​Түби дэлхэйгээр тараа

Туяна Жапова

Ярууна аймагай Нарһата нютагай уран гартан Туяна Жаповатай уншагшадаа танилсуулхамнай. Тэрэ 1983 ондо Батожаргал Хаимчикович, Зинаида Батуевна Эрдынеевтэнэй гэр бүлэдэ эр­хэхэншье һаа, бэрхэхэн гурбадахи басаган боложо түрэһэн юм. Бүри һургуулиин байхаһаа зураха, шабаха, дуу дуулаха, нэхэхэ, оёхо дуратай байһан. Энэнь эсэгэ талын уг гарбалаар дамжажа ерэһэн талаан бэлиг гэжэ тэмдэглэхэ шухала.

Хүхюутэй шууяатай һургуулиин хаһа дүүрэжэ, Туяна Улаан-Үдын 24- дэхи лицейн богоһо алхажа ороһон байна. Эндэ тэрэ урданай уран һайханай бүтээлнүүдые һэльбэн шэ­нэлэгшын мэргэжэл шудалаа.

Һуралсалайнгаа һүүлээр нютагаа бусажа, Жапов Түмэн хүбүүнтэй хуби заяагаа ниилүүлжэ, айл бүлэ боложо түбхинөө һэн. Энэ эбтэй гэр бүлэдэ уданшьегүй угаа үргэлжэлүүлхэ шамбай хүдэр дүрбэн хүбүүд һубарилдаа бшуу. Батор, Мэргэн, Жамсо, Жамьян булта зураха дура­тай, эжынгээ ажалаар һонирходог, хамһалсадагшье байна.

Хэдэн олон жэлэй туршада олон тоото гоё зурагуудые зуража, хэмэл шулуунуудаар хүүхэлдэйнүүдые бүтээжэ, тэдэндээ буряад арадайн­гаа хубсаһа оёжо үмдэхүүлнэ. Түрэл арадайнгаа ёһо заншал, хубсаһа ху­нар гэхэ мэтые харуулхын тула га­рай бэлэгүүдые зохёодог байна.

Туяна Батожаргаловна “Цветы и сувениры” гэһэн өөрын наймаа нээһэн. Сүлөөтэй сагтаа элдэб ян­зын хэмжээ ябуулгануудта - түрэ хурим, үһэ хайшалаан гэхэ мэтэдэ танхимуудые гелевэ шаарнуудаар гоёодог юм.

Теэд хүдөө газарта түбхинэһэн аад, яагаад өөрын үмсын ажахыгүй байхаб? Ехэнхи ажалынь Түмэн нүхэрэйнь даашын ааб даа. Олон үхэр, гахайнуудые баридаг, зунай сагта ехэ огород тариха, үбһэ саб­шаха, түлеэгээ бэлдэхэ гээд лэ, хүдөөгэй ажал барагдаха бэшэ даа... Гэбэшье Туяна хамагаа үрдеэд лэ, дуратай ажалаа ядамаргүй хээд бай­даг. Жэшээнь, 2016 ондо “Алтаргана” нааданда амжалтатай хабаадаһан юм.

Гоё һайхан зурагуудай дүрэ һанаан бодолдонь түрэдэг. Мүн тии­хэдэ Интернедһээ һонирхолтой, хүнэй зүрхэ сэдьхэл хүдэлгэмэ гэрэл зурагуудые һажаажа зурадаг байна. Гайхалтайнь гэхэдэ, тон адляар зу­ражархидаг, илгаруулхааршье бэшэ.

Туяна Батожаргаловна ерээдүй сагта зурагай нэгэ һалбари боло­дог аэрографи гээшые шэнжэлжэ үзэхэ түсэбтэй. Амжалтануудые хүсэнэбди.

Туяна Жаповай бүтээлнүүд