Хүмүүжүүлэгшэтэй зүбшэлгын хэшээлэй үедэ
Үнгэрһэн жэлэй һүүл багта Хэжэнгын “Сэсэг” гэһэн хүүгэдэй сэсэрлигэй хүдэлмэрилэгшэдэй бүлэг Бүхэроссиин грант шүүжэ, һургуулиин наһа гүйсөөгүй эрэмдэг бэетэй үхибүүдэй түрэлхидтэ хүмүүжүүлгын, һургалгын, элүүржүүлгын асуудалнуудаар туһалха “Тамир” гэһэн зүбшэлгын түб нээгээ.
Үгтэһэн 3 сая 664 мянган түхэригэй 2 сая 800 мянганиинь тусхай тоног түхеэрэлгэнүүдтэ гаргашалагдаа, 500-гаад мянган түхэриг сэсэрлигэй хүдэлмэрилэгшэдэй һуралсалда, мэргэжэл дээшэлүүлгэдэ шэглүүлэгдээ. Үлээшэ мүнгэниинь хажуу тээһээ хабаадуулагдаһан мэргэжэлтэдэй салин түлбэридэ хараалагдаа.
Эрэмдэг бэетэй хүүгэдые үндылгэхэнь бэрхэ гэжэ мэдэнэбди. “Сэсэг” сэсэрлигтэ иимэ 6 багашуул хүмүүжүүлэгдэдэг, харин бүхыдөө Хэжэнгын аймагта энэ наһанай 22 үхибүүн тоологдоно. Олонхинь нютаг нютагайнгаа сэсэрлигтэ ябадаг, зариманиинь гэртээ хүмүүжүүлэгдэдэг, мүн хэбтэриин шахуу хүүгэдшье бии. Тиин “Тамир” түбэй мэргэжэлтэдэй ашаар эдэ үхибүүдэй түрэлхид бүхы хэрэгтэй зүбшэл заабарияа абажа, үри хүүгэдээ үндылгэхэдэнь һураггүй бэлэн болохо.
Сэсэрлигэй ахамад хүмүүжүүлэгшэ Геля Цындежаповагай хэлэһээр, һаяын сагта тоног түхеэрэлгынгээ асарагдахада, “Тамир” түб дүүрэн хүсэндөө хүдэлжэ эхилхэ.
“Скалодром, эмшэлэлгын олон үүргэтэ дүүжэн, Мария Монтессориин онол аргаар тоо бодолго заалгада ба хэлэлгэ хүгжөөлгэдэ туһатай түхеэрэлгэнүүд, педагог-психологой ажалдаа хэрэглэхэ олон үүргэтэ оньһон, компьютертай болохобди, - гэжэ Геля Баировна урматайгаар хөөрэнэ. - Манай сэсэрлиг 1979 ондо нээгдэһээр, балай тиигэжэ шэнэлэгдээгүй. Тиимэһээ газаагаа хүүгэдэйнгээ наадаха гоё талмай захяабди. Гадна һорилгын бүмбэгэнүүдһээ эхилээд, элдэб янзын тусхай нааданхайнуудай асарагдахые хүлеэжэ байнабди”.
Түсэлэй ёһоор, “Сэсэг” сэсэрлигэй 7 хүмүүжүүлэгшэ Москва хотодо Мария Монтессориин уласхоорондын түбтэ һуралсал гаража ерээ. Тиигэжэ, жэшээнь, Сэсэгма Михайлова хүнгэдхэн тааруулһан физкультурын инструкторай үнэмшэлгэтэй болоо, Вера Мархаева - эрэмдэг бэетэй хүүгэдтэй хүдэлхэ тьютор, Дарима Шойропова – педагог-психолог. Гадна Улаан-Үдын 173-дахи “Росинка” сэсэрлигые даагша, уласаймнай мэдээжэ логопед-дефектолог Татьяна Подтележниковатай хэлсээн баталагдажа, дүй дүршэл ехэтэй мэргэжэлтэн һара бүхэндэ Хэжэнгэ ошодог байха. Мүн лэ түсэлэй ёһоор, “Тамир” түбтэ заабол эмшэн медсестра хоёр хараалагдана. Хэжэнгын түб больницын педиатр эмшэн Дарима Санжимитыпова, медсестра Саяна Цыренжапова гэгшэд хүүгэдэй бэеын элүүрые ходо шалгажа, эхэ эсэгэдэнь туһалжа байха юм. Мүнөө дээрээ тэдэ 18 түрэлхидтэ лекци үнгэргөөд байна. Гадна “Тамир” түбэйхид бүлэгөөр ба тус тустань заабари зүбшэлгын хэшээлнүүдые эмхидхээ.
Түрэлхид психологһоо заабаринуудые абана
“Түрэлхид ехэ баярлаа. Бидэ нэн түрүүн ямар туһа хүргэхэ аргатайбибди гэжэ тодорхойлнобди. Үхибүүнэй хэлэндэ мохоо һаань, логопед хүдэлхэ, хүл гарайнь муу һаа, хүнгэдхэн тааруулһан физкультурын инструктор туһалха. Педагог-психолог хүмүүжүүлгын, һургалгын асуудалнуудаар заажа үгэхэ, - гэжэ Геля Баировна онсолоо. – Гадна аймагайнгаа бусад сэсэрлигүүдэй хүмүүжүүлэгшэдтэ иимэ хүүгэдые хүмүүжүүлхэ онол аргын талаар туһаламжа үзүүлжэ боломоор. Жэшээнь, Хөөрхэһөө сэсэрлигэйнь хүмүүжүүлэгшэ нютагайнгаа үбшэн хүүгэдэй түрэлхидые суглуулаад, манай түб ерэхэ аргатай. Тиигэжэ тэрэ өөрөөшье ажалдаа хэрэгтэй зүбшэл заабари абаха, мүн түрэлхид хүүгэдэйнгээ гажалта заһахаар туһатай мэдэсэнүүдтэй болохо, ашаг үрэтэй упражненинүүдые хэжэ һураха”.
