Зүүн гарһаа: «Даурия» компани байгуулһан хүбүүд - Кокорич Михаил, Иванов Сергей
Олзын хэрэг эрхилэгшэ Михаил Кокорич хорёод наһандаа алта мүнгөөрөө саятан болоо. Арба гаран бэеэ даанги олзотой хамжаануудые байгуулаа, тэрэнэй тоодо мантан аралжаанай дэлгүүр-сүлжээнүүдые, спутникова компани гэхэ мэтые бии болгоо. Харин дүшэ наһа хүрэжэ, юундэ һая олзын хэрэг эхилжэ байгаа эрхилэгшэдэй тоодо орохо акселератор (хүн түрэлтэндэ аша үрэтэй хубиин хэрэг дэмжэгшэдэй газар) руу нүүбэб? Юундэ Калифорнидо һуурижан тогтооб гэхэ мэтын һонин мэдээнүүдые уншагша олоной анхаралда дурадхахамнай. Тус найруулгануудаараа үргэн Буряадаймнай Ага, Хэжэнгэ нютагуудаар хүмүүжэн гараһан, сансар ашаглаха хубиин компани байгуулһан үетэн хүбүүдэй һонинуудые хөөрэхэмнай.
“Замбуулинай” олзын хэрэг эрхилэгшын харгыгаар яагаад дабшааб?
- Тиимэ бэлээр бүхы хэрэгшни бүтөөгүй бэзэ. Өөрынгөө түүхэ хөөрыш даа. Минии мэдэхын түрүүшын мүнгэеэ гадаадаһаа аралжаа оруулжа, бараа даалгажа, тоосоо хэжэ олоһон байнаш. Энэшни юун байгааб?
- Би Сибирьтэ эхилээб. 2008 он болотор Новосибирскын хажуудахи Академгородогто ажамидарааб. Россиин һурагшад соо физикээр олимпиада шүүһэнэй ашаар эрдэмтэн Лаврентьевэй нэрэмжэтэ физико-математическа һургуулиин урилга тогтоон, Новосибирск ерээб. Тэрэниие түгэсөөд, Новосибирскын дээдэ һургуулиин физикын факультет орооб. 3-дахи курсын һүүлдэ үетэнэйнгөө жэшээгээр һургуулияа орхижо, олзын хэрэг эрхилжэ эхилээб. Ажалшадай бүлгэм байгуулаад, гэрэй оройнуудые хушаабди, үбэл саһанһаа сэбэрлээбди, юуб даа наймаалдаг байгаабди. Зуниинь polaroid аппарадаар һургуулиин хүүгэдые буулгадаг байгааб. Тиигэжэ хоолойгоо тэжээхэ арга олдогшо бэлэй.
Түрүүшымни компани “Даури” гэжэ нэрэтэй байгаа. Гидродинамикын дээдэ һургуулида ажаллахадаа, тэһэлэлгын зүйлнүүдтэ хабаатай байгааб, тиимэһээ газарай уурхай малтаашадта тэһэлэлгын ажалнуудтань туһалдаг байгаабди. Энэмнай онсоор саашаа хүгжэжэ, тэһэлхы хэрэгсэлнүүдэй наймаан ба дам саашаа дамжуулга боложо хүгжөө. 90-ээд онуудай хүйхэр сагта бодото мүнгөөр тоосохо гээшэ хэсүү хэрэг һэн. Түлбэри боложо, зайн гал, орооһон, оёдолой оньһото түхеэрэлнүүд гэхэ мэтын юумэнүүд орогшо һэн.
- Шамда аймшагтай байгаагүй гү? 20-ёод наһатай хүбүүн ябаа ха юмши.
- Айдаһам хүрэгшэгүй һэн. Мүнөө хаа-яа һанахадаш, үнэхөөрөөшье элдэб хүйхэрнүүдээр ушарагша бэлэйб. Гэрэй оёорто хүлюулшөөд хэбтэхэ саг байгша һэн.
- Үү, тиимэ гү? Ямар шалтагаанаар?
- Нэгэ дахин хариин компаниһаа ябаха гэхэдэм, табиха дурагүй хүбүүд ба тэдэнэй тала баряашад тиилдээ.
- Ши тамиршан байгааш?
- Хүлеэтэй байхадаа яахаш теэд. Хоёр хухархай хабһаар гарасалдааб.
- Иигэжэ гарасалдаад, саашадаа өөрынгөө хэрэгээ бүтээхэеэ ябаа гүш?
- Тэдэн саашадаа юу хэхэеэ ойлгожо ядаад байгаа. Үнинэй хэрэг, һананашьегүйб. Тэдэнтэй хожомынь уулзааб, сухалшье хүрөөгүй, холодооб, мартааб.
- Анха түрүүн ехэ мүнгэтэй болоод, саашаа яажа хүгжөөбши?
- Мүнгэтэй болоходоо, гаргашалха дуран хүрөө бэзэ – эбхэн арьбидхахаа, дам саашаа хүгжэхөө һанааб. Новосибирскын Академгородогһоо хадаа, хүмүүжэмэ жэшээ һайтай, үлүү һайхан эд эдлэхэ гэжэ хэнтэг һанаан үгы байһан. Шэнын маягай түмэр хүлэг гү, али гадаада уласта гэр бараа түхеэрхэ арга байгаа. Теэд толгоймни оёортошье иимэ бодол бии болоогүй. Нэгэ тээшээ нэтэрэнгүй, олон янзын хэрэг эрхилээд туршааб, харин олонхинь урагшагүйдөө.
