861
Буряад Уласай Толгойлогшо Алексей Цыденов Ородой Холбоото Уласай Юрэнхылэгшын Федеральна суглаанда захил-хандалга тухай хэлэхэдээ, тэрэнэй ехэнхи хубинь Буряад уласта сэхэ хабаатай гэжэ тэмдэглэбэ.
- Юрэнхылэгшэ олон зорилгонуудые табижа, шиидхэбэринүүд тухай хэлэбэ. Буряад уласта эдэ шиидхэбэринүүдэй ехэнхинь хабаатай. Мүнөө улас дотор хүдөө нютагуудта багшанардуталдана. Тиимэһээ «Земский учитель» гэһэн программа бэелүүлэгдэхэ. «Земский доктор» гэһэн программада мэргэжэлтэдэй наһанай хэмжээн дээшэлүүлэгдээ, - гэжэ уласай хүтэлбэрилэгшэ хэлэбэ.
Тиихэдэ гүрэнэй хүтэлбэрилэгшын захил-хандалгада ниигэмэй талааар асуудалнууд шиидхэгдэнэ. Гэр бүлэнүүд, үхибүүд болон эжынэрые дэмжэхэ талаар ажал үргэлжэлүүлэгдэхэ. Гэр бүлын нэгэ хүнэй олзын бага хэмжээн ажамидаралгын доодо хоёр хэмжээнһээ тоологдохо. Тиихэдэ гурбадахи болон удаадахи үхибүүтэй болоһон бүлэнүүдтэ гэр худалдажа абаһан урьһаламжа хааха хэрэгтэ 450 мянган түхэриг түлэгдэхэ. Тэрээнһээ гадуур эжынэрэй капитал түлэгдэнэ. Залуу гэр бүлэнүүд 900 мянган түхэригһөө дээшэ мүнгөөр гэр байрынгаа байдал һайжаруулха аргатай.
2020 оной январиин 1-һээ хүдөө нютагуудые хүгжөөхэ талаар программа бэелүүлхэ талаар Юрэнхылэгшэ даалгаба. Буряад Уласта хүдөө нютагуудые, хүдөөдэ олзын хэрэг эрхилэлгэ, хүдөө ажахы, соёл, элүүрые хамгаалга, болбосорол хүгжөөхэ, дэмжэхэ талаар федеральна засаг зургаантай хамта Юрэнхылэгшын даалгабари дүүргэхэ тухай Алексей Цыденов хэлэбэ.
Тиихэдэ Федеральна Суглаанда Юрэнхылэгшын захил-хандалгада эрэмдэг бэетэй үхибүүдтэй гэр бүлэнүүдтэ һарын 10 мянган хүрэтэр мүнгэн тэдхэмжэ үзүүлэгдэхэ. Мүнөө түлэгдэжэ байһан мүнгэнһөөнь энэнь хоёр дахин ехэ.
Ородой Холбоото Уласай Юрэнхылэгшэ захил-хандалгадаа олон зорилгонуудые онсолон тэмдэглэбэшье, байгша оной эхиндэ гараһан асуудалнуудта анхарал хандуулба. Энэ хадаа наһанайнгаа амаралтада гараһан хүнүүдэй пенсиин индексацида хабаатай. Тиимэһээ январиин 1-һээ пенси дахинаа тоологдохо.
Владимир Путинай хэлэһэнэй ёһоор, Алас Дурнын тойрогто ородог можо нютагуудта гүрэнэй бэшэ можо нютагуудта орходоо, ажабайдалай талаар һайн дүнгүүд харуулагдаха ёһотой. Тиимэһээ федеральна засаг зургаантай хамта энэ талаар ажал ябуулагдаха.
Ородой Холбоото Уласай Юрэнхылэгшын ёһололой сүлжээнэй гэрэл зураг
