Данзангийн Батсайхан, Валерий Цыбиков, Бушуу Амарсайхан
Бүхы дэлхэйн буряадууд хаанашье уулзахадаа, баяр баясхалангаа бэе бэедээ мэдүүлжэ, үнэхөөр хүхин баясажа, дахин дахин уулзахаяа хүсэдэг. Илангаяа сагаа алхажа, шэнэ жэлдэ оробобди гэжэ, Сагаан һара соо уулзахаяа хүсэдэг. Мүнөө сагай эрхээр бэшэгээршье, утаһааршье, сүлжээ холбоогооршье ушаржа, һонин һорьмойгоо андалдаха арга боломжонууд хэды байбашье, улаан нюураараа уулзаха гээшэмнай юунһээшье үлүү юм байна.
Үнгэрһэн жэлэй түгэсхэлдэ үнгэргэгдэһэн “Буряад хэлэн 21-дэхи зуун жэлдэ” гэһэн уласхоорондын хуралда арадай дархан Валерий Цыбиков Монголдохи буряад найзанартаяа уулзаһандаа ехэ баярлаа. Тэдэнэр 2006 ондо түхэреэн ехэ Түнхэндэ үнгэрһэн “Бүхэдэлхэйн үсөөн тоото арадуудай нааданда” танилсаһан юм. Арадай дархан, ирагуу найрагша Валерий Цыбиков Монгол Уласай Ехэ Хуралай сурбалжалагша-гэрэл зураг буулгагша Хальбай Данзангийн Батсайхантай ушарһанаа ехэ дээрэ тоолодог. Бэрхэ сэтгүүлшэ Монголой профессор, анагааха ухаанай эрдэмэй доктор, эмнэлгын “Хазаадай” түбэй захирал, Захааминай Нурта нютагһаа гарбалтай Жамбын Балгантай танилсуулаа. Тэрэ нааданай үедэ (февралиин дунда) гэнтэ дулааржа, буряад арадай түлөөлэгшэдэй уулзажа байһанда баярлаһандал, мундаргануудай хормойдо хабарай һайхан байдал тогтоо һэн. Теэд айлшадай мордоходо, һөөргөө үбэл буугаа... Эдэнэр Улаан-Баатарта “Алтаргана” наадандашье уулзаа.
Мүнөө уулзахадаа, буряад-монгол дуунуудаараа ехэтэ һонирхоо.
Валерий Дашеевич Захаамин хангайнгаа дуу эхилэн хангюурдаа:
Зэдэ голой эрьедэ
Зунайш болоһы мэдээгүйб.
Зугаалан баярлажа ябахадаа,
Зууш хүрэһэнөө мэдээгүйб.
Байгал далайн эрьедэ
Бороогойш ороһы мэдээгүйб.
Баярлан, хүхижэ ябахадаа,
Бууралш болһоноо мэдээгүйб.
Дуугынь шагнаад, Дорнод аймагай Цагаан-Овоо сүмын Баянголой буряад һур харбаашадай холбооной дид-түрүүлэгшэ Бушуу Амарсайхан хоолойгоо заһажа, бидэшье иигэжэл дууладагбди:
Набша сэсэгтэ нютагтайл аад,
Намар болоһые мэдээгүйб.
Наһаара хүхюу ябаһан аад,
Наһатайхан болоһоноо мэдээгүйб.
Үнгын сэсэг нютагтайл аад,
Үбэлхэн болоһые мэдээгүйб.
Үргэлжэл хүхюу ябаһан аад,
Үбгэнхэн болоһоноо мэдээгүйб,
- гэжэ харюу дуугаа хангюурдаад, сагай ошохые мэдэнгүй, эб хамта ерээдүй руу дабшажа, үндэһэн дуугаа үеын үедэ дамжуулжа ябая гэжэ ехэтэ баяраа мэдүүлээ.
Аркадий Батомункуевай гэрэл зураг