Һаяхана албанай хэрэгээр Москва хото ошоод ябахадаа, эдеэ хоолой болон унаа тээбэриин сэнгүүдые наринаар анхарһан байнаб. Юуб гэхэдэ, гүрэнэй ниислэлдэ бүхы юумэнэй үнэ сэн үндэр гэжэ олон хүнүүд хэлсэдэг. Нэгэ хэды худалдаа наймаанай газараар ябаһанай удаа, һонирхолтой үзэгдэл адаглааб. Эдэ бүгэдые хүндэтэ уншагшадайнгаа һонорто дуулгахамни.
Тиимэшье үндэр бэшэ
Эсэшэнхэй мүртөө үлэн, амандаа нэгэ юумэ хээ һаа гэжэ ябатараа, Москвагай олон тоото зочид буудалнуудай нэгэндэ ороһоной удаа дүтэ байһан “Дикси” гэһэн магазин оложорхибоб. Шалтагаан гэхэдэ, “Победа” авиакомпаниин агаарай онгосодо эдеэлүүлдэггүй байшоо. Харин хэрэгтэй саарһа данса абаха газараа бэдэртэрээ, эдеэлхэеэшье һанангүй гүйгөө аабзаб даа.
“Эндэхи сэнгүүдые хараад, нюдэмни тархиингаа оройдо гарашахань гү?”- гэжэ шэбшэн, магазин ороһон байнаб. Теэд харан гэхэдэмни, Москвагай сэнгүүд Буряадай сэнгүүдтэй адлишуу байшаба. Өөһэдөө жэшээд үзыт. Янза бүриин колбаса 130-һаа 300 түхэриг хүрэтэр сэнтэй юм. Нэгэ килограмм үгэрсэ 107 түхэригтэ, помидор 90 түхэригөөр наймаалагдана.
Сагаан эдеэнэй зүйлнүүд ондо ондоо сэнтэй гээшэ. “Простоквашино” гэһэн һүн оройдоол 53 түхэригтэ худалдагдана. Манай Буряадта тус һүнэй сэн 70 түхэригһөө дээшэ байна. Москвагайхид 69, 89, 62, 80 түхэригөөр дуратай һү абаха аргатай. Эгээл хямда тоһон (бага тэбхэр) 44 түхэригтэ хүрэнэ. 89, 79, 149, 169 түхэригэй тоһон худалдаанда табигданхай. Мүн тиихэдэ 200 грамм зөөхэй 33, 75, 63 түхэригөөр наймаалагдана.
Лапша, кашанууд баһал эндэхи сэнтэй адли байна. Архиин зүйлэй сэн Буряадһаа балай илгаагүй.
Гэбэшье загаһанай болон мяханай сэнгүүд эрид ехэ байнхай.
“Дикси” гэһэн магазинда орёо байдалда ороһон хүн зондо туһа үзүүлэгдэнэ. Юрын зон эдеэ хоолой зүйлнүүдые тусхай газарта үлөөнэ. Удаань олзо багатайшуулда тэрэнь тараагдана.
Ресторанай эдеэ хоол
Москвада тиимэ бэлээр эдеэ хоолой магазин олохогүйш. Энээнһээ боложо, Ородой ниислэлэй айлшад ресторан, кафе орожо эдеэлнэ. Тиимэһээ Москва ехэ үнэтэй хото гэжэ тоологдоно гээшэ гү даа.
Улаан талмайда дүтэхэнэ асари томо “Охотный ряд” гэһэн худалдаа наймаанай түбтэ ганса хубсаһа хунар наймаалагдана бэшэ, мүн эдеэ хоол бариха газарнууд үргэнөөр дэлгэгдэнхэй. Япон, энэдхэг, грузин, итальян болон бусад 10 гаран арадай хоол ехээр дурадхагдана.
Булта газарнуудые дүхэриглэжэ хараад, нэгэндэнь одоошье тогтобоб. Гайхалтайнь гэхэдэ, 100 грамм эдеэнэй түлөө нэгэ адли сэн – 89 түхэриг. Шараатай мяха, загаһа абана гүш, шанагдаһан хартаабха, итальян спагетти һайшаагдана гү, рис, пиццэ эдинэ гүш – хуу 89 түхэригтэ. Абаһан эдеэмни эндэ 500 түхэригтэ хүрэшөө. Теэд садангүй үлэшөөб.
