Золгохо ёһолол зоноо суглуулаа

Үсэгэлдэр, шэнын 1-дэ, Улаан-Үдын Соведүүдэй талмай дээрэ аха затанаа золгохо ёһолол анха түрүүшынхиеэ үнгэрөө.

“Эрхиин тоогоор 108 аха захатанаа золгохо гэһэн аад, бодото дээрээ 108-һаа холоо үлүү аха захатан урилгыемнай тогтоон абаа. Энээндэнь тон баяртайбди”, - гээд, “Буряад үнэн” Хэблэлэй байшанай захирал Баяр Ширапов онсолбо.

Аха захатамнай Сагаалганай энэ үдэрые хүйтэн гэлтэгүй буряад һайхан малгайтаяа, хүдэһэн дэгэлээ хэдэрээд, дулаан гуталтай хүрэжэ ерээ. Буряадаараа гоёжо ерэһэн ахамадуудаа суг хүдэлһэн ажалшадынь, нүхэд болон нютагайнь хүнүүд хадагаар золгожо, гарай бэлэгүүдые барюулаа. Ахамадууд харюудань арад зондоо үреэлэйнгээ үгэнүүдые хэлэбэ.

Буряад Уласай хүндэтэ эрхэтэд, аймаг бүхэниие түлөөлһэн эдэбхитэйшүүл, нютагаархинай эблэлнүүд болон бусад олониитын эмхинүүд энэ хүдэлөөндэ оролсоо.

Гүрэнэй дуу, хатарай “Байгал” театрай болоод “Буряад үнэн” Хэблэлэй байшанай “Золгоё!” гэһэн уряа Буряадай олондо мэдээсэлгын бүхы шахуу хэрэгсэлнүүдэй халан абаһандань Эмхидхэлэй хороон баяраа мэдүүлнэ. Тиихэдэ федеральна 1-дэхи теле-һубагаар энэ золголгын ёһолол тухай зураглал гараа бшуу.