Һоёд угсаатанай эгээл томо Сорог һууринай ажаһуугшад ажабайдалаа өөһэдын хүсөөр зохёохоёо оролдоно. Һүүлэй хэдэн жэлдэ эндэ барилдаанай найман ханатай гэр, хүүгэдэй сэсэрлиг, соёлой байшан бодхоогдонхой. Теэд хүсэд ажал хэхын тула үшөө мүнгэн хэрэгтэй ха юм. Тээмэндэ албан хэрэгээрээ Аха аймагаар ябахадаа, Буряад Уласай Толгойлогшо Алексей Цыденов туһалхаар бэлэн байһанаа мэдүүлээ.
Сорог хадаа аймагайнгаа эгээл томо һууринуудай нэгэн болонхой. Энэ нютагта хүүгэдэй сэсэрлигэй орёо байдалда ороһониинь гайхалтай. Юуб гэхэдэ, байшаниинь үнинэй үмхиржэ һаланхай. Мүнөө тэндэхи хүүгэд амбулаториин болон интернат-һургуулиин байшанууд соо хүмүүжүүлэгдэнэ. Хүүгэдэй сэсэрлигые даагша ехээр муу юумэ бү бэшэгты гэжэ абаһаар лэ хэлээ һэн.
- Мүнөө бидэ интернат-һургуулиин нэгэ байшан эзэлнэбди. Тус һуралсалай гуламтада энээндэнь тон баяртайбди. Хэды тиигэбэшье байрамнай багадана. Үхибүүдэй бэеэ заһадаг дулаан таһалга гэжэ эндэ үгы. Тиимэһээ багашуулнай зүдэрнэ. Эндэ 3-7 наһатай хүүгэд нэгэ бүлэг болгогдонхой, - гэжэ сэсэрлигые даагша Евгения Аюшеева халаглан хөөрэнэ.
Сэсэрлигые даагша Евгения Аюшеева
Хөөрүү хүнэй хэлэдэгээр, “Улыбка” гэһэн энэ сэсэрлигтэ үхибүүдэй миһэрэл нюур дээрэнь үнинэй харагданагүй. Тэдэ дааража, уйтан хабшуу байдалда үндынэ. Иимэ ушарта сорогойхид бага эрхэтэдээ өөһэдын хүсөөр баясуулха гэжэ оролдоод, ТОС байгуулжа, шэнэ байшан бодхооһон байна. Теэд тэрэнээ хүсэд бариха гэхэдэнь, мүнгэн дуталдаа.
Сорог һууринда сэсэрлиг 1973 онһоо хойшо хүдэлнэ гээшэ. Хуушан сагта арадай хүсөөр баригдаһан байшан оройдоол 35 хүниие багтааха түсэбтэй байгаа бэлэй. Баригдаһан сагһаа хойшо тэрэ заһабарилагдаагүй юм. Үшөө 2015 ондо шэнэ сэсэрлиг бариха тухай асуудал Буряад Уласай Засагай газарта табигдаһан байна. Тиибэшье мүнөө болотор шиидхэгдээгүй байгаа бшуу.
Һүүлэй мэдээгээр, “Улыбка” сэсэрлигтэ 46 үхибүүн ябана. Гэхэтэй хамта, үшөө 27 багашуул ээлжээндэ байна. Харин ТОС-ой ашаар баригдаһан байшанда 50 үхибүүд ябаха аргатай.
Сорогой сомон 1900 гаран ажаһуугшадтай юм. Тэдэ ганса сэсэрлиг бариха гэжэ шамдаа бэшэ, мүн соёлой байшан өөрын хүсөөр бодхоохо гэжэ оролдоно. 2018 ондо барилга эхилээ һэн. Шэнэ байшан 115 һууритай харагшадай танхимтай болохоор хараалагданхай. Тус соёлойнгоо байшанда һоёд угсаатан элинсэг хулинсагуудайнгаа ёһо заншал һэргээхэ, үхи хүүгэдтээ дамжуулха түсэбтэй.
Мүн тиихэдэ Сорог һууринда спортдо дуратайшуулые бэлдэхэ талаар ехэ ажал ябуулагдана. Һаяхана тэндэ барилдаанай найман ханатай гэр өөһэдын хүсөөр бодхоогдоо юм. Энэнь һайн дүн асаржа эхилээ. Һүүлэй үедэ Сорогой барилдаашадые болон бусад тамиршадые ганса Ахада бэшэ, мүн бүхы Буряадта танихаар. Даша Шарастепанов, Аяна Ухеева, Самбялова, Эрдэм Шарастепанов болон бусад тамиршад Ахаяа суурхуулаа.
Иигэжэ холын һоёд угсаатан ажабайдалаа зохёожо байһандань һайшаалтай.
Борис БАЛДАНОВАЙ гэрэл зурагууд