Москвагай шэмэг болохо газарнуудай нэгэн Арбат гээшэ. Эндэ дурасхаалай бэлэгхэнүүдэй дэлгүүрнүүд болон эдеэ хоол бариха газарнууд олохон юм. Москвагай эгээл гоё газарнуудтай магнитигуудые 25-һаа 150 түхэриг хүрэтэр мүнгөөр абаха аргатайт. Тиихэдэ элдэб яһатанай эдеэ хоолой газарнуудта алишье сагта бизнес-ланч орожо эдихээр. Жэшээлбэл, япон ресторанда үдэрэй комплексно хоол 380 түхэриг болоно. Мүн “Му-му” гэһэн кафедэ бизнес-ланч 280 түхэригтэ юм. Хапуустын салат, нэгэ багахан борщ, котлетэтэй вермишель, һүтэй сай, хоёр хилээмэ энэ сэндэ үгтэнэ.
Бүхы дэлхэй дээрэ мэдээжэ “Макдональдс” ресторанай таһагууд Москва хотодо хаа-хаанагүй үдэр һүнигүй хүдэлнэ. Телевизорээр амтатайгаар реклама хэһэн эндэхи эдеэ баһа амталха гэжэ шармайгааб. “Макдональдс” орожо, баһа 300 түхэриг хүрэтэр мүнгөө һалгааһан байнаб.
“Макдональдсһоо” гадна бургер, гамбургер, чизбургер, МакКомбо болон бусад түргэн эдеэ хоол худалдаха ресторанууд олон болонхой. Мүн тиихэдэ үйлсэ бүхэндэ кофе дурадхадаг газарнууд олоор нээгдэнхэй.
Ниислэлэй үйлсөөр, метро соо ябууд шууд эдеэлжэ, кофе уужа ябагшад мүн лэ олошорһон байна. Урдандаа иимэ байдалые ганса баруун гүрэнэй кинофильм соо харадаг һэмди.
Москвагай хүнүүд эдеэ хоол гэртээ, ажалдаа ехээр захидаг болонхой. Хүн зондо эдеэ тараагшад тусхай шара, ногоон хубсаһа үмдэжэ, нюргандаа термодулаасалгатай сүүмхэнүүдые үргэлөөд, урагша хойшо гүйлдэнэ.
Ниислэлэй түбтэ - буряад хоол
Олон гэгшын үндэһэ яһатанай эдеэ хоол соо манай амтатай буряад хоол Москвада олохоор. Һүүлэй хэдэн жэлдэ буряад ресторанууд эндэ бии болоо. Эгээл түрүүшүүлэй тоодо “Сэлэнгэ” ресторан 2000-аад онуудта үүдэеэ сэлиһэн түүхэтэй.
Үнөөхил “Охотный рядһаа” сэхэ Тверскойн гудамжаар 10-15 минутын хоорондо ябагаар “Сэлэнгэ” ресторан хүрэхэт.
"Сэлэнгэ" ресторанда
Буряад маягаар шэмэглээтэй ресторанда яһала олоор хүнүүд ябана. Хубсаһа хунараа тайламсаараа, ерэгшэд ресторанай амжалтануудтай танилсана. Баярай тэмдэгүүдэй хадаатай ханада манай “Буряад үнэнэй” Хүндэлэлэй грамота байһаниинь һайшаалтай. “Сэлэнгын” эзэн Донара Гэрэлтуевна Гордоева “Буряад үнэнэй” эмхидхэгдэдэг “Буряадай түрүү хүнүүд” гэһэн мүрысөөндэ түрүүлжэ гараа бэлэй. Тус грамота эгээл хүндэтэй газарта үлгөөтэй.
Москвагай болон ниислэлэй айлшадта элбэгээр буряад хоол дурадхагдана. Хушуур, цуйван, шарбин гэгшэдһээ гадна “хорхог” ерэһэн хүнүүдые һонирхуулна. “Эжын шүлэн”, “Хара шүлэн”, “Чингис Хаан”, “Бүхэлёор” болон бусад шүлэ ерэгшэд ууха дуратай гэжэ ресторанда хүдэлдэг басагад хөөрэнэ. Гэдэһэтэй мяхан, дамбар, эреэлжэ болон хотын шуһан хүн зониие гайхуулна.
Москвагай бусад ресторануудай сэнгүүдһээ “Сэлэнгын” эдеэ хоолой сэн бага гээд тоологдоно.