- Наймаан руу юундэ ябаа? Нэгэ эхеэр “Уютерра” бии болгоһон хүн гэжэ мэдээжэ болоош.
- Энэмнай 2000-аад онуудай эхин байгаа һааб даа, 1998 оной мэдээжэ үйлэ хэрэгүүдэй удаа (ород мүнгэнэй сэнгээ ехээр бууралга) гадаада бараа солилго хүгжэжэ захалаа. Тиихэдэ би түргэн ойлгооб, аралжаа наймаан ехэ олзотой ба ерээдүйтэй. Жэжэхэн эдэй дэлгүүр нээгээб, тэрэмнай һүүлэй һүүлдэ “Уютерра” болоо. Наймаанай талмай хүгжэжэл байгаа - Сбербанк урьһаламжаяа ехэ улам болгожо, хүрэнгэ оруулагшад һонирхожо байгаа. 2008 ондо 30-аад дэлгүүр Сибирьтэ, Ураалда, Волгын араар нээгээбди. 2008 оной үйлэ хэрэгүүд (ород мүнгэнэй сэнгээ дахинаа буурахада) маниие баһа нэгэ бага дорьбоогоо. Арад зоной арга хосороо, манай бараан хүндэ хэрэгтэй эдэй түрүүшын һуури эзэлхэеэ болёо. Тиимэ һэн тула 2008 ондо бидэ һүүлэй жэлнүүдтэ тулалсадаг компанитай - Липецкын дэлгүүрэй сүлжээнтэй нэгэдэхэ гэжэ шиидээбди, энээнһээ боложо, Москва зөөхэ баатай болооб. Түрүүшын ехэ дүй дүршэл эндэл абааб.
- Түрүүшын сая олзолходоо, хэды наһатай байгааш?
- Һанахань хэсүү лэ. 22-23-тайдам минии компаниин дансада сая түхэриг байһан байха. Ехэ обёорогшогүйб. Мүнгэн ерэжэ, ябажал сула байгша. Ашаглагдажа байгаа эд бараан сула эрьелдэжэ байха. Хэрэгтэй болоболнь, хэдыш мүнгэ гаргаха аргатай байгааб, зүгөөр юунэй түлөө? Түрүүшын шэнэ Volvo түхэлэй үмсын авто-унаа 2000 һайса гаран ондо абаагшаб.
- Дээрмэшэд һүүлдэ үгы болоо гү? 2000-аад оноор һуухань һуугаа, алуулхань алуулаа гү? Хайшаа энэ сэмүүн сагай хөөһэн үгы болооб?
- Нэгэ үедэ олзогүй болошоо. Засаг шанга болоо, засаг сахяашад өөһэдөө олзо харууһалжа захалаа. Зарим дээрмэшэд олзынгоо хэрэгээ хуулита ёһоор ябуулжа эхилээ. Тиихэдээ ажаябуулгаа хуулиин талаар нарин гэгшээр ябуулаа бэзэб. Эгээн һүрхэй журамтай үнэн алдартанай шажантан - хэрээһэлһэн еврей шуу. Тэрээн мэтэ үсэгэлдэрэй дээрмэшэн улам наряар хуули сахяа бэзэ.
- Һүүлдэнь юун болооб, тэрэнээ наймаалааш?
- 2009-2010 ондо наймаанһаа ябаха саг ерээ гэжэ батаар шиидээб. Тэрэнэй һүүлдэ өөрынгөө хубияа наймаалааб.
- Ямар сэнгээр?
-Ехэ бэшэ, харин һанаандам таарама мүнгэн бусаа.
- Хэлэжэ үгыш, юундэ шамда Сколково хэрэгтэй бэ?
-Нэгэл шалтаг ааб даа. Москва руу би хүдөөлиг хүмүүжүүлгэтэй хүн ерээ ха юмбиб.
Кокорич Михаил найруулгатаяа
Михаил Кокорич 1976 ондо Ага тосхондо түрөө. Дунда һургуулияа Новосибирскын гүрэнэй дээдэ һургуулида оршодог физикын таһагые түгэсөөд, тэндээл физик гэжэ дээдын мэргэжэл абаа. 2003 ондо Стэнфордын Олзо эрхилгын һургуули түгэсөөд, жэл боложо, Новосибирскын экономико болон хүтэлбэриин дээдэ һургуули дүүргээ. 2010 ондо «Сколково» гэһэн бизнес һургуулида һуража гараа. Хорёод жэлдэ олзын замаар ябажа, хори гаран хамжаануудые байгуулаа, тэдэнэй тоодо - “Даурия”, аралжаанай “Уютерра”сүлжээн. Тэдэнһээ гадна “Техносила”, “Ilim Timber Industry”компанинуудые хүтэлөө.
2012 ондо “Даурия” компани байгуулаад, замбуулин руу онгосодо хабсарһан спутнигуудые эльгээхэ хүсэлтэй болоо. Роскосмостой суг ажаллажа байһанаа, хоёр жэлэй удаа харилсаагаа таһалаа. 2015 ондо Кокорич тус компанида хубияа худалдаа.
2012 ондо Америкын Холбоото Штадууд руу зөөгөө, тэндэ 2017 ондо «Momentus Space» гэжэ шэнэ компани байгуулаа. Тус компанинь замбуулин руу эд бараа шэрэхэ ба замбуулиндахи логистика найруулха зорилготой юм.
Михаил Кокоричой https://www.facebook.com/mkokorich хуудаһанһаа гэрэл зурагууд
thebell.io Елизавета Осетинскаягай хөөрэлдөө Баяр ШИРАПОВ буряадшалба
(Үргэлжэлэлынь удаадахи дугаарта).