1032
Новосибирск хотодо Узбекистан уласай консул Юсуп Кабулжанов Буряад Улас анха түрүүшынхиеэ ерэбэ. Буряад Уласай Толгойлогшо Алексей Цыденов үндэр сайдтай үсэгэлдэр уулзаба. Юсуп Кабулжановые Буряад Улас ерэһэндэнь, баяр хүргэжэ, суг ажал һайнаар ябуулагдана гэжэ уласай хүтэлбэрилэгшэ тэмдэглэбэ.
- 2018 ондо Узбекистан уластай эд бараанай эрьесэ найма шахуу дахин дээшэлээ, - гэжэ Алексей Цыденов хэлэбэ.
Уулзалгын эхиндэ Новосибирск хотодо Узбекистан уласай консул Юсуп Кабулжанов Буряадай Толгойлогшодо хоёр дансануудай буулгабари барюулаа. Эдэнь хадаа Узбекистан уласые түлөөлхэ Генеральна консулай бүрин эрхэ Юсуп Кабулжановта даалгаһан тухай болон Ород гүрэнэй тэрэнииень гэршэлһэн тухай дансанууд болоно. Удаань Узбекистанда элүүрые хамгаалга, болбосорол, хүдөө ажахы болон бусад һалбаринуудта Буряад Уластай ажал суг ябуулха гэжэ ехэтэ һонирхонобди гэжэ консул тэмдэглээ.
Буряад Уласай Толгойлогшо Алексей Цыденов Узбекистан уластай суг хүдэлхөөр бэлэм байһан тухайгаа хэлэбэ.
-Бидэндэ дурадхаха юумэн бии. Улаан-Үдын авиазаводто Ми-8 түхэлэй вертолёдто үндэһэлэн хэгдэһэн, шэнэ түхэлэй Ми-171А2, Ми-8АМТШ вертолёдуудые үйлэдбэрилнэ. Узбекистан үндэр хадануудтай гэжэ бүхы дэлхэйдэ мэдээжэ, тиимэһээ манай заводой бүтээлнүүдтэй дүтөөр танилсахыетнай дурадханаб. Зайн галай хэрэглэһэн тухай тоолохо хэрэгсэлнүүдэй зэбсэгүүд хэгдэнэ. Ямаршье уларилай сагта тэдэ хүдэлхэ аргатай, - гэжэ Алексей Цыденов дурадхаба.
Юсуп Кабулжановай хэлэһээр, эдэй засагай һалбарида нягта харилсаатайгаар хүдэлхэ шухала. Буряадай Толгойлогшо Узбекистан алабанай хэрэгээр ошохо гэжэ түсэблэгдэнэ. Хоёр талаһаа олзын хэрэг эрхилэгшэд бизнес-хуралдаанда хабаадахаар хараалагдана. Үндэр сайдай тэмдэглэһээр, Узбекистанһаа Буряад уласта ороһон хүдөө ажахын эдеэ хоолой сэн дээшэлүүлэгдэнхэй. Тиимэһээ энэ һалбарида ажал ябуулха дурадхал тэрэ оруулба. Тиихэдэ соёлой һалбарида баһал суг ажаллахаар түсэблэгдэнэ.
- Би анха түрүүшынхиеэ Буряад Улас ерээб. Танай уласта манай нютагта үйлэдбэрилһэн хүдөө ажахын эдеэ хоол худалдагдана. Тэрэнэй сэн доошолуулха талаар ажал ябуулхабди. Харин намда, Узбекистанай элшэн сайдта, эгээл шухалань хадаа манай нютагһаа гарбалтай зон амгалан ажаһууна, - гэжэ Юсуп Кабулжанов тобшолбо.
Юсуп Кабулжанов Буряад Улас албанай хэрэгээр февралиин 20-до ерэжэ, Ивалгын дасанда Хамбо Лама Дамба Аюшеевтэй уулзаа. Тиихэдэ болбосоролой, элүүрые хамгаалгын, гадаадын хэрэгүүдэй яаманай болон бусад эмхинүүдэй түлөөлэгшэдтэй, «Үзбек үндэһэтэнэй «Турон» ниитын эмхиин гэшүүдтэй, Буряад уласай ехэ һургуулиин Узбекистанай оюутадтай уулзаһан байна.
