​​Эхэ орондоо үнэн сэхээр алба хэгшэдые амаршалба

Ородой Холбоото Уласай Прокуратурын байгуулагдаһаар 297 жэлэй баярта зорюулагдаһан суглаан январиин 18-да үнгэрөө.

Агуу 1 дүгээр Пётр хаанай байгуулһан прокуратура гурбан зуугаад жэл соо гүрэн түрын хуулинуудые сахилгые алдалтагүй шалган хинана. Харин Буряадай прокуратура залуушье һаа, һая 95 жэлэйнгээ ойе тэмдэглэһэн, баһал Пётр хаанай “Государево око” нэрлэһээр, уласайнгаа хуули захиралтануудые жэншэдгүйгөөр хүн бүхэнэй сахижа байхыень шалгажа байна.

Баярай урдахана Буряадай прокуратурада олон тоото амаршалганууд ерээ. Ородой Холбоото Уласай юрэнхы прокурор Юрий Чайкын, Генпрокуророй орлогшо – сэрэгэй Прокурор, Буряадһаа гарбалтай Валерий Петровой, можо, хизаарнуудай прокурорнуудай, сайдуудай Баярай бэшэгүүд ерэхэһээ гадна, Буряад Уласай прокурор Галина Ковалёвае гүрэнэй ехэ зэргэтэй болоһоорнь (сэрэгэйхеэр – генерал) амаршалганууд олон байгаа.

- Баярта энэ үдэр эгээл дулаахан үгэнүүдые ветерануудтаа зорюулнабди. Тэдэнэй баян дүй дүршэл халан абажа, ёһо гуримыень нангинаар сахижа ябахадаа, мүнөө үеын прокуратурын хүдэлмэришэд даалгагдаһан уялгаяа нэрэтэй түрэтэйгөөр бэелүүлнэ, - гэжэ Галина Николаевна онсолон тэмдэглээ. Энэ жэл Буряад Уласай прокуратурын 32 ажалшан гүрэнэй үндэр шагналнуудта хүртөө.

Арадай Хуралай Түрүүлэгшэ Владимир Павлов арадай һунгамалнуудай зүгһөө амаршалхадаа, бүхы шатада хүдэлдэг прокурорнуудай, тэдэнэй хүтэлбэрилэгшэдэй һайн ажал тэмдэглээд, Арадай Хуралтай нягта холбоотойгоор ажал хэрэгээ ябуулна гэжэ онсолоо. Тиигэжэ Буряадай амгалан тайбан байдалай түлөө оролдоно.

- Юрын бэшэ ажал хэрэгээ эрхимээр бүтээжэ ябаһандатнай баярые хүргэнэб. Гүрэн түрэдэ үнэн сэхээр алба хэжэ ябаһан таанар баһа юрын хүнүүд бэшэт. Хүн бүхэндэтнай элүүр энхые, аза жаргал хүсэнэб, - гэжэ Владимир Анатольевич баяраа мэдүүлээ.

Буряад Уласай Засагай газарай Түрүүлэгшын орлогшо Пётр Мордовской Буряад Уласай Толгойлогшо Алексей Цыденовэй амаршалгын бэшэг уншаа.

- Баярта энэ үдэр журамта ажалаа харюусалга ехэтэйгээр хэжэ ябаһан бүхы ажалшадта, мүн баһа ветерануудта онсо талархалаа мэдүүлнэб. Үндэр наһатай болоошье һаа, мүнөөдэршье сарюун зандаа ябажа, Эхэ орондоо, гүрэнэй хуулида үнэн сэхэ ябаха, харюусалгатайгаар ажал хэрэгээ бүтээхэ талаар залуу үетэндэ үндэр жэшээ харуулнат. Саашанхи ажалдатнай амжалта хүсэнэб. Элүүр мэндэ, аза талаантай, эльгэ дулаан, энхэ амгалан ябыт даа, - гэжэ хандалга соо хэлэгдэнэ.

Баярай энэ амаршалгада өөрөө Пётр Мордовской болон Буряад Уластахи ахамад федеральна инспектор Сергей Ромахин нэгэдээ.

Амаршалгануудай удаа уласай прокуратурын шагналнууд түрүүшүүлдэ барюулагдаа.

Антон Иршутовай гэрэл зураг