1827
2019 оной январь һарада Аха аймагта оптоволокно татагдажа, хурдан инетернедтэй болобо. Аха аймагай түб Өөрлиг болон Саяны, Сорог һууринуудай ажаһуугшадта интернет-холбоо бариха арга олгогдобо. Тиигэжэ Буряад Уласай бүхы аймагуудай түбүүдэй ажаһуугшад хурдан интернедтэй ба цифровой телевиденитэй болоо.
250-һаа 500 хүрэтэр ажаһуугшадтай һууринуудта «Устранение цифрового неравенства» гэһэн федеральна программын хэмжээндэ барилга ябуулагдаа. Буряад Уласта 250-һаа 500 хүрэтэр ажаһуугшадтай 120 нютагууд тоологдоно. Тэдэнэй 65-ниинь интернедтэй болоо. Бэшэ 55 һуурин 2019 ондо сүлжээ холбоонтой болохо юм.
Буряад Уласай Аха аймагай ажаһуугшад 100 Мбит/с интернедтэй болохоһоо гадуур цифровой телевидени хараха аргатай болобо. Буряадай Толгойлогшо Алексей Цыденов Аха аймагай интернет холбоогой шанар шалгажа, аймагай түбэй больницатай видео холбоо бариһан байна.
- Буряад Уласай бүхы аймагуудай түбүүд хурдан интернедтэй болоһониинь һайшаалтай. Энэ хадаа ажабайдал һайжаруулха талаар ажал хэгдэнэ. Саашадаа 100-һаа дээшэ ажаһуугшадтай һууринуудые «Цифровая экономика» гэһэн федеральна түсэлэй тогтоолоор интернет холбоотой болгохобди, - Алексей Цыденов хэлэбэ.
Интернет татаха талаар ажал 2018 оной август һарада эхилһэн байна. Барилгын ажалда бүхыдөө 108 сая мүнгэн һомологдоо.
Хуби ниилүүлһэн нээмэл «Ростелеком» бүлгэмэй Буряадтахи таһагай захирал Андрея Здаровай хэлэһэнэй ёһоор, 2019 оной хабар Түнхэн болон Аха аймагуудта интернет холбоотой болгохо талаар ажал үргэлжэлүүлэгдэхэ гэжэ түсэблэгдэнэ.
