928
Буряад Уласай соёлой сайд Соёлма Дагаева болон Арадай уран бүтээлэй түбэй уран һайханай хүтэлбэрилэгшэ, Буряадай габьяата артистка Мэдэгма Доржиева мүнөөдэр, февралиин 25-да, суглаанда хабаадаба.
Улаан-Үдэдэ февралиин 28-най болон мартын 1-нэй үдэрнүүдтэ Буряадай оперо болон баледэй театрта эстрадна дуунай «Сагаан һара» гэһэн уласхоорондын мүрысөөн 25-дахияа үнгэргэгдэнэ. Байгша оной хэмжээ ябуулгада Буряад, Татарстан, Башкортостан, Хальмаг, Тыва уласуудай, Москва хотын, Армени, Монгол, Хитад, Итали гүрэнүүдэй дуушад хабаадаха. Эстрадна дуунай «Сагаан һара» гэһэн уласхоорондын мүрысөөнэй илагша мүнгөөр бүтээгдэһэн кубок болон мүнгэн шанда хүртэхэ юм.
Буряад уласта эстрадна шэнэ дуунуудые зохёогшодые дэмжэхэбди гэжэ Буряад Уласай соёлой сайд тэмдэглэбэ.
- Февралиин 28-да мүрысөөнэй шэлэн абалгын шата үнгэргэдэхэ, мартын 1-дэ «Сагаан һара-2019» гэһэн уласхоорондын мүрысөөн эмхидхэгдэхэ. Дуунай фестиваль анха түрүүшынхиеэ 1994 ондо эмхидхэгдээ гээд һануулая. Байгша оной мүрысөөндэ Итали, Монгол, Казахстан, Тыва уласуудһаа 10 дуушан, Буряад уласһаа 20 дуушад хабаадаха. Мүрысөөнэй шухала эрилтэнүүдэй нэгэн хадаа хабаадагшад заатагүй нютагайнгаа композиторнуудай, авторнуудай найруулһан шэнэ дуу дуулаха юм, – гэжэ Соёлма Дагаева хэлэбэ.
Эстрадна дуунай мүрысөө залан хүтэлбэрилхыень даалгаһанай түлөө Мэдэгма Доржиева Буряадай соёлой яаманда баяраа мэдүүлбэ.
- Хитадай NMTV болон Монголой UBS телесубагуудтай хэлсээ баталаабди. Тиихэдэ уласхоорондын жюри дуушадые сэгнэхэ. Бэлигтэй залуушуулыемнай шүүгшэднай урижашье болохо. Казахстанай мэдээжэ дуушан Димаш мэтэ дуушадые тодоруулха хүсэлтэйбди, - гэжэ Мэдэгма Доржиева тобшолбо.
Хоёр үдэрэй туршада харагшад уласхоорондын мүрысөө хараха аргатай. Тиихэдэ харагшадай һанал-хуряалгын дүнгүүдээр түгэсхэлэй шатын үшөө нэгэ хабаадагша элирүүлэгдэхэ.
Эстрадна дуунай мүрысөөндэ хабаадажа, саашадаа мэдээжэ дуушад болоһон хүнүүд олон. Нэрлэбэл, Чингис Раднаев, Бадма-Ханда, Зоригто Тогочиев, Эрдэни Батсух, Дулма Сунрапова, Сэсэг Аюшеева, Елена Борохитова, Тимур Болотов болон бусад.