Иимэ түбэй хүдэлжэ эхилһэниинь, үнэхөөрөөшье, ехэ удха шанартай. Юуб гэбэл, хэрбээ Улаан-Үдэдэ байдалай ондоо һаань, хүдөө нютагуудта үбшэн үхибүүн, тэрэнэй түрэлхид ехэнхи ушарта дүрбэн ханын хоорондо хаагдашахаяа һанадаг гээшэ ааб даа. Үхибүүнтэеэ ошохо газаршье олдоод орхихогүй. Бодоод лэ ниислэл хото руу харгылха арга байхагүй... Харин мүнөө “Тамир” түб нээгдэжэ, түрэлхидтэ ехэ найдал түрүүлбэ гээшэ.
Үнгэтэ элһээр наадуулжа, хүүгэдые хүгжөөхэдэ ашаг үрэтэй
Мария Монтессориин түбтэ
“Сэсэг” сэсэрлигэй хүдэлмэрилэгшэд Москва хотодо һуралсал гарахадаа, Мария Монтессориин онол аргаар хүдэлдэг “Фонарик”, “Гениальный малыш” гэһэн хүүгэдэй сэсэрлигүүдэй ажалтай танилсаһан байна. Тэндэ хараһан үзэһэн тухайгаа Геля Цындежапова иигэжэ хөөрэнэ:
- Монтессориин түбөөр бидэ үнинһөө хойшо һонирходог һэмди. Грант шүүһэнэйнгээ ашаар һаналаа хүсэлдүүлбэ гээшэбди. “Фонарик”, “Гениальный малыш” сэсэрлигүүд манай заншалта сэсэрлигүүдһээ тад ондоо. “Аалихан дуугара, яаралгүй хэ” гэһэн дүрим баримталдаг. Минии адаглаһан бүлэгтэ 3-6 наһатай 19 үхибүүн байгаа. Жэгтэйнь гэхэдэ, хүн бии юм гү, али үгы юм гү гэжэ һанахаар хон-жэн. Хүүгэд мультиварка соо өөһэдөө эдихэ юумэеэ шанажархина, амһартаяа өөһэдөө зайлана, хүүхэлдэйнүүдэйнгээ хубсаһа угаана. Бидэ гайхалаа баража садаабди. 3 хүмүүжүүлэгшэ байна. Тэдэшни үхибүүдэй нэгыеньшье харааһаа алданагүй. Үшөө нэгэ гайхалтай юумэн гэхэдэ, нэгэшье нааданхай харагдаагүй. Тойроод - гансал гэр бараанда хэрэглэгдэдэг хэрэгсэлнүүд. “Юундэ гээшэб?” – гэжэ асуухадамни, үхибүүд гэрһээ дуратай нааданхайнуудаа асараад, кабинка соогоо орхёод, сүлөө сагтаа тэдэнээ гаргажа наададаг гэжэ ойлгуулаа. Зүгөөр гол “нааданхайнуудынь” – гэр бараанай хэрэгсэлнүүд. Багашуул наадангаа, ажабайдалдань хэрэгтэй дадал дүршэлтэй болоно. Жэшээнь, хубсаһа хатаадаг хабшуурнууд байна гүб даа. Бидэ хатуу саарһаар нара зураад, хабшуурнуудаар элшэнүүдыень хэжэрхинэ гүбди. Харин тэндэ тон үүргээрнь хэрэглэнэ: багашуул хүүхэлдэйнүүдэйнгээ хубсаһа угаагаад, хабшуураар хабшажа хатаана. Хүмүүжүүлэгшэдэйнь хэлэһээр, бодото ажабайдалда наранай элшэнүүд - хабшуурнууд бэшэ ха юм. Тиимэһээ юумэн бүхэн удхаараа, үүргээрээ хэрэглэгдэхэ ёһотой. Тэрэшэлэн, үхибүүдтэ худал хутага үгэхэгүй ха юмта гээд, үнэн хутагануудые барюулна. Адашана ааб даа гэхэдэ, хүүгэдэй гэмэлтэхэгүйн тула бидэ хаража байнабди, зорюута тусхай һуралсал гаранхайбди гэжэ ойлгуулаа. Үнэхөөрөөшье, хэдэн үдэр адаглахадамнай, нэгэшье үхибүүн гэмэлтээгүй. Хүүгэд хэхэ юумэеэ өөһэдөө шэлэнэ. Хэншье тэдэниие баадханагүй. Һонин лэ даа. Бүхэли үдэрөөрөө адаглажа һуухаар. Бидэ энэ онол арга бүхэлеэрнь нэбтэрүүлхэеэ байна бэшэбди, гансал хэрэгтэйгээ халан абахабди. Бүлэг бүхэндэ али нэгэ зүйлыень нэбтэрүүлхэбди. Жэшээнь, хабшуурнуудыешье сэхэ үүргээрнь хэрэглүүлхэдэ болохо. Энэ талаараа тус онол арга ехэ һайн гэжэ һананаб.
Светлана Токтоновагай гэрэл зурагууд