Кабанска аймагай Корсаково һууринда Сагаан һарын һайндэртэ дашарамдуулан, февралиин 6-да шэнэ фельдшерэй ба акушерэй пункт, мүн мэдээсэлэй-соёлой түб нээгдэбэ.
Буряад Уласай соёлой сайд Соёлма Дагаева, элүүрые хамгаалгын сайдай нэгэдэхи орлогшо Наталья Бухольцева, аймагай засаг дарга Алексей Сокольников болон олон тоото айлшад ба нютагай зон хабаадаа.
Зоной элүүрые хангаха ФАП
“2018 ондо гүрэнэймнай Юрэнхылэгшэ Владимир Путинай абаһан зарлигай ёһоор, эмшэлэлгын туһаламжа хаа-хаанагүй ядамаггүй үзүүлэгдэжэ байха ёһотой юм. Тиин шэнэ олон объектнүүд, тэрэ тоодо танайшье нютагта шэнэ ФАП баригдаба гээшэ”, - гэжэ Наталья Бухольцева фельдшерэй ба акушерэй пунктын нээлгын баяр ёһололой үедэ онсолоо.
Аймагай засаг дарга Алексей Сокольниковой тэмдэглэһээр, 1954 ондо баригдаһан анханайнь байшан һандарха туйлдаа хүрөөд байгаа. Корсаково һууринда мүнөө 600 хүн ажаһуудаг. Дүрбэдэхи хубинь - наһатай зон. Хүдөөгэй зоной хүдэршье һаань, энэ шэнэ ФАП тон хэрэгтэй сагтаа бодхоогдобо.
“Сагаалганай үедэ нээгдэһэндэнь бидэ баяртайбди. Сугларагшадые халуунаар амаршалнаб, энхэ элүүрые, зол жаргал хүсэнэб. Нээгдэһэн энэ ФАП олон жэлэй туршада хүн зондо туһатай байхань болтогой!” - гэжэ аймагай засаг дарга баяраараа хубаалдаа.
Оройдоол гурбан һарын туршада бодхоогдоһон фельдшерэй ба акушерэй пункт хэрэгтэй оньһон түхеэрэлгэнүүдээр гүйсэд хангагданхай. Бүхыдөө 4 сая 383 мянган түхэриг гаргашалагдаа юм. Аймагай Һунгамалнуудай зүблэлэй түрүүлэгшэ Семён Онтобоевой мэдээсэһээр, байгша ондо аймагта үшөө 3 ФАП нээгдэхээр түсэблэгдэнэ.
ФАП-ые даагша Татьяна Тынтуева шэнэ байшантаяа танилсуулаа. Байшан хэдэн таһалгануудта хубаагданхай: процедурна, нарай үхибүүдэй, хээлитэй эхэнэрнүүдэй, физиокабинет... Эмшэлэлгын оньһон тоног түхеэрэлгэнүүд, хэрэгсэлнүүд элбэг даа.
Мэдээсэлэй-соёлой түб
Хуушарһан эхин шатын һургуулиие һэльбэн шэнэлжэ, нютагайнгаа музей нээхэ шиидхэбэриин абтаһаар үнинэй юм. Гэбэшье эндэ ганса музей бэшэ, харин нютагай номой сан байратай болобо. Анхан һургуулиин байшанай нэгэ булан эзэлдэг байһанаа, мүнөө шэнэ мүртөө үшөө аминдаа байратай болобо. Музейн хүтэлбэрилэгшөөр олон жэлэй туршада Зоя Банзаракцаева хүдэлнэ, номой сангые даагшаар - Эльвира Бармит.
Нээлгын баяр ёһололые сомон дарга Леонид Сониев нээжэ, уласай Соёлой яаманда, аймагай хүтэлбэрилэгшэдтэ, нютагайнгаа залуушуулай зүблэлдэ ба арад зондоо баяр баясхаланаа мэдүүлээ.
“Мүнөөдэр нютагтатнай аяар хоёр объект нээгдэжэ байна. Иимэ ушар ходо боложо байдаггүй, - гэжэ аймагай засаг дарга Алексей Сокольников онсолон тэмдэглээ. - Хоёр жэлэй туршада хуушан һургуули һэльбэн шэнэлэгдээ. Леонид Сахилович олондо баярые хүргэнэ, тэрэньшье зүб. Харин нэн түрүүн нютагай зондо баяраа мэдүүлхэ хэрэгтэй. Юуб гэбэл, нютагайнгаа ажабайдал һайн тээшэнь хубилгаха, һэргээхэ гэжэ оролдодог хадатнай иимэ һайн хэрэг бүтэжэ байна”.
Соёлой сайд Соёлма Дагаевагай хэлэһээр, уластамнай ганса нёдондо 97 шэнэ клуб нээгдээ, мүнөө жэлдэ 13 байшан нээгдэхээр хараалагдана. Кабанска аймаг автоклубтай болохо юм.
“Танай нютагта иимэ шэнэ мэдээсэлэй-соёлой түбэй нээгдэжэ байһанда бидэ ехэ баяртайбди. Юуб гэхэдэ, худари буряадууд - ехэ эдэбхитэй зон гэжэ булта мэдэнэбди. Хүшэрхэн хуби заяатайшье һаа, үертэ абтаһан, ехэнхи зон зөөжэ ошоһон, гэбэшье нютаг хэлэеэ мартадаггүй, ёһо заншалаа, соёлоо сахиһаар зандаат”, - гэжэ Соёлма Баяртуевна хэлээ.
Уданшьегүй улаан лентэ хайшалагдажа, сугларагшад байшанай богоһо алхан орожо, нэн түрүүн номой сантай, түүхэтэйнь танилсаа. Корсаково һууринда 1923 ондо тон түрүүшын уншалгын гэр нээгдэһэн байна. 1974 ондо хоёр дабхар клубай байшан зөөһэн, харин 1997 онһоо һургуули соо хүлһөөр байрлуулагдаһан байна. Мүнөө шэнэ байшантай болоходоо, уншагшадта номуудые дурадхахаһаа гадна хүүгэдые наадуулха талмай харааланхай, Интернет, вай-фай хүдэлдэг. Тиимэһээ хүн зон номой санда олоороо ябажа эхилхэ байха.
Музей соо худари буряадуудай урданай байдал харуулһан, дайнай үедэ зорюулагдаһан, мүн мүнөө үеын байдалтай танилсуулһан танхимууд бии.
“Ганса айлшад ерэжэ хараха бэшэ, һурагшадта эндэмнай түүхын хэшээл үнгэргэжэ болохо”, - гэжэ Зоя Ананьевна баяртайгаар хэлэнэ һэн.
Түгэсхэлдөө булта соёлой байшанда уригдажа, Соёлой яаманай, аймагай захиргаанай зүгһөө эдэбхитэй нютагаархидта шагнал болон Баярай бэшэгүүд барюулагдаа. Һургуулиин үхибүүдэй, “Худара” гэһэн арадай аман зохёолой бүлгэмэй Сагаалганда зорюулжа бэлдэһэн тоглолто дурадхагдаа.
Сугларагшадай хүхюутэй нюур шарай харахада, эдэ шэнэ объектнүүд нютагайхидта һайндэрэй ехэхэн бэлэг болоо гэжэ тэмдэглэхээр байгаа һэн.
Любовь ЦЫБЕНОВАГАЙ гэрэл зураг