Ээлжээтэ жэлээ үдэшэхэмнай. Ехэ орёо, орёо мүртөө һонин, хүлгөөтэй жэл болобо гэжэ уридшалан тобшолол хэхэ дуран хүрэнэ. Гүрэн түрэ доторнай ажамидараа арад зон энэ тэрэ дүнгүүдээ тооложо, тоншожо орохонь гээшэ. Засагай эмхи зургаанууд олон түмэн тоосоонуудаа суглуулха, тааруулха, зэргэсүүлхэ. Барилгашад ашаглалгада оруулһан байшануудаа хэмжэхэ, дутуу дундануудыень элишэлхэ, таряа ургуулагшад хүрэнгынгөө арьбаниие, газарайнгаа хүрьһэнэй шанар шэнжэлхэ, багшанар шабинартаа һургаһан ном һудараа, онол аргануудаа хараадаа абаха, эмшэд анагааха аргадаа ороhон зоноо тоолохо, туһалжа хүшхэрөөгүй зонойнгоо хойноһоо шаналха, аралжаа наймаа үдхэгшэд алта мүнгөө, олзо гаргашаа тааруулха, малшад ээлжээтэ түлөө һахин харууһалха, тэнгэреэ шэртэн, үбэлэйнгөө дабаа дабаха.
Бидэшье, “буряад үнэнөөрхин”, 97- дохи онойнгоо үбэлзөөндэ хамсыгаа шуужа оронхой, урагшаа шармайнхай, урматайханаар алхалжа ябанабди. Бороогой ороходо - шүхэрөө дэлгээн, наранай шарахада - һүүдэр һунган, һалхилха шуургалха үедэ – шэгэбшээ буулган... Манай шуран шулдааг сурбалжалагшад ганса Улаан-Үдынгөө түб талмай тойрон, һони бэдэрнэ бэшэ, баян Буряадайнгаа хоёр дали - Агын, Усть-Ордын, Ара Үбэр Монголой заха хизаараар, углуу буланаар мэдээнүүдые түүнэ, бэдэрнэ. Хаа-хаагуур нүүдэлшэ табисуураа баталан аяншалжа ажамидарха аргаа хангажа ябаа нютагаархидайнгаа амжалтануудые һонирхон шэнжэлнэбди.
Гадна бүмбэрсэгөө хүбөөлэн тойрожо, үбэл зунгүй ёохороо хатардаг заншалтай болообди. Ёохоройнгоо дүхэриг руу Улаан-Баатарһаа Калининград хүрэтэр, Бээжэнһээ Нью-Йорк дамжан, Сидней хүрэтэр нютагаархидаа татажа оруулха шэдитэй. Шэнэ, хуушан жэлнүүдэй уулзуур дээрэ, газар онгилхо гахай жэлээ угтан, “золгохо” ёһоо һэргээхэ газарта һэргээжэ, шэнэлжэ, үнгэ оруулха түбеэр шэнэлүүлхэ зорилго табибабди. Энэ хэмжээмнай баһа үргэн олон уншагшадтамнай дэмжэгдэхэ гэжэ найдагдана.
Үдэр бүриин жэжэхэн алхам мүрэй шэди түргэн урасхалтай хүлгөөнһөө холо дээрэ гээшэ ааб даа. Хүн бүхэмнай ондо ондоо, хүршэ хүбөө, түрэл түтим, хара багаһаа нэгэ ангида һураһан нүхэр һүүдэрэйнгээ гү, али харгыда ушарһан юрэ танил бэшэ хүнэй оньһото өөрсэ маяг сэгнэжэ, хүндэлжэ һурабал, адаалхай олон тоото асуудалнууд болбосоронгүй, “умай” соогоо хосорхо һэн гэжэ бодогдодог.
Арбан зургаан жэл “Буряад үнэнэй” жолоо бата бэхеэр бариһан Ардан Лопсоновичнай мандаа бусажа, урда ба ерээдүй сагуудые холбохонь.
Хорин хоёрдохиёо Буряадайнгаа түрүү хүнүүдые суглуулжа хүлгөөгөөбди. Тэрэ хэмжээ ябуулгада энэ-тэрэ шэнэлэлтэ хубилалтануудаа дэлгээд туршаабди, зарим тэрэмнай хүсэд бэелээшьегүй. Үшөөшье олон түсэбүүд бии, теэдшье үлүүсэ турьяад яахамнайб, хэлэһэнһээ - хэһэниинь, үгэһөө – үйлэнь дээрэ.
Гурбан зуун жаран табан хоногой туршада уужам Буряаднай мантан гүрэн түрынгөө амин алхасатай жэгдэ алхалаа, баярлаха сагта баярынь хубаалдажа, хүмэдхөө буулгаха үедэ тэгшэ нюдөө хюрыгаад ябаа. Уласхоорондын хэмжэээндэ түрэмнай хэсүүшэг байдалда һүүлэй хэды жэлдэ байбашье, харин зоноо урмашуулха, хүгжөөхэ ушарнууд багадаагүй. Энэл хэбээрээ ээлжээтэ жэлэйнгээ богоһо шанга алхаад ороё, хүндэтэ уншагшаднай.