​​Дмитрий Миндиашвилиин тэмсээнэй дүнгүүд

Арсалан Будажапов (баруун гарһаа)

Үнгэрһэн долоон хоногой эсэстэ Красноярск хотодо барилдаагаар бүхэроссиин нээмэл мүрысөөн болоһон байна. Эндэ Буряадай тамиршад табан медальда хүртөө.

Бүхы дэлхэй дээрэ суута һоригшо Дмитрий Миндиашвилиин нэрэмжэтэ барилдаанай академиин шангуудта хүртэхын түлөө бүхэроссиин мүрысөөн арба гаран жэлдэ болодог юм. Һүүлэй хоёр жэлдэ тус хэмжээ ябуулгада шэлэн абалгын шата үнгэрдэг болонхой. Эндэ түрүүлһэн барилдаашад “Гран-при Иван Ярыгин” гэһэн уласхоорондын мүрысөөндэ хабаадаха эрхэдэ хүртэнэ. Тиимэһээ 2018 онһоо хойшо тус мүрысөөндэ хабаадагшадай тоо эрид дээшэлһэн байна. 470 гаран тамиршад гурбан үдэрэй туршада эрхимүүдые элирүүлээ.

Эхэнэрнүүдэй дунда Алёна Сангадиева түрүүлжэ гараа. 57 килограмм хүрэтэр шэгнүүртэ тэрэ дүрбэн уулзалгада хабаадажа, финалда Красноярскын Александр Ниценко гэгшые 8:3 гэһэн тоотойгоор шүүһэн байна.

Шангай гурбадахи һууринуудые Наиля Абзалова болон Даяна Гармаева гэгшэд эзэлээ.

Эрэшүүлэй дунда шанга тулалдаануудта Буряадай 20 гаран тамиршад сооһоо оройдоол хоёрынь медаль абаһан байна.

74 килограмм шэгнүүртэ барилдаһан Арсалан Будожапов һайн барилдаа харуулжа, Иван Ярыгинай дурасхаалда зорюулагдаһан уласхоорондын мүрысөөндэ хабаадаха эрхэдэ хүртэбэ. Дагестанай хоёр болон Саха-Яхад Уласай хоёр барилдаашадые тэрэ илажа гараа. Финальна уулзалгада Красноярскын Никита Сучковтой ана-мана тулалсажа, 3:5 гэһэн тоотойгоор шүүгдээ. Тиимэһээ Арсалан шангай хоёрдохи һуури эзэлһэн байна.

65 килограммай шэгнүүртэ Алексей Боровицкий шангай һуурида гаража шадаа. Тэрэ зургаан уулзалга үнгэргөө. Тус мүрысөөндэ илалта туйлаһан Тува угтай Начын Кууларта шүүгдэжэ, хүрэл медальда хүртөө.

Январиин 24-дэ Красноярскда уласхоорондын мүрысөөн эхиеэ абахань. Эрэшүүлэй дунда Буряад Уласые ори гансаараа түлөөлһэн Арсалан Будожапов хибэс дээрэ гараха. Эхэнэрнүүд бүри олоор хабаадаха юм.