​​«Буряадай түрүү хүнүүд» гэһэн заншалта урилдаан соносхогдоно

«Буряад үнэн» Хэблэлэй байшан «Бу­ряадай түрүү хүнүүд» гэһэн ээлжээтэ XXIII урилдаагаа соносхоно. Энэ удаа урилдаанай номинацинуудай нэрэнүүд болон за­рим эрилтэнүүд шэнэлэгдэбэ. Тиихэдэ тодорһон лауреадуудай энгэртэ үнэтэ медаль зүүлгэгдэхэ ба мүнгэн шан барюулагдахаар болоо. Мүн баһа эрхим авторнууд элирүүлэгдэхэ юм.

Эрхим хүндэтэ манай уншагшад, гуурһа нэгэ­тэн! Хэрбээ энэ урилдаанда хабаадаха гэбэл, “Бу­ряад үнэн” Хэблэлэй байшанай [email protected], [email protected] гэһэн электрон хаягуудаар очеркнуудаа эльгээхэдэ болоно. 2019 оной февралиин 27-һоо октябриин 15 боло­тор материалнуудые хүлеэн абахабди.

Урилдаанай номинацинууд:

«ЕХЭ УГ» («СЕМЕЙНЫЕ ДИНАСТИИ – 2019»)

Хэдэн үе залгамжалһан нэрэ түрэтэй, эбтэй эетэй жэшээтэ гэр бүлэнүүд тухай зураглалнууд энэ номинацида ороно. Үеһөө үедэ дуратай ажа­лаа алдангүй, мэргэжэлээ улам мүлижэ байһан, үндэр амжалта туйлаһан гэр бүлэнүүдтэ алдар соло дуудая. Угайнгаа hарбаалжан уудалан, га­бьяа байгуулһан хүнүүдэйнгээ намтар, түүхэ до­мог дурсан байжа, мүнөөнэй зондо үльгэр жэшээ болгон мэдүүлэе!

«БУЯН ХЭШЭГ» («ДОБРО ГОДА»)

Нигүүлэсхы сэдьхэлэйнгээ уряагаар олон­до туһатай ажал ябуулагшад тухай зураглалну­уд. Ниитын ажалда, бүгэдэ арад зонойнгоо, эхэ һайхан нютагайнгаа, эсэгэ оронойнгоо түлөө эсэ­шэ сусашагүй эрмэлзэдэг хүнүүд үргэн Буряадта байхал байха.

«БААТАРШАЛГА» («ПРОРЫВ - 2019»)

Ажалай түрүү жолоо бариһан, ажал хэрэгтээ үндэр амжалта туйлаһан мэргэжэлтэд тухай зура­глалнууд. Мүнөө сагай байдалай ниигэмэй, эдэй засагай хүгжэлтэдэ, оршон тойронхи байгаали хамгаалха ажалда асари ехэ хубитаяа оруулһан хүнүүд тухай эндэ бэшэгдэхэ.

“УРАН БЭЛИГ” («ТВОРЦЫ - 2019»)

Соёл уралигай, уран бүтээлэй һалбарида онсо илгарһан хүнүүд тухай зураглалнууд. Уран дарха­най, уран үгын, уран зурагай шэглэлээр хүдэлдэг хүнүүдээр Буряад оромнай баян гүб даа. Зүжэгшэд, найруулагшад, дуушад болон бусад уран бэлигтэн – энэ номинациин гол геройнууд болохо.

«НАЙДАЛ» («НАДЕЖДА - 2019»)

10-25 наһанай хүүгэд болон эдиршүүл - манай ерээдүйн халаан гээшэ. Эдээхэн эдир наһанай хүүгэдэй дунда онсо илгарагшад гэжэ байдаг. Тэдэнэй туйлаһан амжалта - буряад арадай омогорхол мүн.

«ЭРХИМ НАЙРУУЛАГША» («ЛУЧШИЙ АВТОР ОЧЕРКОВ - 2019»).

Энэ урилдаанда ороһон очеркын авторнуудай эрхимыень элирүүлхэ зорилготойгоор энэ номи­наци оруулагдаа. Очерк бэшэхэ гээшэ журналистикын эгээл орёо жанр гэжэ мэдээжэ. Тодорхой хүн тухай бэшэхэдээ, тэрэнэй наһанайнь замые, хэһэн габьяаень уран һайханаар урлаха хэрэгтэй. Тиихэдээ ямаршье түхэл (интервью, эссе болон бусадые) шэлэжэ болоно. Гол шухалань гэхэдэ, эльгээһэн зураглалтнай олоной һонирхол татаха ёһотой. Найруулагшын бэлиг шадабаринь эндэ сэгнэгдэхэ юм.

Зураглал эльгээгшэдтэ иимэ эрилтэ табиг­дана: A-4 түхэлэй 2 хуудаһанай хэмжээндэ Times New Roman гэжэ 14 шрифтээр бэшэгдэһэн очерк байха ёһотой. Материалда гэрэл зураг заабол хаб­саргагдана.

Номинаци бүхэндэ гурба-гурбан шан тог­тоогдоно:

1-дэхи һуури – мүнгэн медаль ба 10 мянган түхэриг;

2-дохи һуури – диплом ба 5 мянган түхэриг;

3-дахи һуури – диплом ба 3 мянган түхэриг.

Урилдаанай дүнгүүдые тусхай комисси элирүүлхэ.

6 номинациһаа гадна урилдаанай Тусхай шан тогтоогдоно. Тусхай шангай лауреат интернет-һанал хуряалгын дүнгөөр элирүүлэгдэхэ.

Урилдаанда ороһон бүхы очеркнууд “Буряад үнэн” Хэблэлэй байшанай burunen.ru сайт дээрэ ниитэлэгдэжэ байха.

Урилдаанай дүнгүүд 2019 оной декабриин 1 болотор “Буряад үнэн” сониндо толилогдохо.

«Буряадай түрүү хүнүүд» гэһэн урилдаанай дүримэй эрилтэнүүдтэ таараагүй материалнууд хэблэгдэхэгүй, урилдаанда хабаадахагүй гэжэ эмхидхэлэй хороон дуулгана.

Лаблаха утаһанай дугаарнууд:

8 (3012) 21-54-54, 21-54-93.