Энэ оньһон үгын зүйтэй байһые “Россиин түлөө” арадай фронт” гэһэн бүхэроссиин олониитын хүдэлөөн (ОНФ) гэршэлнэ. Ажабайдалаа ноёд һайдта даалгажархёод, өөһэдөө углуу шохойгоор тэдэнээ хараагаад, юушье хэнгүй, гараа дэлгээд һуухань буруу гэжэ олониитэ зон ойлгожо, хуби заяагаа өөһэдөө шиидхэжэ эхилээ.
Тус хүдэлөөн 2011 ондо гүрэнэймнай Юрэнхылэгшэ Владимир Путинай үүсхэлээр байгуулагдаһан юм гэжэ һануулая. Арадай фронт гүрэнэй амин шухала түсэлнүүдэй, тэрэ тоодо майн зарлигуудай бэелүүлгэ хинаха, эдилгэ абалгатай тэмсэхэ, һангай мүнгэ зөөри ашаг үрэтэйгөөр ашаглуулха, гүрэнэй засагай зургаануудта зүб мүрэй шиидхэбэри абажа, тэдэнээ бэелүүлгэдэнь али болохоор туһалха үүргэ даажа абанхай.
Үнгэрһэн долоон хоногто эмхидхэгдэһэн хуралдаанда хабаадаһан Буряадай Толгойлогшо Алексей Цыденовэй онсолһоор, энэ хүдэлөөндэ ородог урагшаа һанаатай, арад зонойнгоо түлөө һанаагаа зободог хүнүүдэй ашаар нёдондо 450 гаран хэмжээ ябуулга эмхидхэгдэһэн байна. Зарим тэды түсэлнүүдыень нэрлэбэл, “Хүүгэдтэ – адли тэгшэ арга боломжонууд”, “Һаланхай харгынуудай карта”, “Арад зоной шанар сэгнэлгэ”, “Хотын оршон байдал һайжаруулгые саг үргэлжэдэ шалгаха түб”, “Бог шоройһоо сэбэрлэлгэ” гэхэ мэтэ болоно.
“Таанад ниигэмэй-эдэй засагай шухала асуудалнуудые шиидхэлгэдэ нүлөөлнэт, - гэжэ Буряадай Арадай Хуралай Түрүүлэгшэ Владимир Павлов сугларагшадта хандаа. – Ниитэроссиин арадай фронтын үүсхэһэн түсэлнүүд олошоржол байна, тэрээнһээнь дулдыдан, гүрэнэй засагай зургаануудай түлөөлэгшэдэйшье ажал нэмэнэ гээшэ. Арадай Хурал тус хүдэлөөнэй Буряадтахи таһагтай нягта харилсаа холбоотойгоор ажалаа ябуулна. Жэшээнь, 2018 ондо Арадай фронт Улаан-Үдэ ба Северобайкальск хотонуудые тойроһон ой модоной бүһэлүүр байгуулха дурадхал оруулаа һэн. Энэ үүсхэлыень Арадай Хурал дэмжэжэ, байгша оной апрелиин сесси дээрээ хууляар баталха арга боломжо харахаар харааланхай. Тэрэшэлэн, хүдэлөөнэй үүсхэһэн түсэлнүүдэй ашаар Буряад ороной ажаһуугша бүхэн түрэл дайдаяа хүгжөөхэ хэрэгтэ хубитаяа оруулха аргатай”.
Гүрэнэй Дүүмын һунгамал, Ниитэроссиин арадай фронтын түб штабай гэшүүн, Буряадтахи штабай суг түрүүлэгшэ Николай Будуевай тэмдэглэһээр, үнгэрһэн жэлдэ болбосоролой ба байгаали хамгаалгын шиидхэгдээгүй асуудалнуудта онсо анхарал хандуулагдаһан байна. Шалгалтын, хиналтын дүнгүүдэй шухалануудтань хандаябди.
Хэнэйшье мэдэһээр, һурагшадые хооллуулгын асуудалда хабаатай шууяан гараа һэн. Зарим түрэлхид хүүгэдтэ дурадхагдадаг эдеэн табагай гэрэл зурагуудые сүлжээ холбоондо табиһаншье байха. Хөөрүү хүнэй хэлээ һаа, тэрэнь гурба халбагадажархихадал хооһоршодог байгаа. Тиин хүүгэдэй эдихэ хубита эдеэнэй хэмжээн хиналта доро абтажа, байдал нэгэ бага заһараа. Зүгөөр хиналтын үгы һаа, баймга бүри хооһон табагууд табигдаха байгаа гү? Арадай фронтын можо нютагай штабай гэшүүн Наталья Сандаковагай хэлэһээр, нёдондо хүүгэдэй амаралта баһа шалгагдаһан байна. Эндэ гол шиидхэгдээгүй асуудал – хүүгэдэй лагерьнуудай муу һомололго. Олонхи лагерьнууд 60-70-аад онуудта баригдаһан хадаа, хуушарһан байхаһаа гадна мүнөө үеын эрилтэнүүдтэ тааранагүй. Мүн тиигэхэ мүртөө зарим лагерьнуудта үсөөн хүүгэд амарна. Шалтагааниинь – түрэлхид хаанаһаа ямар аргаар путёвконуудые абадаг юм гэжэ мэдэнэшьегүй. Гадна эрэмдэг бэетэй хүүгэдтэ нэмэлтэ болбосорол олгуулха шухала.
Байгаали хамгаалгын дүнгүүдые хүдэлөөнэй Буряадтахи таһагай гэшүүн, “Бог шоройһоо сэбэрлэлгэ. Бог шорой хаядаг газарнуудай интерактивна карта” гэһэн түсэлэй залан хүтэлбэрилэгшэ Алексей Бадмаев согсолоо. Эрхэтэн бүхэн хаана хуули бусаар бог шорой хаянаб, хаана байгаали бузарлагдажа байнаб гэһэн мэдээнүүдые тус картада оруулха аргатай. Бүхы гүрэн дотор иимэ 24117 хандалга оронхой. Буряад орондо 120 хандалга бүридхэлдэ абтанхай, даб дээрээ тэдэнэйнь 45 хуби сэбэрлэгдээд байна.
“Байгаали хамгаалга” түсэлэй залан хүтэлбэрилэгшэ Евгений Кислов ой модо, Байгал далай хамгаалха шухала гэжэ тэмдэглээ. Тэрэнэй һанамжаар, бэеэ абаад, холуур тойроод ябангүй, булта оролдоо һаа, ашаг үрэ гараха. Жэшээ болгон дурдахадаа, нёдондо үсөөн түймэрэй болоһые баримталаа. Үнэхөөрөөшье, зарим жэлнүүдтэ утаа уняарһаа үдэр дунда нараншье харагдадаггүй һэмнай даа.
Саашань хэлэбэл, үншэн хүүгэдэй эрхэнүүдые хамгаалга, ажаһуудаг газараа өөдэнь таталга, муу харгынууд болон тэдэниие заһабарилгын шанар һайжаруулга, түмэр хүлэгөө табиха газаргүйдэлгэ, харгы дээрэхи түрисэлдөөн гэхэ мэтэ асуудалнууд бодхоогдоо, шиидхэхэ дурадхалнууд оруулагдаа. Теэд бүгэдэ зоной хабаадалгагүйгөөр ехэ хэрэг бүтээхэнь хэсүүшэг гэжэ сугларагшад тэмдэглээ.
Анна Огороднигой гэрэл зурагууд