Мүнөөдэр Үндэһэтэнэй номой санда “Россиин түлөө” арадай фронт” гэһэн ниитэроссиин олониитын хүдэлөөнэй хуралдаан боложо, үнгэрһэн жэлдэ бэелүүлһэн ажалай дүнгүүд согсологдоо. Энэ хэмжээ ябуулгада Буряадай Толгойлогшо Алексей Цыденов, Арадай Хуралай Түрүүлэгшэ Владимир Павлов, Гүрэнэй Дүүмын һунгамал Николай Будуев, уласаймнай Засагай газарай ноёд һайд, олониитын хүдэлөөнэй гэшүүд хабаадаа юм.
Алексей Самбуевичай хэлэһээр, нёдондо Арадай фронтын үүсхэлээр элүүрые хамгаалгын, болбосоролой, ниигэмэй болон бусад амин шухала һалбаринуудта 600 гаран хэмжээ ябуулга эмхидхэгдэһэн байна. Харин хүдэлөөнэй бии болоһон сагһаа хойшо нилээд ехэ юумэн хэгдээ.
“Арадай фронт урагшаа һанаатай, эдэбхи үүсхэлтэй, арад зонойнгоо, гүрэнэйнгөө түлөө һанаагаа зободог хүнүүдые нэгэдүүлһээр, 8 жэлэй туршада ажалаа амжалтатай ябуулжа байна”, - гэжэ Арадай Хуралай Түрүүлэгшэ тэмдэглээ.
Ородой Холбоото Уласай Юрэнхылэгшэ Владимир Путинай майн зарлигай бэелүүлгые арад зон хэр хинанаб, зарлигай эрилтэнүүдые яагаад ашаг үрэтэйгөөр бэелүүлхэб, юрын зоной ажабайдал хайшан гээд һайжаруулхаб гэжэ сугларагшад хөөрэлдөө, һанамжануудаа дурадхаа. Энээн тухай дэлгэрэнгыгээр “Буряад үнэн” сониной ээлжээтэ дугаарта уншаха аргатайт.
Анна Огороднигой гэрэл зурагууд