Түрэл хэлэнэйнгээ түлөө сагаагаараа оролдожо ябадаг хүнүүдэй нэгэн, гүн ухаанай эрдэмэй кандидат Эржэн Лыксыкова багашуулые түрэл хэлэндэнь эрьюулхэ ехэ зохидхон хэрэгсэл зохёобо. Энэмнай хадаа “Бамбарууша” гэжэ бренд доро буряад, англи, хуушан монгол хэлэнүүд дээрэ оршуулгатай дэлхэйн 64 амитадай нэрэнүүдтэй, зурагуудтай үнгэтэ карточканууд болоно. Бүхыдөө хоёр талатай 36 карточка ороно, 5 наадан тайлбаритаяа, амитадта хабаатай таабаринууд, мүн тиихэдэ амяараа ород-буряад оршуулгань үгтэнэ. Зохёон бүтээгшэтэй хөөрэлдөөгөө уншагшадтаа дурадханабди. - Эржэн, ехэ һонин карточканууд байнал. Теэд юундэ ород оршуулгыень амяарлаа гээшэб гэжэ абаһаар лэ асуудал гаража ерэнэ. Жэшээнь, буряадаар – эреэн тахи, англяар - zebra, мүн тэнгэриин бэшэгээр монгол оршуулгань нэгэ зэргэ үгтэнэ. Харин ородойнь үгы байхада, таагүй шэнгил.
- Энээн тухай олон хүнүүдтэй яһала хөөрэлдөөб. Зарим зон юундэ ород хэлэн дээрэ үгыб гэжэ баһа гайхана. Зүгөөр хамба ламамнай зүбшөөгөө: ород хэлэн дээрэ оршуулгыень зэргэлүүлжэ бэшэхэдэ, буряадынь гэдэргээ гарашаха, тоогдохогүй. Буряадай үндэһэтэнэй 1-дэхи лицейн захирал Булад Шойнжоновто харуулхадамни, баһал иимэ һанамжатай. Миниишье һанахада, үхибүүд ородоор лэ уншаад, буряадынь алад гарашахадаа болохо. Ород хэлэн дээрэ бүхы юумэн бии ха юм. Тиибэшье һаань оршуулгыень амяарань оруулаабди.
- Энэ хэрэгсэл буряад хэлэ дэлгэрүүлгэдэ ашаг үрэтэй байха гү?
- Би гурбан хүүгэдтэйб. Ехэмни 7-той, дундахимни 3-тай, багамни 6 һаратай. Тиигээд тэдээндээ яажа түрэл хэлэеэ дамжуулхаб даа гэжэ ходо һанаата боложо, ашаг үрэтэй ямар хэрэгсэл зохёохоор бэ гэжэ үнинһөө хойшо бододогби. Нэгэтэ Монгол орон ошоходоо, иимэрхүү карточкануудые асаржа, ехэ хүбүүндээ үдэшэ бүхэндэ унтахынгаа урда тээ ойро зуурахан заадаг байгааб. Мүнөө хүбүүмни Буряадай үндэһэтэнэй 1-дэхи лицейн 1-дэхи ангида һурана. Шалгалта барихадаа, эгээл ехэ баллнуудые абаа. Тиихэдээ ашаг үрэтэй гэжэ хэлэхэ дүүрэн эрхэтэйб. Дунда хүбүүмни сэсэрлигтэ ябадаг, тэндээ ородоор дуугараа аабза. Харин гэртээ ганса буряадаараа хөөрэлдүүлхэеэ оролдоноб. Мүнөө буряад хэлэн дээрэ заа-зуу номууд гарадаг болоо, буряад азбукашье бии. Тэдэ мэтые бэдэржэ хэрэглэнэб. Буряад хэлэндэ һургаха хэрэгсэлнүүдэй тон үсөөн хадань, буряадаар карточкануудые гаргаха хүсэл түрөө. Тиигээд дизайнер мэргэжэлтэй дүү басагандаа – Янжима Батуевада хуу тааруулжа зохёолгоод, Жаргал Бадагаров багшада шалгуулжа, амитадай аймагта зорюулагдаһан нэгэдэхи суглуулбари гаргаабди. Саашадаа ургамал, шубууд, далайн амитад, байгаали, тоо, гэр бараан, эдеэ хоол, ажал мэргэжэл гэхэ мэтэ суглуулбаринуудые гаргаха түсэбтэйбди.
- Хүнүүд хэр һонирхоноб теэд?
- Сохом Хэжэнгэ руу буляалдажа байжа абана, Эрхүү можоһоо хонходоно. Мүнөө интернет бии боложо, ажалыемнай нилээд урагшалуулна. Ага руу хэдые эльгээгээбди. Минии һанахада, эдэ карточканууд гансашье үхибүүдтэ бэшэ, томошуулдашье туһатай байха. Жэшээнь, хулһан баабгай гэжэ ехэ һонин байна. Ехэнхи хүнүүд панда гээд хэлэнэ гээшэ ааб даа. Харин хулһан - бамбук ха юм. Манай буряад, монголшье хэлэндэ ехэ һонин үгэнүүд бии. Оршуулгануудыень бэдэржэ эхилхэдээ, одоол гайхааб: анааша – жираф, эмжэ – кенгуру, армана – бегемот, хирһэн – носорог. Иимэ амитад эндэмнай наһа үеэрээшье байгаагүй, манай элинсэгүүд тэдэниие нюдэ амандаашье хаража үзөөгүй ха юм. Жэшээнь, лемурые олиной гэнэ. Бидэ иимэ амитан бии юм гэжэ һаял мэдэхэ болоо ха юмбибди. Харин монголнууд анханһаа бултандань нэрэнүүдые үгэжэрхинхэй байна.
