Ивалгын дасанда Бандида хамба лама Дамба Аюшеев түрүүтэй Дамба-Даржаа Заяаевай нэрэмжэтэ буддын шажанай ехэ һургуулиин багшанар буряад уран зохёолой дээжэдэ оролсодог энэ ехэ сударые эхэ бэшэгһээнь мүнөөнэй буряад хэлэндэ оруулна. Тиихэдээ Дамба хамба бүхы дасануудай түлөөлэгшэдтэй болон Буряад Уласай Засагай газарай түлөөлэгшэдтэй, Арадай Хуралай һунгамалнуудтай гайхамшагта зохёолые хэды дахин зүбшэн хэлсээ.
Хайбзан дооромбо
Худанай дасанай дооромбо лама Эрдэни-Хайбзан Галшиев “Хоёр ёһоной абаха, орхихые үгүүлэгшэ Бэлигүүн толи” гэжэ зохёолоо XIX зуун жэлдэ түбэдөөр болон хуушан монголоор бэшэһэн байгаа. Тэрэнэй шаби Чойдог Ванчиков энэ гүн ехэ зохёолые ашата багшынгаа захяагаар 1915 ондо хуушан монголоор найруулааб гэжэ бэшэнэ.
Эрдэни-Хайбзан Галшиев (1855-1915) зоной дунда Хайбзан дооромбо болон Мархаанзайн дооромбо гэжэ суутай байгаа. Зохёолнуудаа рабжамба Агваан Лэгшэд нэрээр толилдог байһыень Чойдог шабинь бэшэнэ. Хайбзан дооромбо арба гаран жэлдэ Баруун Жуугай (Һаса) Брайбун хиидтэ һуража, дээдын һахилда хүртөө. 1897 ондо түрэл нютагаа бусажа ерээ.
Домог
Замдаа Лавран хиидэй эрдэмтэ ламанартай гурбан хоног шойро хаялсажа, эрдэмээ туршалсаа. Тииһээр дасанай шэрээтэ энэ эрдэмтэ ламые илахагүйбди, ганса эрдэмээрээ шалгарна бэшэ, үшөө гүн ехэ бэлигүүн ухаатай юм байна гэжэ хэлэһэн гэхэ. Тиигээд тэдэ ламанар иимэ бэлиг түгэлдэр хүн бурханда үргэл болохо, тархиинь хохимойе габла болгохо ёһотой гэлсэбэ. Энээниие дуулаһан Эрдэни-Хайбзан нютагайнгаа сахюусадта, Шалсаана-Буурал баабайдаа хандаа. Үглөөгүүр дүрбэн ламанарай тэрэниие абаашахаяа ерэхэдэ, гэнтэ дээрэһээ шанга абяан соностобо. “Үүдэндэ моритой үбгэн ерээд, бултыемнай харбахаяа байнал... үргэлөө һэлгэел!” – гэлдэжэ тэдэ зайлаһан гэхэ. Тэрэ гэһээр Лавран дасанай гантиг табсантай гэшхүүр дээрэ Шалсаана-Буурал баабайн мориной хүлһэнэй дуһалнуудай нүхэнүүд, хойто хоёр хүл дээрээ соройжо бодоһон моринойнь туруунуудай сараанууд мүнөөшье элихэнээр харагдажа байдаг гэлсэгшэ.
Зүблэлтэ засагай үедэ
20-дохи зуун жэлэй 20-30-аад онуудаар урдын буряадууд өөрын бэшэмэл зохёолгүй байһан, байхадаашье хуул шажан мүргэлдэл хабаатай ном сударнууд байһан гэжэ, түбэдөөршье, хуушан монголооршье бэшэгдэһэн номууд усадхагдаһан, таһа хоригдоһон юм. Тиибэшье, засагай хатуу хэһээлтэһээ айнгүй, үсөөхэн тэдыгээршье һаань, гүн удхатай зохёолнуудые нюусаар буулгажа абадаг буряадууд олон байгаа. Тиимэ зохёолнууд зоной дунда дэлгэрэнхэй гэжэ Б.Д. Дандарон, Л.Ж. Ямпилов эрдэмтэд мэдүүлһэн. Хэблэдэг барнуудые ураар һиилэгшэ Содном Бодиев “Бэлигүүн толи” ном академик Дамдинсүрэндэ 1960 ондо бэлэглээ. Эгээл тодо бэшэгүүд Нимбуев Дашажамсада болон Доржын Цыремпилдэ хадагалагдажа байгаа. Эдэ бэшэгүүдые шэнжэлжэ, хэлэ бэшэгэй эрдэмэй доктор Цырен-Анчиг Дугарнимаев 1966 ондо ородоор “Зерцало мудрости, разъясняющее принимаемое и отвергаемое по двум законам” хэблүүлээ. Теэд тэрэ сагай эрхээр олониитэдэ ехээр мэдэгдээгүй, тараагдаагүй. Тэрэниие хамба лама Жэмбэ Эрдынеев уншаад, түбэд, монгол бэшэгүүдые зэргэсүүлжэ, дутаг зохёолнуудыень нэмээд, Цырен-Анчиг Дугарнимаевта дамжуулаа. Сагай һайжархада, ород, буряадаар 1993 ондо хэблүүлэгдэжэ, одоол уншагшадтаа хүрөө.
Эрдэни-Хайбзан Галшиевай “Хоёр ёһоной абаха, орхихые үгүүлэгшэ Бэлигүүн толи” гэжэ зохёол эртэ урдын Энэдхэгтэ дэлгэрһэн “Субашид” гэжэ зохёолдо дүтэрхы уран аргаар зохёогдоһон бүтээл юм. Галшиев багша өөрөө бэшэһэн байна: “Сажа-Бандида Гунгаажалцанай (Сахьяа Бандидын) “Эрдэнитэ сан субашид” зохёолдо түшэглөөб гэнэ. Бэе ба зөөри сахилга, эрдэм ном шудалалга, һэримжэтэй ябалга, дайсан болон ураг саданда хандалга, хожомые уридшалан бодолго, буян үйлэдэлгэ гээд лэ 8 бүлэг 1000 шүлэгһөө бүридэнэ. Хүнэй хадуужа абахаар дүрбэн мүртэй шүлэгүүдэй түрүүшын хоёр мүр ажабайдалай али элдэб ушарнуудта яажа бэеэ абажа ябахаб гэжэ заана, харин нүгөө хоёрынь тэрэ үйлэ хэрэгэй шалтагааниие гү, али хойшолониие элирхэйлнэ. Үгэ бүхэниинь үнэтэй, мүр бүхэниинь удхатай гэжэ Дамба Аюшеев хамба батална. Энээнһээ урда, хойношье нэгэ доро хэншье мянган һургаал суглуулаагүй гэжэ айладхана. Эдэ мянган һургаалай зууеншье ойлгоод, хэрэглэжэ шадабал, ганса буряадууд бэшэ, ямаршье яһанай, ямаршье шажанай хүн эрдэм бэлиг түгэлдэр боложо, урагшатай урматайгаар ажал хэрэгээшье ябуулха, ажабайдалдаашье аза жаргалтай байха гэжэ айладхана.
Мүнөө сагай уншагшад “Бэлигүүн толи” уншахадаа, ухаан сэдьхэлээ баяжуулжа, түрэл хэлэндээ бэрхэ боложо, бүхы соёл болбосоролдоо дуратай, урагшаа һанаатай түрүү сэхээтэн болохонь дамжаггүй.
Сэнгэ РИНЧИНОВ
Сангхын хэблэлэй албанай гэрэл зураг