанда хүгжэмэй хэрэгсэлнүүд, костюмуудые шэнэлхэ бүд абтаа. Бабанта аймагай «Осикта» ансамбль баһал костюмуудаа шэнэлээ.
- 2019 ондо хойто аймагуудта ажаһуугшадай можо хоорондын «Икэнипкэ» фестиваль үнгэргэхэ түсэбтэйбди. Энэ хэмжээ ябуулгада Үбэр Байгалай хизаарай, Эрхүү можын, Яхад уласай айлшад хабаадахаар хараалагдана. Хитад гүрэнһөө эвенк арад ерэхээр түсэблэгдэнэ,- гэжэ «Осикта» ансамблиин хүтэлбэрилэгшэ Лидия Новикова хэлэбэ.
Буряад уласта ажаһуудаг үсөөн тоото үндэһэн бага арадуудые дэмжэлгэдэ 2019 ондо федеральна бюджедһээ 8,1 сая түхэриг һомологдохо. Уласай бюджедһээ - 500 мянган түхэриг, нютагай засагай байгууламжанууд 360 мянган түхэриг гаргашалха юм.
2010 ондо үнгэргэгдэһэн ажаһуугшадай тоо бүридхэн бэшэлгын дүнгүүдээр Буряад уласта 6 553 эвенк болон һоёд арад ажаһуудаг гэжэ баримталагдаа гэжэ һануулнабди.
Анна Огороднигой гэрэл зураг