Жэл бүхэндэ Буряад Уласай Багшанарай колледждо Буряад хэлэ бэшэгэй ба үндэһэн соёлой һалбариинхид Сагаалганаа эмхидхэдэг юм. Тиихэдээ Сагаан һарын һайндэрэй хэмжээ ябуулгануудта бүхы колледжынгоо багшанарые ба оюутадые бүгэдыень хабаадуулдаг. Энэ удаашье заншалынь алдагдабагүй.
Бүгэдөөрэн золгобо
Тус һуралсалай гуламтын мүнөө жэлэй Сагаалган золгохо ёһоһоо эхилээ. Буряад хэлэ бэшэгэй һалбариинхид нэн түрүүн золголго гээшэмнай ямар удхатайб гэжэ ойлгууламжын танилсуулга хэжэ, наһатай зониие, залуушуулые, гэр бүлэнүүдые тайзан дээрэ гаргажа, жэшээ болгон харуулаа. Тиигэжэ ерэһэн бэеэрээ аха заха багшанарые, захиралаа орлогшонортойнь, һалбаринуудай дарганарые золгоод, һүүлэй һүүлдэ колледжын бүхы ажалшад ба оюутад бэе бэеэ золгоһон байна.
Энэ жэл “Буряад үнэн” Хэблэлэй байшанай ба Дуун болон хатарай “Байгал” театрай Соведүүдэй талмай дээрэ үнгэргэһэн “Золгоё!” гэһэн хэмжээ ябуулгада “Буряадай түрүү хүнүүд” урилдаанай лауреадууд, тэрэ тоодо Багшанарай колледжын Буряад хэлэ бэшэгэй ба үндэһэн соёлой һалбариин дарга Баярма Лхасаранова, орлогшонь Надежда Дондокова золгоо һэн гэжэ һануулая. Харин мүнөө колледждо энэ ёһо заншал харуулагдаба.
“Золгохо ёһомнай ехэл удха шанартай ха юм даа. Яагаад зүбөөр золгохоб гэжэ мэдэжэ абахадаа, оюутаднай гэртээшье ошоходоо, аба эжыгээ, аха захатан зоноо золгожо шадаха болобо гэжэ найдагдана”, - гээд Баярма Бастуевна тэмдэглээ.
Дангина, Баатарнууд олдохол байха
“Баатар Дангина” гэһэн заншалта мүрысөөн анхан хоёр жэлэй нэгэ дахин үнгэргэгдэдэг байһан һаа, оюутадай дурадхалаар жэл бүхэндэ эмхидхэгдэхэ болоо. Энэмнай хадаа Сагаан һарын һайндэрэй тон дуратай мүрысөөн гээшэ. Энэ удаа гурбан баатар хүбүүд, юһэн дангина басагад хаба шадалаа туршаа.
Басагадта гоо дангинын бэе шарайһаа, хүбүүдтэ бар бүхын хүсэнһөө гадуур сэсэн мэргэн үгэ, һүбэлгэн түргэн ухаан, мүн заатагүй буряад хэлэ, соёл, ёһо заншалай һайн мэдэсэ хэрэгтэй гээшэ ааб даа. Мүнөө жэл урилдаанда хабаадагшад эдэ бүхы эрилтэнүүдтэ яаха аргагүй харюусаа гэжэ онсолмоор. Үхибүүдэй илангаяа түрэл хэлэеэ һайн мэдэхэ байһандань баясахаар. Юуб гэбэл, ганса буряад хэлэ бэшэгэй һалбариин түлөөлэгшэд мүрысөө бэшэ, бэе тамирай, сэсэрлигэй ба эхин шатын болбосоролой, уран зурагай, хүгжэмэй һалбаринуудай оюутад хабаадаа ха юм. Тиихэдээ хэнииньшье буряад хэлэнэйнгээ баялиг харуулжа, ёһо заншалаа, буряад арадайнгаа аман зохёолой дээжые һайнаар мэдэдэг байһанаа гэршэлжэ шадаа. Гэбэшье хүбүүдэй дундаһаа Буряад хэлэ бэшэгэй ба үндэһэн соёлой һалбариин 4-дэхи шатын оюутан Дашицыренов Бата, харин басагадай дундаһаа энэл һалбариин 1-дэхи шатын оюутан Забанова Сарюна шалгаржа гараа.
