919
ДВ2025.рф гэһэн сайтда Алас Дурнын федеральна тойрогой хүгжэлтын талаар оруулагдаһан дурадхалнуудай түлөө һанал хуряалга эхилбэ. Һанал хуряалгын ашаар, 2025 он болотор Алас Дурнын хүгжэлтын Үндэһэтэнэй программада хараалагдаһан хэмжээ ябуулгануудай алиниинь тон хэрэгтэйб, шухалаб гэжэ элирүүлэгдэхэ.
Алас Дурнын федеральна тойрогой хүгжэлтын талаар ороһон дурадхалнууд «Болбосорол», «Элүүрые хамгаалга», «Эдэй засагай хүгжэлтэ» болон бусад сэдэбүүдээр хубаарилагдана. Февралиин 18-һаа «Дальневосточный гектар», «Экология», «Работа региональных и муниципальных органов власти» гэһэн һалбаринуудта һанал хуряалга эхилээ.
Тиихэдэ ажаһуугшад дээрэ нэрлэгдэһэн программануудта ямар хубилалта оруулжа болохоб, нэмэлтэ хүнгэлэлтэнүүдые оруулха тухай һунгаха аргатай.
Ородой Холбоото Уласай Алас Дурнын хүгжэлтын яаманда тэмдэглэһэнэй ёһоор, ажаһуугшадай дэмжэһэн дурадхалнууд саашаадаа гуримшуулагдаха.
2019 оной апрелиин 1 болотор дурадахалнуудые оруулжа болохо. Мүнөө дв2025.рф сайтда 62 мянган хүн бүридхэлдэ абтажа, Алас Дурнын федеральна тойрогой хүгжэлтын талаар 15 мянга шахуу дурадхалнууд оронхой. Тэдэнэй 1146 дурадхал Буряад уласта хабаатай. Сэлэнгэ дээгүүр хүүргэ, хүүгэдэй сэсэрлигүүд, һургуулинууд болон элүүрые хамгаалгын эмхи зургаануудые бариха талаар дурадхалнуудые арад зон дэмжэнэ гээд тэмдэглэлтэй.
Буряадай түлөөлэгшэд бага болон дунда олзын хэрэг эрхилэлгэ хүгжөөлгэ, элүүрые хамгаалга, болбосорол, гэр бүлэнүүдые дэмжэлгэ гэһэн асуудалнуудаар ажалай 17 федеральна бүлэгтэ ороһон байна.
Мартын 15 болотор уласай аймагуудта ороһон дурадхалнууд хамтадхагдажа, мэргэжэлтэ шүүбэришэдтэй, олониитын нэгэдэлнүүдтэ, һунгамалнуудтай хэлсэгдэхэ. Удаань энэ асуудалнууд Буряад уласай Арадай Хуралда зүбшэгдэн хэлсэжэ, саашадаа Ородой Холбоото Уласай Алас Дурнын хүгжэлтын яаманда дамжуулагдаха.
Алас Дурнын хүгжэлтын талаар 2025 он болотор, 2035 он болотор холын хараата түсэбүүдэй Үндэһэтэнэй программа 2019 оной сентябриин 1 болотор бэлэн болохо ёһотой. Энээн тухай Зүүн зүгэй эдэй засагай дүрбэдэхи хуралдаанай дүнгүүдээр гүрэнэй хүтэлбэрилэгшэ даалгаһан байна.
Буряад Уласай Засагай газарай мэдээсэлэй албанай гэрэл зураг
