866
Ивалга аймагта хүдөө ажахы хүгжөөжэ, үйлэдбэрилһэн эдеэ хоол Улаан-Үдын дэлгүүртэ наймалха тухай Буряад Уласай хүдөө ажахын болон эдеэ хоолой сайд Дабаа-Жалсан Чирипов Ивалга аймагай дарга Виктор Очиров болон хүдөө ажахын томо үйлэдбэринүүдэй хүтэлбэрилэгшэдтэй зүбшэбэ.
Буряад Уласай хүдөө ажахын сайдай тэмдэглэһээр, уласай ажаһуугшадые һайн шанартай эдеэ хоолоор хангаха гэһэн асуудал шухала. 2019 ондо үйлэдбэрилһэн эдеэ хоолой хэмжээ дээшэлүүлжэ, Улаан-Үдэдэ эрхим шанартай магазин нээхэ түсэбтэй. Ивалга аймагай захиргаан нютагайнгаа үйлэдбэринүүдые, «Буряадта хэгдээ» гэһэн бренд хүгжөөжэ, хари гүрэнһөө эдеэ хоол багаар хэрэглэхэ талаар ажал ябуулна.
Ивалга аймагай фермернүүд хамтаржа, 2019 оной хоёрдохи хахадта магазинай барилга эхилхэ түсэбтэй. Тиихэдэ эндэ мяханай, һүнэй зүйлэй эдеэ хоол 30-һаа дээшэ ажахы худалдаха. Огородой эдеэ, ногоо таряа ургуулдаг 3 ажахы баһал эдеэ хоол дэлгэхэ. Тиимэһээ энэ магазинда һүнэй зүйлэй эдеэ хоолһоо арбуз хүрэтэр наймаалагдаха.
Мүнөө Ивалга аймагта 108 фермерскэ ажахы, 5 кооператив, 1200-һаа дээшэ үмсын ажахынууд ажал эрхилнэ. Хүдөө ажахын һалбари хүгжөөлгэдэ гүрэнэй бюджетһээ байгша ондо 19,7 сая түхэриг һомологдоо.
2018 оной дүнгүүдээр, огородой эдеэ хоол ургуулха талаар Ивалга аймаг улас дотор түрүүлнэ. Тиихэдэ Буряадта ургуулһан хартаабхын дүрбэнэй нэгэн Ивалгын нютагай засагай байгууламжада таригдана гээд тэмдэглэлтэй.
