1046
Буряад Уласай Засагай газарай Түрүүлэгшын нэгэдэхи орлогшын уялга дүүргэгшэ Игорь Зураев Ородой Холбото Уласта Франциин бүрин эрхэтэ түлөөлэгшэ Сильви Берманнтай үсэгэлдэр уулзаба. Уулзалгада Буряад Уласай эдэй засагай сайд Александр Бардалеев болон аяншалгын сайд Бадмацыренова хабаадалсаа.
Буряа Уласай Алас Дурнын федеральна тойрогой бүридэлдэ ороһон асуудал, Хитад, Япон, Солонгос гүрэнүүдтэй харилсаа хүгжөөлгэ, эдэй засагай, мүнгэн һангай һалбарида, аяншалгын һалбаринуудта Франци, Буряад Улас суг хамта ажал ябуулха асуудалнуудаар Сильви Берманн һонирхоо.
- Аяншалгын һалбарида хүгжөөхэ арга боломжо үргэн. Хүршэ Монгол гүрэндэ аяншалгашад олоор ябадаг. Япон, Солонгос, Хитад болон Азиин бусад гүрэнүүдһээ Буряад уласаар аяншалагшадай тоо олошорно. Июлиин 1-һээ «Байгал» аэропортдо электронно визэ үгтэдэг болохо. 18 гүрэнэй эрхэтэд хэрэгтэй дансаяа эндэ бүтээхэ аргатай, - гэжэ Игорь Зураев хэлэбэ.
Франци Буряад улас ерэһэн эрхэтэдэйнгээ тоогоор 5-дахи һуури эзэлнэ: 2017 оной Франциин 1300 аяншалагшад Буряад улас ерэһэн байна гэжэ Мария Бадмацыренова тэмдэглэбэ.
- Ородой Холбоото Улас дотор эгээл гоё нютагуудай тоодо ороһон гурбан һууринууд Буряадта бии. Европын аяншалагшад Зүүн зүгэй эмшэлэлгээр һонирходог. Үнгэрһэн жэлдэ «Байгал» аэропорт агаарай 5-дахи шатын зэргэтэй болоо. Тэрэнэй ёһоор, хари гүрэнүүдэй самолёдууд эндэ бууха аргатай, - гэжэ Буряадай аяншалгын сайд хэлээ.
Буряад Уласай эдэй засагай сайд Александр Бардалеевэй тэмдэглэһээр, Франци болон Буряад улас үйлэдбэриин, хүдөө ажахын болон бусад һалбаринуудта ажал суг ябуулха аргатай. Энэ талаар ажал хэгдэнэ.
- Буряад Уласта «Леруа Мерлен» гэһэн томо магазин нээхэ талаар ажал ябуулнабди. Энэ түсэл бэелүүлхэдэ, ажалай 300-аад һуури байгуулагдаха. Буряад Уласта олзын хэрэг эрхилхэ талаар Франциин түлөөлэгшэдые дэмжэхэбди, - гэжэ эдэй засагай сайд мэдээсэбэ.
- Францида, имагтал бүхы Европодо, Москва, Петербург, Сибирь, Владивосток, Сибирь, Байгал далай тухай мэдэхэ. Би сурталшалгын ажал ябуулжа, Буряад уластай танилсуулха ажал ябуулхаар бэлэмби, - гэжэ Ородой Холбоото Уласта Франциин элшэн сайд дуулгаба.
Сильви Берманн Зүүн Сибириин технологиин болон хүтэлбэриин ехэ һургуулиин француз хэлэнэй багшанартай уулзаа. Тиихэдэ Ивалгын дасан, Тарбагатай аймагай Тарбагатай һууринай шэмээшэгүүдэй түүхын болон соёлой музей болон түбтэ хүрэхэ юм.