"Дангина" болоһон Забанова Сарюна
“Дангина болоһон Забанова Сарюнаяа уласай хэмжээнэй “Дангина Баатарта” бэлдэхэмнай. Кураторынь – Надежда Бадмаевна Дондокова, - гэжэ Баярма Бастуевна мэдүүлээ. - Энэ басагамнай Аха нютагтаа олон жэлдэ дангина боложо ябаһан гэжэ абаһаар ойлгохоор, хубсаһа хунарыньшье хуу өөрынь хэбэртэй. Нюдэндөө галтайхан, шэг шарайгаараа сэбэрхэн, үндэр бэетэй, дуулаха, хатарха, шүлэг уншаха бэлигтэй, буряад хэлэтэй, һуралсалайшье талаар һайн дүнгүүдтэй тэгшэ бэрхэ одоол дангина басаган лэ даа. Саашадаа һуралсалаа дүүргээд, буряад хэлэнэй багша болоходоо, миниил һанахада, түрэл хэлэеэ, арадайнгаа ёһо заншал аргагүй үргэжэ, дэмжэжэ, сахижа ябаха”.
Баатар тухай хэлэбэл, Дашицыренов Бата дипломой урдахи практика гаража байһан хадаа, уласай хэмжээнэй мүрысөөндэ хабаадаха аргагүй. Тиимэһээ 2-дохи һуури эзэлһэн Ярууна аймагай бэеын тамирай һалбариин 2-дохи шатын оюутан Балданов Баян колледжоо түлөөлхэ эрхэдэ хүртөө.
Буряад хэлэнэй дүрим сахиха
Сагаалганай түгэсхэлэй үдэшэ зүжэглэмэл тоглолтын түхэлөөр ехэ һонирхолтойгоор үнгэрөө. Номернуудай хоорондохи забһарта нютаг бүхэнэй залуушуул эхэ хэлэн дээрээ үреэлнүүдые хэлэжэ, хажуугаарнь нютаг хэлэн дээрээ шог зугаа дэлгэжэ, харагшадые ехэ хүхеэгээ. Жэшээнь, захааминаархин лута гоё, хэжэнгээрхин муухай гоё, түнхэнөөрхин но айдхатай гоё, баргажанаархин аймаштай гоё, мухаршэбэрэйхид аюул гоё гэжэ хэлэдэг байна. Сэлэнгын залуушуул “кредидтээ даруулчангүй, Корей Солонгосоор зайнгүй, чи-би гэлсэнгүй, чегчиигээ ёдойлгонгүй” ябахые үреэгээ. Түнхэнэй залуушуулай үреэл: “Энча тэнчаагуур нохой зангаар зайнгүй, үжээрэдэ дарагдашангүй, хүн зангаар ябахатнай болтогой!”.
Тоглолтын түгэсхэлдэ нютаг нютагай залуушуул “эблэржэ”, булта үндэһэн буряад хэлэн дээрээ иигэжэ үреэгээ: “Ерээдүйн багшанар хадаа, нютаг нютагай оюутаднай буряад литературна хэлэндээ һуража, багашуулдаа дамжуулжа, хэтын хэтэдэ хэлэеэ гамнажа ябахань болтогой!”.
Баярма Бастуевнагай тайлбарилһаар, Буряад хэлэ бэшэгэй һалбариин багшанар, нэмэлтэ болбосоролой тэнхимэй хүтэлбэрилэгшэд сугларжа, түгэсхэлэйнгөө үдэшэ ямар аргаар үнгэргэхэ тухайгаа хэлсэһэн байна. Тиигээд мүнөө сагта арсалдаата болоһон аргагүй ехэ удха шанартай асуудал дээрэ тогтоо.