- Теэд монголнууд тиимэ ёстой үгын үгы байхада, тааруулаад лэ, зо- хёожорхидог гэлсэгшэл.
- Тиигээшье һаа тэдэтнай Чингис хаанай үедэ дэлхэй түбеэр дүүрэн ябаһан хадаа, нютаг нютагай амитадые хараад, тэрэ холын сагта нэрэ үгэжэ, хэлэ бэшэгтээ дансалһан байна. Карточканууд соогоо монгол бэшэг зорюута оруулаабди: тэнгэриин бэшэг үхибүүдэй һонирхол ехэ татана. Энэмнай үнэн дээрээ манай үндэһэн бэшэг ха юм. Минии нагаса баабаймни хуушан монголоор бэшэгшэ һэн. Тоолоходо, бүри һая, хоёр лэ үеын урда тээ, хэрэглэгдэдэг байһан. Харин бидэ тиимэ түргэн мартажархёобди. Зарим нүхэдни: “Это что за закорючки?” - гэдэг. Тиигэжэ байхагүйн тула жаа жааханаар үхибүүдтээ зааха хэрэгтэй. Мүнөөнэй үхибүүдэй ухааниинь һонор ха юм.
- Эржэн, удаадахи карточкануудтнай иигэһээр һубарижа эхилхэ юм даа.
- Һанааншье, хүсэлшье бии. Теэд эбээн тэдхэгшэ хэрэгтэй. Гансаараа мүнгэнэй гаргашыень абараажа шадахагүйб. Түрүүшынгээ энэ суглуулбари гаргаад, үриеэ дууһан түлөөдүй ябанаб. Һургуулида суг һураһан нүхэрэйнгөө “Формат” гэһэн үмсын типографида хэблүүлээб, түлбэрииень хүлеэсэтэй байхаар хөөрэлдөө һэмди. Эдэ карточкануудаа худалдаа һаа, мүнгыень үгэхэеэ һананаб. Сэхыень хэлэхэдэ, тиимэ бэлээр наймаан болошоногүй. Хүнүүд абахаяа һанаашье һаа, мүнгэгүйшэг байна.
- Үнэн абахаяа һанаһан хүн абахал даа. 250 түхэриг гээшэмнай мүнөөнэй мүнгөөр юун гээшэб?
- Яһала абанал даа. Зүгөөр ехэшэгээр гаргаад, дэлгүүртэ наймаанда табихаяа һанаа һаа, эбээн тэдхэгшэ хэрэгтэй байна.
- Багаһаа хэдэн хэлэ холиходо, үхибүүдэй толгой эрьешэнэ гэдэг. Тиигээд лэ олонхи түрэлхид нэн түрүүн ородыень һунгажа абашана. Энэнь зүб гү?
- Үнэхөөрөөшье, буряад хэлэн хаанашье хэрэглэгдэхэгүй, тиимэһээ үхибүү зобооһоной хэрэггүй, ородоол шудалаад ябаг лэ, хоёр хэлэн соо һамаршана гэжэ олон хүн хэлэдэг. Минии һанахада, тиимэ бэшэл даа. Хүүгэдни хоёр хэлэеэ тэгшэ мэдэдэг, һамаржа байхыень харадаггүйб даа. Би өөрөө багаһаа хойшо хоёр хэлэтэйб. Һургуулидаа ородоор, гэртээ буряадаар хөөрэлдөөд, хоёр хэлэеэ тэгшэ абаад ябааб. Удаань Буряадай гүрэнэй ехэ һургуулиин Зүүн зүгэй факультедтэ япон, хитад хэлэ шудалааб, монгол хэлэ Жаргал багшада заалгааб. Хоёр хэлэтэй байхада, хари хэлэнүүд бүри һайнаар хадуугдадаг. Жэшээнь, япон хэлэнэй грамматика, байгуулгань буряад хэлэнэйхидэ адлирхуу, алтайн хэлэнүүдэй бүлэгтэ хоюулаа ороно. Харин буряад хэлэгүй үхибүүдтэ хүндэшэг байгаа. Англишье хэлэ үзэхэдэ, буряад хэлэн “туһалдаг”. Тиигээдшье үхибүүндэ түрэл хэлэниинь хэрэгтэй гү, али үгы гү гэһэн асуудал огто байха ёһогүй. Буряад хадаал, түрэл хэлэеэ мэдэхэ ёһотой бэшэ юм гүбди?
- Тиимэл даа, Эржэн. Залуу, бэрхэ, урагшаа һанаатай хүбүүд, басагадай түрэл хэлэнэйнгээ түлөө оролдоходонь, ехэ урмашахаар. Ажал хэрэгүүдшни урагшатай байг лэ даа.
Авторай болон Эржэн Лыксыковагай гэрэл зурагууд