​​Баир Уладаевай буулгаһан кинотой танилсуулга Улаан-Үдэдэ үнгэрбэ

Гол рольдо наадаһан Анфиса МАНХАЕВА

Февралиин 25-да “Еврозона” кинотеатрта Баир Уладаевай “На берегу мечты” гэһэн кинотой танилсуулга үнгэрбэ. Энэ кинофильм режиссёрой болон актёрнуудай эрхим ажалай түлөө “Восток-Запад” гэһэн уласхоорондын 11-дэхи кинофестивалиин шанда хүртэһэн байна гээд тэмдэглэлтэй.

Ажабайдалай үргэн замда залуу хүнэй ба үхибүүнэй хүнгэн бэшэ хуби заяанай холболдоһон тухай кинодо харуулагдана.

Долоотойхон Настя басаган үйлын үреэр үншэн үхибүүдэй гэртэ ороно. Сугтаа энэ байрада ханилһан дүтын нүхэр басаганай “хаанаб даа далайн эрьедэ жэгтэй һайхан шэдитэ юртэмсэ бии, тэндэ үхибүүд хододоо жаргалтай байдаг” гэжэ хөөрөөень хадуужа абаад, Настя басаган хамтын байраһаа тэрэ газар бэдэржэ зугадана.

Чечен дайнай ветеран, ехээр шархатаһан Володя хүбүүн нютагаа бусажа, ажабайдалаа зохёон ажаһууна. Залуу хүбүүе сэрэгэй албанда үдэшэһэн хүгшэн эжынь дүү Дарима басагантайнь үлэһэн аад, хада гэртээ харина. Дарима үншэн үхибүүдэй байшанда оробошье, тэндэһээ тэрьелшоо. Володя дүү басагаяа бэдэрээд олоногүй. Һалхитай хүйтэн үдэр урагшагүйдэжэ, гэртээ бусажа ябатараа, федеральна харгыда Настя басагые хараад, алад гаража шадангүй, гэртээ асарна. Магад, Настя өөрын түрэһэн дүү Даримые һануулжа болоо. Тиигэжэ Володя Настя хоёр сугтаа байжа, залуу хүбүүн ажабайдалай орёо асуудалнуудтай басагые танилсуулжа, шиидхэжэ һургана, ойлгуулна. Настя ямаршье далайн эрьедэ жэгтэй һайхан шэдитэ юртэмсэ үгы, хэрбэеэ жаргалтай ажаһуухын тула, өөрөө энэ жаргалаа зохёожо һураха хэрэгтэй гэжэ ойлгоно.

“Энэ кинодо аха зон ба үхибүүдэй хоорондохи харилсаанай асуудал харуулхаяа оролдообди. Гол рольдо Анфиса Манхаева шадамар бэрхээр наадаа. Кинодо наадаха гээшэ тиимэ бэлэн хэрэг бэшэ, зарим зон энээниие тэсэжэ ядаад ошодог. Кино буулгахадаа бидэ можо нютагтаа шиидхээгдээгүй асуудалнуудые, түүхэ харуулха гэжэ оролдонобди. Можо нютагуудта буулгагдаһан кинофильмнүүд Россин хэмжээндэ гаража эхилжэ байһандань баясамаар”, - гэжэ сценари зохёогшо, режиссёр Баир Уладаев хэлэбэ.

Буряадай кинематографи хүгжэжэ байна гэжэ “Русская Фильм Группа” корпорациин продюсер Алена Мареева тэмдэглээ .

Алёна МАРЕЕВА

“Эдэ кинофильмнүүдтэ хүнэй сэдьхэлэй байдал, ниигэмэй асуудалнууд харуулагдана. “На берегу мечты” гэһэн кинодо адли фильмнүүд хадаа хододоо хэрэгтэй. Энэ кино Буряад Уластай, Улаан-Үдэтэй суг ябуулһан түрүүшын түсэл-туршалгамнай болоно. Бидэ олон жэлэй туршада можо нютагуудта кино буулгаха талаар ажал ябуулнабди, туһа хүргэнэбди. Танай эдэбхи үүсхэлһээ олон юумэн дулдыдаха”, - гэжэ Алёна Мареева хэлэбэ.

Баир Уладаевай “На берегу мечты” гэһэн фильм кинотеатрнуудта февралиин 28-һаа харуулагдажа эхилхэ. 

Авторай гэрэл зурагууд