- Түрэл нютагһаа гаража ерэһээр, 30 гаран жэл болонхойб. Буряадайнгаа эдеэ хоол, Буряадаа һанахадаа, “Сэлэнгэ” ресторан ерэдэгби. Сэдьхэлээ тэгшэлжэ, буряад амтатай хоол баряад лэ, шэнэ дали ургаһандал ажалаа хэжэ эхилдэгби. Эндэ олоор Буряадай артистнар суглардаг. Ресторанай эмхидхэдэг элдэб үдэшэнүүдтэ хабаадахада, аятай даа, - гэжэ дуушан Владимир Албатаев хөөрэнэ.
Арадай һунгамалнууд юу эдинэб?
Ородой ниислэлдэ хүдэлжэ байһан Гүрэнэй Дүүмын һунгамал Алдар Валерьевич Дамдиновтай уулзаһан байнаб. Үнөөхил Охотный ряд дээрэ оршодог ажалдаа тэрэ намай уриба.
Гүрэнэй Дүүмын эдеэ хоол хаа-хаанаһаа үнэгүй гэжэ намда олон хүн хэлэһэн байна. Тэндэ ороо һаа, сэнгүүдыень һайнаар һанажа абаарай гэжэ тэдэ хэлээ. Абаһаар лэ, тэндэхи сэнгүүд тиимэшье бага бэшэ гэжэ хэлэхэ хэрэгтэй. Бизнес-ланч 270-һаа 400 түхэриг хүрэтэр байна.
Жэшээлбэл, үзэмтэй манна каша 29 түхэригөөр, ешмээнэй хүрпээн каша 30 түхэригөөр, хапууста 11 түхэригөөр, хартаабхын пюре 44 түхэригөөр наймаалагдана. Шүлэ ууха гэбэл, рассольник 55 түхэригтэ юм. Хониной мяхатай харчо шүлэ абабал, 121 түхэриг гаргаха болонот. Һонирхоходомни, хониной мяхан Хальмагһаа асарагдаһан байба.
Эгээл үнэ сэнтэй эдеэн - һархяагтай судак загаһанай котлетэ. Тэрэ 160 түхэригтэ хүрэнэ бшуу. Судак загаһанай яһагүй мяха эдихэ гээ һаа, аяар 237 түхэриг гаргашалхат.
Ананас, апельсин, киви, хурма гэхэ мэтэ фрукт 100- 100 граммаар худалдагдана. Мүн сагаан эдеэн баһа 100 граммаар табигданхай. Жэшээлбэл, 100 грамм ааруул 66 түхэригтэ байна.
Уһанай сэн яһала ехэ байна гэжэ хэлэхээр. 500 граммай “Боржоми” уһан 120 түхэригтэ юм. Мүн тиихэдэ 330 граммай миин уһан 55 түхэригөөр наймаанда байна.
Унаа тээбэриин үнэ сэн үндэр
Манай Буряадай үбгэд, хүгшэд Москва ошобол, иигэжэл хэлэхэ байгаа гээд һанагдана. Москва ябахаһаа урид тэндэ ажаһуудаг нүхэдөөрөө хөөрэлдэһэн байнаб. Аэропортһоо метрогой түрүүшын буулгалта хүрэтэр автобусто һуугаарай гэжэ намда хэлээ. Би тиихэдэнь аэроэкспрессэр ябаха һанаатай байгааб.
- “Внуково” аэропортһоо аэроэкспресс поезд аяар 500 түхэриг юм. Ши хадаа автобусоор ябабалшни, 50 түхэриг болохо. Удаань ошохо газартаа метрогоор ошоорой. Энэ ябадалшни тиимэ удаан саг болохогүй, - гэжэ москвагайхид намда ойлгуулаа һэн.
Самолёдоор намтай суг хамта ниидэһэн “Востоктелеинформ” гэһэн мэдээсэлэй албанай хүтэлбэрилэгшэ Анжелика Мешкова ниислэл хүрөөд, ошохо газартаа такси абаад ябахамнай гэжэ мэдүүлээ. Анжелика Мешкова хадаа басагантаяа үхибүүдэй бүхэроссиин эрдэмэй практическа конференцидэ ошожо ябаа. Тэдээнтэй суг хамта метрогой түрүүшын буулгалта хүрөө һэм.
Метродо билет абахадаа, гайхажа бараагүйб. Юуб гэхэдэ, нэгэ ябалга 55 түхэриг байшоо. Намтай суг хүдэлдэг нүхэрэй дамжуулһан “Тройка” гэһэн картаар ябахада, хүнгэлэлтэ үгтэнэ. Энэ картатай хүн зон метродо болон автобусто 38 түхэригөөр ябана.
Авторай гэрэл зурагууд