“Нютаг хэлэн, буряад литературна хэлэн гэнэбди. Манай һалбарида уласаймнай бүхы аймагуудай үхибүүд һурадаг. Тэдэ 1-дэхи шатада булта нютаг хэлэтэй ерэдэг. Ямаршье үхибүүн эхынгээ хэлэ мэдэхэ ёһотой, энэнь тон зүб. Нютаг хэлэмнай буряад литературна хэлэнэй баялиг гэжэ мэдээжэ. Зүгөөр бидэ буряад хэлэ ба уран зохёолой багшанарые бэлдэнэ ха юмбибди. Багшанарай өөр өөрын нютаг хэлэн дээрээ заажа эхилээ һаань, юун болохоб? Жэшээнь, Хори ошоод, сонгоолоор буряад хэлэ зааха гү? Энэмнай тад буруу. Тиимэһээ үхибүүдэй колледжын богоһо алхажа оромсоорнь, литературна хэлэндэ һургажа эхилнэбди. Үндэһэн буряад хэлэнэй дүримүүдые сахиха шухала”, - гэжэ Буряад хэлэ бэшэгэй ба үндэһэн соёлой һалбариин дарга һанамжаяа мэдүүлээ.
Буряадаар КВН наадаа
Сагаалганай түгэсхэлэй тоглолтын шэмэг болоһон номер тухай хэлээгүйдэ бүтэхэгүй. Буряад хэлэ бэшэгэй һалбариин басагадай бүлгэм буряадаар КВН харуулаа. Бүлгэм энэл жэлдэ байгуулагдажа, түрүүшынхиеэ тайзан дээрэ гараа. Бэе тамирай һалбарида заочноор һурадаг хүбүүн буряад-ород “холимог” хэлэн дээрэ КВН-эй бүлгэм байгуулха дурадхалтайгаар хандаа юм. Өөрөө буряад хэлэгүй һэн тулань, Буряад хэлэ бэшэгэй ба үндэһэн соёлой һалбарида уран хэлэлгын кружок хүтэлбэрилдэг Буряад театрай артист Баяр Бадмаев үүсхэлыень дэмжэжэ, али болохоор туһа үзүүлээ. Бүхы ород үгэнүүдыень 20-30-аад минутын туршадал ород-буряад болгожо тааруулаад, мүнөө ёстой гоё КВН харуулбал даа. Энэ гоё һайхан зүжэглэмэл тоглолтыешье эхинһээнь эсэс болотор найруулһан, зохёоһон юм. Өөрөө бэлигтэй артист хадаа хүүгэдтэ хайшан гээд хүдэлхэб, ябахаб, маяг юумыень хуу заагаад үгэжэрхидэг байна.
“Миниил һанахада, Баяр Цыденбалович хадаа Буряадай арадай артист гэхэдэ, алдуу болохогүй. Бидэ эндээ, колледждоо, иигэжэ хүндэлэн хэлэдэгбди, - гэжэ Баярма Бастуевна хэлээ. - Һалбаридамнай оройдоол гурбадахи жэлээ хүдэлжэ байгаашье һаа, нилээд ехэ ажал бэелүүлжэ үрдеэ. Аргагүй бэрхэ, бэлигтэй, орол- досотой, харюусалгатай хүн. Элдэб янзын мүрысөөнүүдтэ бэлдэһэн үхибүүдынь заабол түрүү һуурида гарадаг. Сагаалганаймнайшье тоглолто һонирхолтойгоор, зохидоор үнгэрөө”.
Үнэхөөрөөшье, гоёхон тоглолто болоо. Дуун, хатар, хүгжэм, гоё буряад хубсаһатай дангинанарай дефиле, буряад хэлэн дээрэ КВН наадан, мүн “нютаг хэлэнэйнгээ һайханшье һаа, үндэһэн хэлэнэйнгээ дүримүүдые сахия” гэһэн уряа доро эдэ бүгэдые “орёоһон” зүжэг.
Буряадай Багшанарай колледжын мэдээсэлэй түбэй гэрэл зурагууд