753
Ородой Холбоото Уласай Юрэнхылэгшэ Федеральна суглаанда захил-хандалгадаа Зүүн Сибириин болон Алас Дурна зүгэй хүгжэлтэ хадаа бүхы һалбаринуудай засаг зургаанай ажалай шухала шэглэл гэжэ һануулаа. Мүнөө бэелүүлхэ гол зорилгонуудай нэгэн хадаа Алас Дурнын федеральна тойрогой, тэрэ тоодо Буряад Уласай, ажабайдал гүрэн доторой бэшэ можо нютагуудта орходоо дээрэ байха ёһотой гээд Владимир Путин тэмдэглээ.
Буряад Уласай Засагай газар Юрэнхылэгшын шиидхэбэри бэелүүлхэ талаар ажал ябуулжа эхилээ. Буряадай Толгойлогшо Алексей Цыденовэй даалгабаряар эдэй засагай яаман засаг зургаантай хамта уласай түрүүлэн хүгжэлтын дэбисхэртэ ниигэмэй объектнүүдые болон хангалгын байгууламжа хүгжөөхэ талаар түсэбүүд табигдаа. «Бурятия» гэһэн ТОР байгуулха тухай мэдүүлгэ оруулагдаа.
Тиихэдэ Буряад Уласай Засагай газар Алас Дурна зүгэй хүгжэлтын яамантай, федеральна засаг зургаантай, Алас Дурнын федеральна тойрогой можо нютагуудтай хамта 2025 болон 2035 онууд хүрэтэр Алас Дурнын хүгжэлтын үндэһэтэнэй программа байгуулха талаар ажал ябуулна. Байгша оной сентябрь һарада үнгэргэгдэхэ Зүүн зүгэй эдэй засагай хуралдаанда энэ программатай Юрэнхылэгшые танилсуулха. Тиимэһээ ажаһуугшадай оруулһан дурадхалнууд хараада абтан, Үндэһэтэнэй программа байгуулагдаха.
Буряад Уласай эдэй засагай яаманай мэдээсэлэй албанай гэрэл зураг
