​Агуу Илалтын 75 жэлэй ойдо дашарамдуулан, Константин Рокоссовскийдо хүшөө Улаан-Үдэдэ табигдаха

Советскэ Союзай маршал, Советскэ Союзай хоёр удаа Герой Константин Рокоссовскийдо Буряадай ниислэл хотодо хүшөө табиха түсэлөөр зүблөөн үнгэргэгдэбэ. Энэ хэмжээ ябуулгада уласай хүтэлбэрилэгшэ Алексей Цыденов, Улаан-Үдын захиргаанай хүтэлбэрилэгшын уялга дүүргэгшэ Игорь Шутенков, Ородой Холбоото Уласай сэрэгэй-түүхын олониитын түлөөлэгшэд болон бусад зүбшэн хэлсэбэ. Эсэгэ ороноо хамгаалгын Агууехэ дайнай дүүрэһээр 75 жэлэй ойдо дашарамдуулан, хүшөө табигдаха юм.

Эсэгын дайнай суута полководецүүдэй нэгэн Буряадай түүхэтэй нягта холбоотой . Константин Константинович Рокоссовский граждан дайнай үедэ, 1920-ёод онуудта сэрэгэй алба Буряадта гараа. Константин Рокоссовскийн Улаан-Үдэдэ байрлаһан Кубанска кавалерийскэ 5-дахи бригадын командирай уялга дүүргэжэ байха сагта Буркавди­визи байгуулагдаа гээд һануулая.

Мүнөөдэр Улаан-Үдын Дурасхаалай хүшөөгэй дэргэдэ эмхидхэгдэһэн зүблөөндэ Константин Константинович Рокоссовскийн хүшөөгэй эскиз дурадхагдаа, хаана хүшөө табигдахаб гэжэ хэлсэгдээ.

- Агуу Илалтын 75-жэлэй ойн баярай үдэр болотор хүшөө нээхэ зорилготойбди. Дурасхаалай хүшөөОродой Холбоото Уласай сэрэгэй-түүхын олониитын һомолһон мүнгөөр бүтээгдэхэ. Хүшөө табиха, тэрэнэй шадарха газар болбосон түхэлтэй болгохо талаар мүнгэн уласай болон хотын бюджетһээ һомологдохо, - гэжэ Алексей Цыденов хэлэбэ.

Улаан-Үдын захиргаанай хүтэлбэрилэгшын уялга дүүргэгшэ Игорь Шутенковой хэлэһээр, хүшөөгэй табигдаха газар ажаһуугшад шэлэхэ.

- Бүтээл бидэндэ ехэ һайхашаагдаа. Илалтын Хүшөөгэй дэргэдэ шэнэ бүтээл табихаар хоёр газар шэлэгдээ. Тиигэбэшье ажаһуугшадай дунда интерет һанал-хуряалга эмхидхэгдэжэ, шиидхэбэри абтаха. Һанал-хуряалга үнгэргэлгэ тухай дуулгахабди, - гэжэ Игорь Шутенков хэлэбэ.

Ажаһуугшадые эдэбхитэйгээр интернет-һанал хуряалгада хабаадахыень Улаан-Үдын захиргаанай хүтэлбэрилэгшын уялга дүүргэгшэ уряалаа.

Анна Огороднигой гэрэл зураг