Январиин 21-нэй үглөөгүүр Ивалга аймагай Гүрэльбэ нютагта хүндэтэ айлшад - Буряад Уласай Толгойлогшо Алексей Цыденов, Арадай Хуралай Түрүүлэгшэ Владимир Павлов, Буряад Уласай Толгойлогшын болон Засагай газарай Захиргаанай Хүтэлбэрилэгшын орлогшо – нютаг дэбисхэрэй хүгжэлтын хорооной түрүүлэгшэ Виктор Аюшеев, Засагай газарай түшэмэлнүүд буужа, шэнэ һургуули нээлгын баяр ёһололдо хабаадаа.
Шэнэ һургуулиин үндэр, үргэн ехэ тамирай танхим соо сугларһан олон зоной урда хонхо, алтан түлхюур бариһан хүүгэдэй дуратай Мальвина Буратино хоёр гаража, шэнэ һургуулиин нээлгын найрые уран үгэнүүдээр эхилбэ. Һурагшад амаршалгын хатар гүйсэдхэбэ. Түрүүлжэ Ивалга аймагай засаг дарга Виктор Очиров үгэ хэлэхэдээ, нэн түрүүн энэ ехэ хэрэг Буряадай Толгойлогшын, Арадай Хуралай, Буряад Уласай засагай газарай дэмжэлгэ туһалалгаар, тиигээд аймагай, Гүрэльбын захиргаануудай, арад зоной оролдолго хүсөөр бүтэбэ гэжэ тэмдэглээ.
Буряад Уласай Толгойлогшо, Засагай газарай Түрүүлэгшэ Алексей Цыденов энэ ехэ баяраар бултаниие халуунаар амаршалаад, барилгашадта баяраа мэдүүлээ. Тиигээд үшөө һургуулидатнай ерэхэ харгы шэнэлхэбди гээд, шэнэ һургуулидаа түрүүшын хонхо жэнгирүүлхынь эрхим гурбан һурагшадые уряа.
Арадай Хуралай Түрүүлэгшэ Владимир Павлов амаршалхадаа, гүрэнэй зүгһөө ургажа ябаһан үетэниие һурган хүмүүжүүлхын хэрэгтэ ехэ анхарал хандуулагдана гэжэ бодотоор хаража байнабди, һая нааша бүхы Буряадта гурбан халаанда һураха гээшэ болигдохо гэжэ найдуулаа.
Һургуулиин байшан түргэн саг соо бодхоһон “Строй-Инком” нэгэдэлэй захирал Булат Баиров Гүрэльбын һургуулиин захирал Баир Гармаевта “алтан түлхюур” барюулжа, айлшадые шэнэ һургуулиин һаруул һайхан таһагуудые харахые уриба. Таһагууд бүхэн шэб шэнэхэн хэрэгсэлнүүдээрээ нюдэ баярлуулна. Илангаяа ажалай таһагууд мүнөө сагай элдэбын түхерэлгэнүүдээр хангагданхай. Хүбүүдэй болон басагадай ажалда дүршэхэ арга хүсэд дүүрэн олгогдонхой, гансал һураха оролдолго хэрэгтэй. Уласай Толгойлогшо тэдэ багшанартайшье гар гараа барилсажа, дэмбэрэлтэ ажалдань амжалта хүсэбэ. Хэлэ бэшэг шудалха таһагууд мүнөө үеын оньһон түхеэрэлгэнүүдээр хүсэд дүүрэн. Эдэниие хараад, Болбосоролой яаманай сайд Баяр Жалсанов һурагшаднай сүлжээ холбооной элдэбын дамжуулгануудта орожо, сагаа барангүй, эрдэмээ дээшэлүүлхэеэ оролдог гэжэ хүсөө.
Анна Огороднигой гэрэл зурагууд